1~Reyes 17 - CHUYA QELLQA La Biblia en Quechua de Ayacucho 2012

Eliaspa profetizasqanmanta

¹ Rey Acabtam Galaad law Tisbe llaqtayuq Elías nirqa: “Israelpa yupaychasqan Tayta Dios-raykum jurani, ñoqaqa serviqnin kasqayraykum paypa qayllanpi kachkani, manam kay watakunapi para kanqachu nitaqmi sullayllapas sullamunqachu ñoqa ninaykama”, nispa.

² Chaymantam Eliasta Tayta Dios nirqa:

³ Kaymanta intipa qespimunan lawman lloqsiy hinaspa Jordán mayupa chimpan Querit wayqopi pakakamuy.

⁴ Wayqomantam yakuta tomanki, kamachisqayman hinam cuervokuna mikuyta apamusunki, nispa.

⁵ Eliasmi rirqa imaynam Tayta Diospa kamachisqanman hina ruwaspan, Jordán mayupa chimpan Querit wayqopi yachamunanpaq.

⁶ Chaymi cuer-vokuna tantatawan aychata sapa tuta-payta hinaspa sapa tardeykuyta apamuqku, yakutañataqmi wayqomanta tomaq.

⁷ Punchawkunapa risqanman hinam, para mana chayamusqanrayku wayqopi yaku chakirurqa.

Viudapa wasinpi Elías samapakusqanmanta

⁸ Chaymi Eliasta Tayta Dios nirqa:

⁹ Hatarispayki Sidón lawpi Sarepta llaqtapi yachamuy. Chaypim huk viudata kamachiniña mikuchisunaykipaq, nispa.

¹⁰ Eliasmi Sarepta llaqtaman chayarurqa, hinaspam llaqtapa punkunman chayaruspan chay viudata yanta pallakuchkaqta rikururqa, chaymi qayaykuspan nirqa: Ama hina kaspaykiyá tomaykunaypaq yakuta aparamullaway, nispa.

¹¹ Yaku apamuq richkaptinmi chay viudata huktawan qayaspan nirqa: Ama hina kaspayá parten tantallaykitawan aparikamuway, nispa.

¹² Chaymi viudañataq nirqa: Señorniki Tayta Diosraykum jurani, manam tantayqa kapuwanchu, aswanqa tinajaypi putqoy harinawan puyñupi pisi aceitellayñam kachkan. Kunanmi yantata huñuchkarqani, chaywan ñoqapaqwan wawaypaq tantata ruwanaypaq, chayta mikuruspaykuqa mana mikunayku kaptinchá yarqaymanta wañukusaqku, nispa.

¹³ Eliasñataqmi nirqa: Ama manchakuychu, rispaykiyá nisqaykiman hina ruwaramuy, ichaqa ñoqapaqraqmi puntataqa tortillata ruwamunki, chayta aparamuwaspaykiñam qampaqwan wawaykipaqpas ruwamunki.

¹⁴ Tayta Diosmi kaynata nin: “Tinajapi harinapas chaynataq puyñupi aceitepas manam pisinqachu, allpaman parata Tayta Dios chayachimunankama”, nispa.

¹⁵ Chaymi Eliaspa nisqanman hina ruwaramurqa. Chaynapim viudapas, wawanpas hinaspa Eliaspas unay punchawkuna mikurqaku.

¹⁶ Manam tinajapi harinapas tukurqachu, nitaqmi puyñupi aceitepas pisirqachu, Eliasnintakama Tayta Diospa nisqanman hina.

¹⁷ Chaykunapa qepantañataqmi viudapa wawan nisyuta onqoruspan wañukurqa.

¹⁸ Chaymi Eliasta viuda nirqa: Diospa runan ¿imatataq contraykipi ruwaruni? ¿Huchaykunata yuyarichiwaspa wawayta wañuchinaykipaqchu hamurqanki? nispa.

¹⁹ Hinaptinmi Elías nirqa: Wawaykita apamuway, nispa. Mamanpa brazonmanta chaskiykuspanmi altospi samasqan cuartoman aparurqa. Camanman churaykuspanmi

²⁰ Tayta Diosta mañakuspan nirqa: Dios Taytalláy, ¿samapakusqay wasipi viudatapas llakichinkichum wawanta wañurachispayki? nispa.

²¹ Chaymantam wawapa hawanman kimsa kutikama pakchakuykuspan, Tayta Diosta kaynata mañakurqa: Dios Taytalláy, mañakuykim kay wawapa almanta kasqallan kutiykachimunaykipaq, nispa.

²² Tayta Diosmi Eliaspa mañakusqanta uyariruspan wawata kawsarirachirqa.

²³ Chaymi Eliasqa wawata marqakuykuspan altosmanta uraykamupan mamanman qoykuspan nirqa: Kayqaya wawaykiqa kawsarirun, nispa.

²⁴ Viudañataqmi nirqa: Kunanmi yachaykuni qamqa Diospa runan kasqaykita chaynataq Tayta Diospa palabran rimasqaykipas cheqap kasqanta, nispa.