1~Reyes 12 - CHUYA QELLQA La Biblia en Quechua de Ayacucho 2012

Israel nacionpa iskayman rakikusqanmanta

¹ Israelpa llapallan mirayninkunam Siquem llaqtapi huñunakururqaku reyninkupaq Roboamtaña churanankupaq. Chaymanmi Roboampas rirqa.

² Ichaqa chaytam Nabatpa churin Jeroboam ya-charurqa. Paymi rey Salomonmanta lluptiruspan Egipto nacionpi kachkarqa.

³ Chaymi Jeroboamta qayachimuptinku Israelpa mirayninkunawan kuska Roboamman rispanku kaynata nirqaku:

⁴ Taytaykiqa llumpaytam ñakarichiwarqaku, chaynaqa kunanyá llumpayllaña llamkay qowasqankutawan sasa ruway atina kamachikuyninkunata pisiyachiy, hinaptinqa servisqaykikum, nispanku.

⁵ Chaymi Roboam nirqa: Kimsa punchawmantayá kutimuychik, nispa. Chaynapim runakuna kutikurqaku.

⁶ Hinaptinmi rey Roboamqa taytan Salomón kawsaptinraq serviqnin ancianokunata consejanankupaq kaynata tapukurqa: ¿Ima nisaqtaq kay runakunata? nispa.

⁷ Chaymi paykuna nirqaku: Sichum kay llaqtata allinta servispayki sumaqllata rimapayaptikiqa tukuy tiempom servisunki, nispanku.

⁸ Roboammi ichaqa llapa ancianokunapa consejasqanta mana kasukuspa paywan kuska uywasqa serviqnin jovenkunata consejanankupaq kaynata

⁹ tapukurqa: ¿Ima niwankichikmantaq qamkuna kay runakunapa mañakuyninmanta? Payku-nam kayta mañakuchkanku: “Llumpay-llaña llamkay qowasqankutawan sasa ruway atina kamachikuyninkunata pisiyachiy”, nispanku.

¹⁰ Chaynata Roboam niptinmi paywan kuska uywasqa jovenkunañataq nirqaku: “Taytaykipa sasa llamkaykuna qowasqankuta pisiyachiy niq runakunataqa kaynatam ninki: Taytaypa ñakarichisusqaykichikmantaqa ñoqaqa aswantaraqmi ñakarichisqaykichik.

¹¹ Taytayqa sasa llamkaykunapim llamkachisurqankichik, ñoqaqa aswantaraqmi llamkachisqaykichik; taytayqa azotellawanmi castigasurqankichik, ñoqam ichaqa fierro puntayuq azotewanraq castigasqaykichik”, nispanku.

¹² Kimsa punchawmantam reypa nisqanman hina Jeroboamqa llapallan runakunapiwan rey Roboampa qayllanman kutirqaku.

¹³ Reymi ichaqa ancianokunapa consejasqanta mana kasukuspan llapa runakunataqa nanay simiwan rimapayarqa.

¹⁴ Hinaspanmi jovenkunapa consejasqanman hina kaynata nirqa: Taytayqa sasa llamkaykunapim llamkachisurqankichik, ñoqaqa aswantaraqmi llamkachisqaykichik; taytayqa azotellawanmi castigasurqankichik, ñoqam ichaqa fierro puntayuq azotewanraq castigasqaykichik, nispa.

¹⁵ Chaynapim reyqa runakunapa mañakusqanta mana uyariqpas tukurqachu, Tayta Dios chaynata tantearusqanrayku, chaynapi Silo llaqtayuq profeta Ahiaspa Nabatpa churin Jeroboamman Tayta Diospa nisqan cumplikunanpaq.

¹⁶ Mañakuyninkuta reypa mana kasusqanta qawaykuspankum Israelpa mirayninkuna nirqaku: ¡Davidwanqa manam imapas ruwananchik kanñachu! ¡Isaipa churinwanqa manam ima herencianchikpas kanchu! ¡Israelpa mirayninkuna sapakama wasikichikman kutikuychik! ¡Davidqa ayllullanpi munaychakuchun! nispanku. Hinaspam Israelpa mirayninkunaqa sapakama wasinkuman kutikurqaku.

¹⁷ Chaynapim Roboamqa Judá llaqtakunapi yachaq Israelpa mirayninkunapi munaychakurqa.

