1~Reyes 13 - CHUYA QELLQA La Biblia en Quechua de Ayacucho 2012

Rey Jeroboamta Dios qaqchasqanmanta

¹ Tayta Dios kamachiptinmi Judá nacionmanta huk profeta Bet-el llaqtaman chayarurqa. Payqa chayaramurqa altarpi inciensota Jeroboam kañachkaptinmi.

² Chay profetam Tayta Diospa kamachisqanrayku altarpa contranpi kaynata qaparirqa: ¡Altar, altar! Tayta Diosmi nisunki: “Davidpa ayllunmantam Josías sutiyuq huk qari wawa nacemunqa, paymi alto moqo capillakunapi incienso kañaq sacerdotekunata qampa qawaykipi wañuchinqa, hawaykipitaqmi runakunapa tulluntapas kañanqa”, nispa.

³ Chay punchawpim Diospa profetan huk señalta qawachispan nirqa: Kaywanmi yachankichik kay nisqaykunaqa Tayta Diospa nisqan kasqanta: “Altar tuñiruptinmi hawanpi uchpapas tallikunqa”, nispa.

⁴ Bet-el llaqtapi altarpa contranpi Diospa profetan qaparisqanta rey Jeroboam uyariruspanmi altarmanta makinta haywarispa nirqa: ¡Hapiychik! nispa. Ichaqa makin chakiruptinmi manaña kuyuchiyta atirqañachu.

⁵ Hinaptinmi altar tuñiruptin uchpanpas tallikururqa, chaykunaqa cumplikurqa profetantakama Tayta Diospa nisqanman hinam.

⁶ Hinaptinmi profetata rey nirqa: Ama hina kaspayá yupaychasqayki Tayta Diosta mañaykapuway makillay allinyarunanpaq, nispa. Chaymi Tayta Diosta mañakuptin reypa makin allinyarurqa, hinaspam imaynam ñawpaq kasqanman hina kutiykurqa.

⁷ Hinaptinmi chay profetata rey nirqa: Wasiyman hakuchik mikuykamunaykipaq, chaypim huk regalota qomusqayki, nispa.

⁸ Chay profetam ichaqa reyta nirqa: Parten palacioykitaña qowaptikipas manam qanwanqa riymanchu nitaqmi mikuymanchu, yakutapas manam kay sitiopiqa tomaymanchu.

⁹ Tayta Diosmi kaynata kamachimuwarqa: “Amam mikunkichu nitaqmi yakutapas tomankichu, amataqmi risqayki ñannillantaqa kutimunkichu”, nispa.

¹⁰ Chaynapim Bet-el llaqtaman risqan ñannintaqa manaña kutirqañachu.

¹¹ Chay tiempopim Bet-el llaqtapi huk yuyaqña profeta yacharqa, paypa churinkunam hamuruspanku chay profetapa Bet-el llaqtapi imam ruwasqanmanta willarqaku, willarqakutaqmi reyta imam nisqantapas.

¹² Chaymi paykunata taytanku tapurqa: ¿Maylaw ñannintataq pasarqa? nispa. Churinkunañataqmi qawachirqaku, Judá nacionmanta hamuq profetapa maylaw ñannintam kutisqanta.

¹³ Hinaptinmi churinkunata chay yuyaqña profeta nirqa: Asnoyta caronaykapuwaychik, nispa. Chaymi sillakuykuspan

¹⁴ Judamanta hamuq profetata qatispan encina sachapa sikinpi tiyachkaqta tarirurqa, hinaspam tapurqa: ¿Qamchu kachkanki Judá nacionmanta hamuq profeta? nispa. Payñataqmi nirqa: Arí, ñoqam kachkani, nispa.

¹⁵ Hinaptinmi chay yuyaqña profeta nirqa: Haku wasiyta imallatapas mikuykamunaykipaq, nispa.

¹⁶ Judamanta hamuq profetañataqmi nirqa: Manam wasikimanqa kutiymanchu nitaqmi mikuymanchu, kay llaqtapiqa manam yakullatapas tomaymanchu.

