1~Reyes 15 - CHUYA QELLQA La Biblia en Quechua de Ayacucho 2012

Judá nacionpi Abiampa munaychakusqanmanta

¹ Chunka pusaqniyuq wataña Nabatpa churin rey Jeroboam Israelpi munaychakuchkaptinmi, Abiamqa Judá nacionpi munaychakuyta qallarirqa.

² Kimsa watam Jerusalén llaqtapi munaychakurqa, mamanmi karqa Abisalompa churin Maaca.

³ Abiampas taytanpa imaynam hucha ruwasqanta hinam ruwarqa. Yupaychasqan Tayta Diostapas hawa sonqollam servirqa, paypa sonqonqa manam ñawpaq taytan Davidpa sonqon hinachu karqa.

⁴ Ichaqa Tayta Diosmi serviqnin Davidrayku, paypa mirayninta Jerusalén llaqtapi achkita hina churarqa Davidpa rantinpi rey kananpaq, chaynapi Jerusalén llaqtata takyachinanpaq.

⁵ Davidqa Tayta Diospa munasqanman hinam kawsarqa, wañukunankamapas kamachisqankunatam mana rakikuspa ruwayman churarqa; huchallikururqaqa Het casta Uriasta wañurachispallanmi.

⁶ Jeroboamwan Roboamqa sapa kutillam guerrallapi karqaku.

⁷ Abiampa imaynam kawsasqanwan chaynataq tukuy ima ruwasqankunapas Judá nacionpi reykunapa vidanmanta willakuq libropim qellqasqa kachkan. Abiamwan Jeroboampas guerrallapim karqaku.

⁸ Abiam wañukuptinmi “Davidpa Llaqtanpi” ñawpaq taytankunapa kasqanpi pamparurqaku. Paypa rantinpim churin Asaña munaychakurqa.

Judá nacionpi Asapa munaychakusqanmanta

⁹ Israel nacionpi rey Jeroboam iskay chunka wataña munaychakuchkaptinmi Judá nacionpi Asa munaychakuyta qallaykurqa.

¹⁰ Tawa chunka hukniyuq watam Jerusalén llaqtapi munaychakurqa, mamanmi karqa Abisalompa churin Maaca.

¹¹ Rey Asaqa taytan David hinam Tayta Diospa qayllanpi allin kaqkunata ruwarqa.

¹² Payqa nacionmantam qarqorurqa diosninkuta yupaychaspa qarimasillanwan qachakuqkunata, ñawpaq taytankunapa ruwachisqan idolokunatapas lliwtam wischururqa.

¹³ Abuelan Maacatapas, Asera idolota ruwachisqanraykum reina kayninmanta hurqorurqa. Rey Asam abuelanpa ruwachisqan Asera idolota ñuturuspan Cedrón wayqopi kañarurqa.

¹⁴ Moqokunapi capillakunatam ichaqa mana chinkachirqachu. Chaywanpas Asapa sonqonqa wañukunankamam Tayta Diosllapaq karqa.

¹⁵ Taytanpa sapaqchasqan chaynataq kikinpa sapaqchasqan qorikunata, qollqekunata chaynataq tukuy rikchaq alhajakunatapas Tayta Diospa templonmanmi churarqa.

Ben-adadwan rey Asapa contrato ruwasqanmanta

¹⁶ Rey Asaqa tukuy tiempom Israel nacionpa reynin Baasawan guerrapi karqa.

¹⁷ Israelpa reynin Baasam Judá nacionpa contranpi peleaq rispan, Ramá llaqtata aswanraq perqapachirqa, chaynataqa ruwarqa Judá nacionmanta rey Asa mana lloqsinanpaq hinaspa mana kutiykunanpaqmi.

¹⁸ Chaymi rey Asa, Tayta Diospa templonpi chaynataq reypa palacionpi puchuq qorita, qollqeta hurqospan hukkaqnin serviqninwan apachirqa Siria nacionpa reynin Ben-adadman. Ben-adadqa karqa Hezionpa willkan hinaspa Tabrimonpa churinmi. Ben-adadqa Da-masco llaqtapim yacharqa, paytam rey Asa kaynata nichimurqa:

¹⁹ Huk contratota ruwasunchik, imaynam taytanchikkunapas contrato ruwasqankuta hina. Chaypaqmi kay qorita qollqeta kuyakuyniyta apachimuchkayki. Israel nacionpa reynin Baasawan contrato ruwasqaykita pakiruy, chaynapi ñoqamanta anchunanpaq, nispa.

