1~Reyes 16 - CHUYA QELLQA La Biblia en Quechua de Ayacucho 2012

¹ Baasapa contranpi nimunanpaqmi Hananipa churin Jehuta Tayta Dios nirqa:

² Ñoqam pampamanta hoqarichkaq hina Israel nacionpi churarqayki runaykunapa kamachiqnin kanaykipaq, qanmi ichaqa Jeroboam hina kawsaspayki Israelpa mirayninkunata huchallirachispa piñarachiwanki.

³ Chayraykum qamtapas chaynataq miraynikikunatapas chinkarachisaq, imaynam Nabatpa churin rey Jeroboampa mirayninkunawan ruwasqayta hina.

⁴ Aylluykikunamanta llaqtapi wañuqkunataqa allqokunam mikunqa, purunpi wañuqkunañataqmi ullachkukuna mikunqa.

⁵ Rey Baasapa imaynam kawsasqanpas chaynataq imakunam ruwasqanpas Israel nacionpi reykunapa vidanmanta willakuq libropim qellqasqa kachkan.

⁶ Baasa wañuruptinmi Tirsa llaqtapi ñawpaq taytankunapa kasqanpi pamparurqaku. Paypa rantinpim churin Elaña munaychakurqa.

⁷ Tayta Diosmi Hananipa churin profeta Jehuntakama rey Baasapa contranpi hinaspa mirayninkunapa contranpi rimarirqa, chaynataqa rimarirqa mana allin ruwayninkunawan piñachisqanraykum. Rey Baasapa mana allin ruwasqakunaqa wañuchisqan Jeroboampa mirayninkunapa millakuypaq ruwasqankuna hinam karqa. Chaykunawanmi Tayta Diosta piñachirqa.

Israelpi Elapa hinaspa Zimripa munaychakusqanmanta

⁸ Judá nacionpi iskay chunka soqtayuq wataña rey Asa munaychakuchkaptinmi, Baasapa churin Ela, Tirsa llaqtamanta Israelpi munaychakuyta qallaykurqa. Elaqa iskay watallam munaychakurqa.

⁹ Zimri sutiyuq serviqnin capitanninmi ichaqa rey Elapa contranpi hatarirurqa, Zimriqa karqa guerrapaq wakin carretakuna nanachikuqmi. Rey Elam Tirsa llaqtapi mayordomon Arsapa wasinpi upyaspa sinka kachkarqa.

¹⁰ Chaymi Zimri yaykuruspan wañurachirqa, hinaspam rantinpi payña munaychakurqa. Chaytaqa ruwarqa Judá nacionpi iskay chunka qanchisniyuq wataña rey Asa munaychakuchkaptinmi.

¹¹ Zimriqa munaychakuyta qallaykuspallanmi rey Baasapa mirayninkunata lliwta wañurachirqa, manam huk qaritapas, reqsinakusqantapas nitaq aylluntapas puchurqachu.

¹² Chaynatam Baasapa lliw ayllunkunata Zimri wañurachir-qa, Baasapa contranpi profeta Jehun-takama Tayta Diospa nisqanman hina.

¹³ Chaynataqa ruwarqa rey Baasapas chaynataq churin Elapas millakuypaq ruwayninkuwan Israelta huchallichispa idolokunata yupaychaspa Tayta Diosta piñachisqankuraykum.

¹⁴ Rey Elapa imaynam kawsasqanpas chaynataq wakin ruwasqankunaqa Israel nacionpi reykunapa vidanmanta willakuq libropim qellqasqa kachkan.

¹⁵ Judá nacionpi rey Asa iskay chun-ka qanchisniyuq watamanña munaychakuchkaptinmi rey Zimri munaychakuyta qallaykurqa, payqa qanchis punchawllam Tirsa llaqtapi munaychakurqa. Chaykamam Israelpa tropankunañataq Filistea lawpi Gibetón llaqtapa hichpanpi churakururqaku.

¹⁶ Campamentonpi kaq tropakunañataqmi uyarirurqaku rey Elata Zimri wañurachisqanmanta, hinaspam chay punchawllapi llapa tropakunapa kamachiqnin Omrita rey kananpaq churarurqaku.

