1~Reyes 10 - CHUYA QELLQA La Biblia en Quechua de Ayacucho 2012

Rey Salomonman Sabá nacionpa reinan watukusqanmanta

¹ Tayta Diospa yachay qosqanwan Salomón ancha reqsisqa kasqanta uyariruspanmi Sabá nacionpa reinan ancha sasa tapukuykunawan pruebananpaq hamurqa.

² Hinaspam achka serviqninkunawan Jerusalén llaqtaman chayarurqa. Camellokunapim apamurqa miski asnaq perfumekunata, achka qorita hinaspa alhaja rumikunata. Salomonpa kasqanman chayaramuspanmi sonqonpi llapa ima tanteasqanta tapurqa.

³ Chaymi Salomón lliw tapukuyninta contestarqa, ima tapukuyninpas manam puchurqachu mana contestasqaqa.

⁴ Sabá nacionpa reinanmi qawaykurqa Salomonqa ancha yachayniyuq kasqanta hinaspa templo ruwachisqantapas,

⁵ mesanpi tukuy rikchaq mikuykunatapas, palacionpi yanapaqninkunapa imaynam kawsasqankutapas, criadonkunapa imaynam rikchaynintawan imaynam pachakusqankutapas, reyman copa serviqkunatapas, rikurqataqmi Tayta Diospa templonpi animalkunata ofrecesqankutapas. Chaykunawan admirakuspanmi

⁶ reyta nirqa: Cheqapmi kasqa ruwasqaykimanta hinaspa ancha yachayniyuq kasqaykimanta niwasqankuqa.

⁷ Niwasqankutaqa manam cheqappaqchu hapirqani ñawiykunawan kunan rikuykunaykama, imallaraqsi willawasqankupas. Yachaynikiwan tukuy imaykikunaqa uyarisqaymantapas aswanraqmi kasqa.

⁸ ¡Mayna kusisqam warmikikunaqa chaynataq ñawpaqnikipi tukuy tiempo yachayniki uyariq serviqnikikunaqa!

⁹ ¡Señorniki Tayta Diosyá bendecisqa kachun! ¡Paymi kuyasuspayki Israel nacionpi munaychakunaykipaq churasurqanki! ¡Tayta Diosqa Israel nacionta kuyasqanraykum rey kanaykipaq churaykusurqanki, derechonpi allinta kamachikunaykipaq! nispa.

¹⁰ Hinaspam Salomonman qorqa kimsa waranqa isqon pachak soqta chunka kilo qorita, miski asnaq achka perfumekunata chaynataq alhaja rumikunatapas. Sabá nación reinapa nana-nanaq miski asnaq perfumekuna apamusqanta hinaqa manam pipas Salomonmanqa apamurqakuchu.

¹¹ Ofir lawmanta qori apamuq rey Hirampa barconkunaqa apamurqakutaqmi sándalo sutiyuq achka-achka qerukunatawan alhaja rumikunatapas.

¹² Chay sándalo sutiyuq qerukunamantam rey Salomón ruwachirqa Tayta Diospa templonpi kaq gradaspi hapipakunata chaynataq kikinpa palacionpi kaq gradaspi hapipakunatapas. Takiqkunapaqwan tocaqkunapaqpas arpakunatawan salteriokunatam ruwachirqa. Chay sándalo qerukunataqa manam haykapipas apamurqakuchu chaypi apamusqankuta hinaqa.

¹³ Rey Salomonmi Sabá nación reinaman munasqanman hina tukuy ima mañakusqanta qoykurqa. Voluntadninman hinataqmi regalokunatapas qoykurqa, hinaptinmi reinaqa serviqninkunapiwan nacionninman kutikurqa.

Salomonpa kapuqninmantawan reqsisqa kasqanmanta

¹⁴ Salomonmi impuestomanta sapa wata iskay chunka iskayniyuq waranqa kilo qorita chaskiq.

¹⁵ Manam yupasqachu karqa negociantekunamanta, Arabia law reykunamanta chaynataq Israel nacionpi kamachikuqkunamanta impuesto chaskisqanqa.

¹⁶ Rey Salomonmi iskay pachak hatun escudokunata qorimanta ruwachirqa. Sapa escudotam ruwachirqa soqta kilo masnin qorimanta.

¹⁷ Hina qorimantataqmi ruwachirqa kimsa pachak escudokunatapas. Sapakamatam huk kilo parten masnin qorimanta ruwachirqa, hinaspam “Líbano monte” sutiyuq palacionpi churachirqa.

¹⁸ Tiyanan tronontapas marfilmantam ruwachirqa, hinaspam qoriwan llusichirqa.

¹⁹ Chay tronoqa soqta gradasniyuqmi karqa, wasanñataqmi karqa ruyru, kaylaw-waklaw waqtanpim karqa maki churanakuna, chaykunapa sapa waqtanpim sayachkaq leonkuna karqa.

²⁰ Chay soqta gradasninkunapa kaylaw-waklawninpipas chunka iskayniyuq leonkunam karqa, huk leonmi karqa sapa gradaspa waqtanpi. Chayna tiyanaqa manam may nacionpipas karqachu.

²¹ Rey Salomonpa tomanan vasokunapas qorimantam karqa, “Líbano monte” sutiyuq palacionpi serviciokunapas qorimantam karqa, qollqemantaqa manam imapas karqachu. Salomonpa tiemponpiqa manam qollqetaqa qawariqkupaschu.

²² Rey Salomonpa barconkunawan rey Hirampa barconkunam sapa kimsa watamanta qorita, qollqeta, marfilta, monokunata hinaspa pavo realkunata Tarsis lawmanta apamuqku.

²³ Chaynapim rey Salomonqa apu kayninpipas chaynataq yachayninpipas tukuy hinastinpi kaq reykunata masyarurqa.

²⁴ Llapallan runakunam munarqaku rey Salomón reqsiykuyta hinaspa Diospa yachay qosqan uyariykuyta.

²⁵ Llapallankum qorita, qollqeta serviciokunata, sumaq pachakunata, armakunata, miski asnaq perfumekunata, caballokunata hinaspa mulakunata regalanankupaq sapa wata apamuqku.

Rey Salomonpa negocio ruwasqanmanta

²⁶ Rey Salomonmi huñururqa carretakunatawan caballopi sillakuqkunata. Waranqa tawa pachaknin carretaku-nata hinaspa chunka iskayniyuq waran-qa caballopi sillakuqkunatam hatallir-qa, paykunatam carretakunapa kasqan llaqtakunaman pusachirqa chaynataq reyta Jerusalén llaqtapi waqaycha-nankupaqpas.

²⁷ Rey Salomonqa Jerusalén llaqtamanmi rumita hinaña qollqeta huñurachirqa, cedro sachakunapas Sefela orqopi purun higos sachakuna hinañam kakurqa.

²⁸ Rey Salomonpaqmi Egiptomantawan Ciliciamanta caballokunata rantimuspa apamuqku.

²⁹ Egiptomantam sapa carretata rantimuqku yaqa qanchis kilo qollqewan, caballotañataq yaqa iskay kilo qollqewan, paykunañataqmi heteokunapa hinaspa Siria nacionpa reyninkunaman rantikuqku.