¹⁷ Tayta Diosmi kamachimuwarqa kaynata: “Amam chay llaqtapiqa mikunkichu nitaqmi yakutapas tomankichu, amataqmi risqayki ñannintapas kutimunkichu”, nispa.

¹⁸ Ichaqa chay yuyaqña profetam llullakuspan nirqa: Ñoqapas qam hina profetam kani. Tayta Diospa angelninmi niwarqa wasiyman pusaspay mikuchinaypaq hinaspa yakuta tomachinaypaq, nispa.

¹⁹ Chaymi chay yuyaq profetapa wasinman kutispan mikururqa hinaspa yakutapas tomarurqa.

²⁰ Mesapi tiyachkaptinkum, Judamanta riq profetata chay yuyaqña profetantakama Tayta Dios rimapayarqa.

²¹ Hinaptinmi Judá lawmanta riq profetata chay yuyaqña profeta qaqchaspan nirqa: Tayta Diosmi kaynata nin: “Ñoqapa nisqayta mana ruwaspa kamachisqaytapas mana kasukuspa,

²² aswanqa amam mikunkichu nitaq yakutapas tomankichu nisqay sitiopi mikuruspayki yakutapas tomarusqaykiraykum, ayaykitapas ñawpaq taytaykikunapa sepulturanpiqa mana pampanqakuchu”, nispa.

²³ Mikuruspa yakutapas tomaruptinmi, chay yuyaq profetaqa asnonta caronaykapurqa,

²⁴ hinaptinmi Judamanta hamuq profetaqa ripukurqa. Ichaqa ñanta richkaptinmi huk león rikuriykuspan wañurachirqa. Ñanpi ayan chutarayaptinmi leonwan asnoñataq waqtanpi sayarqaku.

²⁵ Chayninta puriqkunam ñanpi aya chutarayaqta rikururqaku, rikurqakutaqmi leontawan asnotapas ayapa waqtanpi sayachkaqta. Chaymi yuyaqña profetapa yachasqan llaqtanman chayaruspanku willaykurqaku.

²⁶ Ñanmanta kutichiqnin yuyaqña profetañataqmi chayta uyariruspan nirqa: Chay wañuruq runaqa Tayta Diospa kamachisqanta mana kasukuq profetam, Tayta Diosmi paytaqa mana kasukusqanrayku leonwan wañurachirqa, Tayta Diospa nisqanman hina, nispa.

²⁷ Hinaspanmi churinkunata nirqa: Asnota caronaykapamuwaychik, nispa. Sillaykachiptinkum pasaspan

²⁸ ayata ñanpi chutarayachkaqta tarirurqa, asnotawan leontañataqmi chay ayapa waqtanpi sayachkaqta. Leonqa manam chay ayata mikusqachu nitaqmi asnotapas imanasqachu.

²⁹ Hinaptinmi yuyaqña profetaqa chay ayata asnonpi cargakuykuspan llaqtapi pampananpaq aparqa.

³⁰ Ayata kikinpa sepulturanpi pamparuspanmi waqaspa nirqa: ¡Ay, wawqelláy! nispa.

³¹ Pampayta tukuruspanmi churinkunata nirqa: Ñoqa wañuruptiymi kay profetapa pampakusqanpa waqtanpi pampaykuwankichik. Tulluykunatapas paypa tullunpa hichpanpim churankichik.

³² Bet-el llaqtapi altarpa contranpi chaynataq Samaria law moqokunapi kaq capillakunapa contranpipas paynintakama Tayta Diospa nisqanqa cumplikunqapunim, nispa.

³³ Chaywanpas Jeroboamqa mana allin ruwaynintaqa manam saqerqachu, aswanraqmi moqokunapi capillakuna ruwachisqanpi pipas munaqta sacerdote kanankupaq churarqa.

³⁴ Chaynapim Jeroboampa ayllunkunaqa huchallikururqaku, chayraykum kay pachamanta pasaypaq chinkachisqa karqaku.