¹⁷ Chaymi Omriqa Israelpa tropankunapiwan Gibetón llaqtamanta rispa Tirsa llaqtata atacarurqaku.

¹⁸ Zimriñataqmi vencesqaña kasqanta qawakuykuspan palacio ukuman yaykuruspan pakakururqa, hinaspam ukupi kachkaspan palaciota kañaykurqa, chaypim kikinpas ruparuspa wañururqa.

¹⁹ Payqa wañururqa mana allin kaqkunata ruwaspa Tayta Diospa qayllanpi huchallikusqanraykum, imaynam Jeroboampas huchallikuspa Israelpa mirayninkunata huchallichisqanta hina ruwasqanraykum.

²⁰ Zimripa imaynam kawsasqanpas, wakin ruwasqankunapas chaynataq rey Elapa contranpi hoqarikusqanpas Israel nacionpi reykunapa vidanmanta willakuq libropim qellqasqa kachkan.

Israelpi Omripa munaychakusqanmanta

²¹ Chaymantam Israel nacionpi runakuna iskayman rakinakururqaku. Wakinmi munarqa Ginatpa churin Tibni reyninku kananta, wakinñataqmi munarqaku Omri reyninku kananta.

²² Ichaqa Omripa qatiqninkunam Ginatpa churin Tibnipa qatiqninkunata vencerurqaku. Chaynapim Tibni wañuruptin Omriña munaychakurqa.

²³ Judá nacionpi rey Asa kimsa chunka hukniyuq wataña munay-chakuchkaptinmi Israel nacionpi Omri munaychakuyta qallaykurqa. Chunka iskayniyuq watam munaychakurqa, chay chunka iskayniyuq watamantam soqta watata Tirsa llaqtapi munaychakurqa.

²⁴ Rey Omrim Semermanta Samaria orqota rantirurqa soqta chunka soqtayuq kilo qollqewan, chaypim huk llaqtata hatarichispan Samariawan suticharqa, chaynataqa suticharqa orqo rantikuqnin Semerpa sutinraykum.

²⁵ Omriqa ñawpaq reykunamantapas aswantaraqmi Tayta Diospa qayllanpi mana allinkunata ruwarqa.

²⁶ Paypas Nadabpa churin Jeroboampa millakuypaq ruwasqankunata hina ruwaspam Israelpa mirayninkunata huchallichirqa. Omriqa idolokunata yupaychaspanmi Israelpa Diosninta piñachirqa.

²⁷ Omripa imaynam kawsasqanpas chaynataq atiywan ruwasqankunaqa Israelpi reykunapa vidanmanta willakuq libropim qellqasqa kachkan.

²⁸ Rey Omri wañuruptinmi Samaria llaqtapi pamparurqaku, paypa rantinpim churin Acabña munaychakurqa.

Israelpi Acab munaychakusqanmanta

²⁹ Judá nacionpi rey Asa kimsa chunka pusaqniyuq wataña munaychakuchkaptinmi Omripa churin Acab Israelpi munaychakuyta qallaykurqa. Samariamantam Israel nacionpi munaychakurqa iskay chunka iskayniyuq wata.

³⁰ Omripa churin Acabqa ñawpaq reykunamantapas aswantaraqmi Tayta Diospa qayllanpi huchallikurqa.

³¹ Nabatpa churin Jeroboampa hucha ruwasqanmantapas aswantaraq ruwaspam Sidón llaqtapa reynin Et-baalpa churin Jezabelwan casarakururqa, hinaspam Baal idolota servispa yupaycharqa,

³² chaynataqmi Baal idolopaq Samariapi templo ruwachisqanpi huk altarta ruwachipurqa.

³³ Ruwachirqataqmi Asera idolotapas, chaykunawanmi ñawpaq reykunamantapas astawanraq Israelpa yupaychasqan Tayta Diosta piñachirqa.

³⁴ Acab munaychakuchkaptinmi Bet-el llaqtayuq Hiel sutiyuq runa musoqmanta Jericó llaqtata hatarichirqa, cimientontam piwi churin Abirampa hawanpi churarqa, llaqtapa punkuntañataqmi sullka churin Segubpa hawanpi churachirqa, chaynapim Nunpa churin Josueynintakama Tayta Diospa rimarisqan cumplikurqa.