1~Pedro 4 - CHUYA QELLQA La Biblia en Quechua de Ayacucho 2012

Yachay qowasqanchikman hina Diosta servinanchikmanta

¹ Imaynam Cristopas ñoqanchikrayku cuerponpi ñakarirqa, chaynayá qamkunapas pay hina ñakarinaykichikpaq listolla kaychik, pipas cuerponpi ñakariqqa huchamantam rakikurunña,

² chaynapi kawsanankama Diospa munasqanpi purispa, manaña runakunapa munasqanman hina kawsananpaq.

³ Qamkunaqa unay tiempoñam huchallikurqankichik Diospi mana iñiqkunapa munasqan-ta ruwaspaykichik, kawsaynikichikpi mana controlakuspa, mana allin munaykunapi, upyakuykunapi, fiesta ruwaykunapi hinaspa leypa contranpi millakuypaq idolokuna yupaychaykunapi purispaykichik.

⁴ Kunanñataqmi payku-napa ruwasqanman manaña huklla-wakuptikichik llakisqallaña kachkan-ku mana allin ruwayninkunapi mana-ña kuskanchakuptikichik, chaymi qam-kunamantaqa mana allintaña rimanku.

⁵ Paykunam ichaqa wañuqkunapas hinaspa kawsaqkunapas juzgananpaq listollaña kaq Diosman cuentata qonqaku.

⁶ Chaypaqmi Cristoqa wañusqakunamanpas allin noticiata willarqa, chaynapi aychankupi runakuna hina juzgasqa kachkaspapas espirituman hinaqa Diospaqña kawsanankupaq.

⁷ Tukuy imapa puchukayninmi hich-pallaña kachkan, chaynaqa rikchan-llayá kaychik, amataq Diosta mañakuytapas qonqaychikchu.

⁸ Tukuy imamantapas llalliriqtaqa kuyanakuychik-yá, kuyanakuyqa maynaña huchatapas pampachaykunmi.

⁹ Ama murmuranakuspa wasikichikpipas samaykachinakuychik.

¹⁰ Sapakamayá Diospa atiynin chaskisqaykichikman hina yanapanakuychik, Diospa tukuy rikchaq kuyaykuyninmanta nanachikuq allin mayordomokuna hina.

¹¹ Pipas rimaspaqa Diospa palabranman hinayá rimachun, pipas yanapaspaqa Diospa atiy qosqanman hinayá yana-pachun, tukuy ruwasqaykichikqa Jesu-cristopi Dios alabasqa kananpaqyá kachun. Diosqa atiyniyuq kasqanraykuyá wiña-wiñaypaq qapaqchasqa kachun. Amén.

Iñiqkunapa ñakarinanmanta

¹² Kuyasqay wawqe-panillaykuna, tukuy rikchaq sasachakuykuna hamusuptikichikqa amayá hukmanyaruychikchu yaqa mana allinpas kanman hinaqa.

¹³ Aswanqa Cristopa ñakariqmasin kasqaykichikraykuyá kusikuychik, chaynapi hanaq pachamanta suma-sumaq kanchariyninta qawaspa aswanraq kusikunaykichikpaq.

¹⁴ Mayna kusisqam kankichik, Jesu-cristorayku insultasuptikichikqa, qam-kunapim sumaq kanchariq Diospa Espiritun sapa punchaw kachkan.

¹⁵ Chay-naqa, hukkaqnikichik ñakarispaqa amayá ñakarichun runa wañuchiq hinachu, suwakuq hinachu, mana allinkuna ruwaq hinachu nitaq chaqwakuna ruwaq hinachu.

¹⁶ Sichum pipas Cristopi iñikuq kasqanmanta ñakarispaqa amayá penqakuchunchu, aswanqa Diostayá hatunchachun.

¹⁷ Ñam chayaramunña Diospi iñiqkunata juzganan punchaw, ñoqanchikwan juicio qallariptinqa, ¿imaynaraq kanqa Diospa allin notician mana kasukuqkunaqa?

¹⁸ Justo runapas ñakayta salvakuchkaptinqa, ¿imaynaraq kanqa Dios mana reqsiq runakunawan huchasapa runakunaqa?

¹⁹ Chaynaqa, Diospa munayninman hina ñakariqkunaqa allin kaqkunata ruwaspayá confiakuna unanchakuq Diospa makinman almankuta churachunku.