¹⁸ Roboammi impuesto cobraqkunapa kamachiqnin Adoniramta Israel runakunaman kacharqa, paykunam ichaqa rumikunawan tukuparuspanku Adoniramta wañurachirqaku, chaymi rey Roboampas carretanpi Jerusalén llaqtaman utqayllamanña lluptikurqa.

¹⁹ Chaynatam Israel runakunaqa Davidpa ayllunmanta rakikururqaku. Chaynam kunankamapas kachkanku.

²⁰ Jeroboampa kutimusqanta yacharus-pankum, Israelpa mirayninkunaqa Jero-boamta qayachirqaku huñunakusqankuman hamunanpaq, hinaspam Jeroboamta reyninkupaq churarqaku, manañam mayqan ayllupas Davidpa mirayninmanta kaq rey Roboamtaqa qatirqakuñachu, aswanqa Judá ayllullañam qatirqa.

²¹ Jerusalenman chayaramuspanmi rey Roboamqa Judá ayllumanta hinaspa Benjamín ayllumanta pachak pusaq chunka waranqa guerrapaq soldadokunata huñururqa, chaynapi Israelpa mirayninkunapa contranpi peleaspan taytan Salomonpa munaychakusqan allpata kutichikunanpaq.

²² Semaiasmi karqa Tayta Diosta kasukuq runa. Paytam Tayta Dios nirqa:

²³ Judapi munaychakuq Salomonpa churin rey Roboamta chaynataq llapallan Judá aylluta, Benjamín aylluta hinaspa Israelpi wakin ayllukunatapas nimuy,

²⁴ Tayta Diosmi kaynata nin: “Ama riychikchu nitaq Israelpa mirayninkunamanta aylluykichikkunawanpas peleaychikchu, sapakama wasikichikman kutikuychik, kayqa ñoqapa tanteasqaymi”, nispa. Chaymi Tayta Diospa nisqanta kasukuspanku sapakama wasinkuman ripukurqaku.

Jeroboampa huchallikusqanmanta

²⁵ Jeroboammi Efraín law orqokunapi kaq Siquem llaqtata musoqmanta hatarichispan chaypi yacharqa, chaymantam Penuel llaqtaman rispan chay llaqtatapas hatarichirqa.

²⁶ Jeroboammi sonqonpi nirqa: Munaychakuyniyqa kasqallanchá Davidpa castanman kutiykunqa,

²⁷ sichum kay runakuna Jerusalén llaqtapi kaq temploman Tayta Diospaq sacrificiokuna ofreceq rispankuqa yapamantachá Judapa reynin Roboamman kutikunqaku, ñoqatañataqchá wañurachiwanqaku, nispa.

²⁸ Chaymi rey Jeroboamqa umachakuyta chaskiruspan, qorimanta iskay torillota ruwarachirqa, hinaspam runakunata nirqa: Israel runakuna, amañayá Jerusalén llaqtamanqa riychikñachu, kayqaya Egipto nacionmanta hurqomusuqnikichik diosnikichikqa, nispa.

²⁹ Hinaspam hukninta Bet-el llaqtapi churarqa, huknintañataqmi Dan llaqtapi.

³⁰ Chay ruwasqanwanmi runakunata huchallirachirqa, chaynapim llapa runakunaqa Bet-elman otaq Danman riqku yupaychamunankupaq.

³¹ Ruwachirqataqmi alto moqokunapi capillakunatapas, hinaspam mana Leviypa mirayninmanta kaq runakunata sacerdote kanankupaq churarurqa.

³² Chaymantam qallarichirqa pusaq kaq killapa chunka pichqayuq punchawninpi huk hatun fiestata, chay fiestataqa ruwachirqa Judá nacionpi fiestata hinam, hinaspam kikinpuni sacrificiokunata altarpi ofrecerqa, chaynatam Bet-el llaqtapi ruwarqa. Qorimanta ruwasqan torillokunapaqmi animalta wañuchispa lliwta kañarqa, hinaspam Bet-el llaqtapa moqonkunapi capillakuna ruwachisqanpi sacerdotekunata churarqa.

³³ Hinaspam Bet-el llaqtapi altar ruwachisqanpi pusaq kaq killapa chunka pichqayuq punchawninpi sacrificiokunata ofrecerqa, chay fiesta ruwachisqan killataqa akllarqa sonqonpa munasqanman hinam. Israelpa mirayninkunapaqmi hatun fiestata ruwachispan kikinpuni altarpi inciensota kañarqa.