1~Pedro 3 - CHUYA QELLQA La Biblia en Quechua de Ayacucho 2012

Casadokunapa imaynam kawsananmanta

¹ Warmikuna, qamkunapas qosaykichiktayá kasuychik, chaynapim Diospa palabranpi mana iñiq qosakunapas mana rimapayachkasqalla allin kawsasqaykichikta qawaspa iñikunqaku.

² Respetowan allin kawsasqaykichikta qawaspankum iñikunqaku.

³ Qamkunapa sumaq kaynikichikqa kachun, amayá hawallaykichikpichu, chukchaykichik ñaqchapakuyllapichu, qorimanta alhajakunawan churakuyllapichu nitaq fino pachawan churakuyllapichu.

⁴ Aswanqa suma-sumaq kaynikichikqa sonqoykichikmantayá lloqsimuchun, chayna hawkalla kawsakuspam llampu sonqo espirituyuq kankichik, chayna kawsakuymi Diospa qayllanpiqa anchapas allin.

⁵ Ñawpaq tiempopi chuya warmikunapas chaynatam allichapakuqku, paykunaqa Diospi hapipakuspam qosankutapas kasukuqku.

⁶ Imaynam Sarapas Abrahamta kasukuq, hinaspam payta “señorniy” niq. Qamkunapas chaynata ruwaspaykichikqa paypa wawankuna hinam kankichik, manam imatapas manchakunkichikchu.

⁷ Qosakuna, qamkunapas warmiki-chikwanyá allinta kawsaychik, yachay-wanyá paykunawanqa kawsaychik, chaylla pakiruq vasota hinayá cuidaychik, hanaq pachapi herencia chaskiqmasikichikta hinayá nanachikuychik, chaynapi mañakusqaykichikta Dios uyarisunaykichikpaq.

Allinta ruwasqankurayku ñakariqkunamanta

⁸ Chaynaqa, llapallaykichikyá huk sonqolla kawsaychik, llakipayanakuspa, kuyanakuspa hinaspa lliwpaq allin runa kaychik.

⁹ Mana allinmantaqa amayá mana allinwanqa kutichiychu, kamisuqnikichiktapas amayá kamiychikchu, aswanqa bendicionwanyá kutichiychik. Diosqa bendicionta chaskinaykichikpaqmi qayasurqankichik.

¹⁰ Chuya Qellqapim kaynata nichkan: “Pipas vidanta kuyaq runaqa, pipas allin punchawkunata qaway munaqqa, mana allinmanta qallunta waqaychachun, llulla rimaymanta siminta wichqachun.

¹¹ Mana allinmanta ayqekuy, allin kaqkunata ruway, hawkayayta maskaspa chayllata qatiy.

¹² Señorqa allin ruwaq runakunataqa waqaychanmi, paykunapa mañakuyninkutapas uyarinmi, payqa mana allin ruwaqkunapa contranpim kachkan”, nispa.

¹³ ¿Pitaq ima mana allintapas ruwa-sunkichikman sichum allinta ruwachkaptikichikqa?

¹⁴ Allin ruwasqaykichikmanta ñakarispaqa mayna kusisqam kankichik, amayá pitapas manchakuychikchu nitaq hukmanyaychikchu.

¹⁵ Aswanqa Señorninchik Cristotayá sonqoykichikpi hatunchaychik, hinaspayá tukuy tiempo chaylla kaychik imam iñisqaykichikmanta haykam tapusuqnikichikta tupaqninpi kutichikunaykichikpaq, chaytaqa uchuy-chakuspa hinaspa respetowan ruwaychik.

¹⁶ Ichaqa llampu sonqowan hinaspa respetowan ruwaychik, Cristopi iñiqkuna hina allinta kawsaychik, chaynapi allin kawsasqaykichikmanta mana allin rimaqkuna kikinku penqaypi kanankupaq.

¹⁷ Dios munaptinqa allin ruwasqaykichikmanta ñakariyqa allinmi, mana allin ruwasqaykichikmanta ñakariymi ichaqa mana allinchu.

¹⁸ Chaynataqmi Cristopas huk kutillata huchanchikkunamanta ñakarirqa. Payqa mana huchayuqmi karqa, ichaqa mana allin runakunata Diosman pusa-wananchikpaqmi ñakarirqa. Aychapi wañukuchkaspapas espiritupa yana-pakuyninwanmi kawsarimurqa.

¹⁹ Espi-ritupi rispanmi presochasqa espiritukunaman willamurqa.

²⁰ Paykunam ñawpaq tiempokunapi mana kasukurqakuchu, arcata Noé ruwanankama pacienciawan Dios suyachkaptinpas. Arcapiqa pusaq runakunallam yakupi wañunankumanta salvakurqaku.

²¹ Chay yakum rikchakun bautizakuna yakuman, chaywanmi ñoqanchikpas salvasqa kanchik. Bautis-moqa manam cuerponchiktaqa mayllanchu, aswanqa chuya sonqoyuq kayta Diosmanta mañakuymi, hinaspam Jesucristopa kawsarimusqanwan salvasqa kanchik.

²² Paymi hanaq pachaman wicharispan Diospa alleqninpi kachkan, paytam kasunku angelkunapas, autoridadkunapas chaynataq atiyniyuqkunapas.