²⁰ Chaymi rey Ben-adadqa rey Asapa nisqanta kasuspan tropankunapa kama-chiqninkunata kamachirqa Israelpi llaqtakunata atacamunankupaq. Hi-naspanmi vencerurqa: Ijonta, Danta, Abel-bet-maacata, Cineret lawpi llaqtakunata chaynataq Neftalí allpapi llapallan llaqtakunatapas.

²¹ Chayta yacharuspanmi rey Baasaqa, Ramá llaqta perqapachisqanta saqeruspan Tirsa llaqtaman kutikurqa.

²² Rey Asañataqmi Judá nacionpi runakunata huñuruspan Ramá llaqtapi rey Baasapa hatarichisqan rumikunatawan kaspikunata apachirqa, chaykunawanmi Benjamín lawpi Geba llaqtatawan Mizpa llaqtata hatarichirqa.

Rey Asapa wañukusqanmanta

²³ Rey Asapa imaynam kawsasqankunapas, atiywan tukuy ima ruwasqankunapas chaynataq llaqtakuna hatarichisqankunapas Judapi reykunapa vidanmanta willakuq libropi qellqasqam kachkan. Ichaqa machuyayninpim chakinwan onqorurqa.

²⁴ Asa wañukuptinmi, “David-pa Llaqtanpi” ñawpaq taytankunapa kasqanpi pamparurqaku. Paypa rantinpim churin Josafatña munaychakurqa.

Israel nacionpi Nadabpa munaychakusqanmanta

²⁵ Judá nacionpi iskay wataña rey Asa munaychakuchkaptinmi Jeroboampa churin Nadab, Israel nacionpi munaychakuyta qallaykurqa, hinaspam iskay watalla munaychakurqa.

²⁶ Nadabqa manam Tayta Diospa munayninman hinachu ruwarqa, taytan hina huchallikuspanmi Israel runakunatapas huchallichirqa.

²⁷ Rey Nadabpa contranpim hoqarikururqa Isacar ayllumanta kaq Ahiaspa churin Baasa, hinaspam Filistea lawpi Gibetón llaqtapi wañurachirqa. Rey Nadabtaqa wañurachirqa Israelpi llapallan runakunapiwan Gibetón llaqtata muyuruspa atacachkaptinkum.

²⁸ Judá nacionpi rey Asa kimsa wataña munaychakuchkaptinmi rey Nadabta Baasa wañurachirqa, hinaspam payña munaychakurqa.

²⁹ Baasaqa munaychakuyta qallaykuspallanmi rey Jeroboampa lliw ayllunta wañurachirqa, manam chullallapas puchurqachu, Silo llaqtayuq profeta Ahiasnintakama Tayta Diospa nisqanman hina.

³⁰ Chaynataqa ruwarqa Jeroboampa huchankumantam hinaspa chay huchankunawan Israelpa mirayninkunata huchallichisqanraykum, chaykunawanmi Israelpa yupaychasqan Tayta Diosta piñarachirqa.

³¹ Nadabpa imaynam kawsasqanpas chaynataq imakunam ruwasqankunaqa Israel nacionpi reykunapa vidanmanta willakuq libropim qellqasqa kachkan.

³² Israelpa reynin Baasaqa sapa kutillam rey Asawan guerrallapi karqaku.

Israelpi Baasapa munaychakusqanmanta

³³ Judá nacionpi kimsa wataña rey Asa munaychakuchkaptinmi, Tirsa llaqtapi Ahiaspa churin Baasa munaychakuyta qallaykurqa. Iskay chunka tawayuq watam Israel nacionpi munaychakurqa.

³⁴ Payqa manam Tayta Diospa munasqanman hinachu kawsarqa, aswanqa Jeroboampa ruwasqan huchakunata ruwaspam Israelpa mirayninkunata huchallichirqa.