1~Pedro 1 - CHUYA QELLQA La Biblia en Quechua de Ayacucho 2012

Cartapa qallariyninmanta

¹ Jesucristopa apostolnin ñoqa Pedrom qellqamuykichik, Ponto lawpi, Galacia lawpi, Capadocia lawpi, Asia lawpi hinaspa Bitinia lawpi cheqesqakunaman.

² Qamkunataqa Dios Taytam yachayninman hina ñawpaqmantaraq akllasurqankichik. Espiritunwanmi chuyanchasurqankichik kasukuq kanaykichikpaq hinaspa Jesucristopa yawarninwan mayllasqa kanaykichikpaq. Diospa kuyakuyninwan hinaspa hawkayayninyá qamkunapi llimparichun.

Confianzawan kawsaymanta

³ Señorninchik Jesucristopa Taytan Diostayá qapaqchasunchik, paymi hatun kuyapayakuyninman hina Jesucristopa kawsarimusqanwan musoqmanta nacechiwarqanchik. Chay confianzawan suyaspam kawsachkanchik.

⁴ Chaynapim qamkunapas chaskinkichik Diospa hanaq pachapi waqaychasqan herenciata, chayqa mana tukuqmi, mana qachachakuqmi, mana chakiqmi.

⁵ Qamkunaqa Diospi iñiyniyuq kasqaykichikraykum, payqa atiyninwan waqaychasunkichik salvación haypanaykichikpaq, chayqa allichasqañam kachkan tukupay punchawpi reqsisqa kananpaq.

⁶ Chayraykum qamkunaqa llumpay kusisqa kachkankichik pisi tiempollapas achka sasachakuykunata ñakarinay-chik kachkaptinpas.

⁷ Qoripa allin kas-qantapas otaq mana allin kasqantapas yachanapaqqa ninapim chulluchinku, chaynam iñiynikichikpas pruebasqa kanqa. Tukuruqlla qorimantapas chay iñiynikichikmi aswanqa valen. Jesucristo rikurimuptinmi chay iñiynikichikqa alabasqa, qapaqchasqa hinaspa hatunchasqa kanqa.

⁸ Jesucristotaqa mana rikuchkaspapas kuyankichikmi, creenkichiktaqmi mana rikuchkaspapas, payta hatunchaspam llumpa-llumpayta kusikunkichik, chaymantaqa manam imayna rimariytapas atichwanchu.

⁹ Iñisqaykichikraykullam almaykichikpa salvacionnintapas chas-kinkichik.

¹⁰ Ñawpaq tiempokunapim profetakuna allinta estudiarqaku hinaspa kay salvacionmanta sumaqta tapukachakurqaku, hinaspam imayna Diospa kuyakuyninmanta willakurqaku.

¹¹ Cristopa Espiritunmi profetakunaman ñawpaqmantaraq yacha-chirqa Cristopa ñakarinanmanta hinaspa chaykuna pasaruptin hatunchasqa kananmanta. Paykunam yachaykuyta munarqaku Cristopa imaynam ñakarinanmanta hinaspa chaykunapa qepanta hatun kusikuy hamunanmanta.

¹² Diosmi paykunaman nirqa chay willakusqankuqa mana kikillankupaqchu, aswanqa ñoqanchikpaqwan kasqanmanta. Kunanñataqmi salvacionmanta willakuqkunaqa willa-suchkankichik hanaq pachamanta hamuq Chuya Espiritupa yanapakuy-ninwan. Chaykunataqa angelkunapas yachaykuytam munanku.

Diosllapaqña kawsakuymanta

¹³ Chaynaqa, listolla kaspayá imam ruwanaykichikmanta sumaqta yuyaymanaychik, rikchan-rikchanllayá kaychik Jesucristo rikurimuptin Diospa kuyakuyninman hina imam qosunaykichikta tukuy sonqoykichikwan suyaspa.

¹⁴ Kasukuq churinkuna hinayá kawsaychik, amañayá Diosta manaraq reqsispa ñawpaq vidaykichikpi hinaqa kawsaychikchu.

¹⁵ Aswanqa, imaynam qayasuqnikichik Diospas chuya, chaynayá qamkunapas tukuy kawsaynikichikpi chuya kaychik.

¹⁶ Qellqasqam kachkan: “Chuyayá kaychik, imaynam ñoqapas chuya kasqayrayku”, niq.

¹⁷ Sichum “Taytáy” ninkichik pimanpas mana sayapakuspa runakunapa ruwayninman hina juzgaq Diosta, hinaspaqa tukuy tiempo kasukuspayá huklaw llaqtayuq hina kawsaychik.

¹⁸ Diosmi ñawpaq taytaykichikpa mana allin costumbrenkuna chaskisqaykichikmanta salvasurqankichik. Yachasqaykichikpi hinapas kay salvacionpa preciontaqa manam pipas pagarqa tukuruqlla qoriwanchu nitaq qollqewanchu,

¹⁹ aswanqa Cristom pagarqa precioyuq chuyay-chuyay yawarninwan, chayqa karqa sanoy-sanoy carneropa yawarnin hinam.

²⁰ Chaynata wañunanpaqqa manaraqpas kay pacha unanchasqa kachkaptinmi citasqaña karqa, ichaqa kay tukupay tiempokunapim kuyasusqaykichikrayku rikurimurqa.

²¹ Señorninchik Jesucristontakamam Diospiqa iñinkichik, paymi wañuqkuna ukumanta Cristota kawsarichimuspan hatuncharqa, chaynataqa ruwarqa iñiynikichik hinaspa imapas suyasqaykichik Diosllapiña kanapaqmi.

²² Kunanqa Espirituntakama cheqap kaqta kasukuspam, almaykichiktapas chuyancharunkichikña wawqe-panin-chikkunawan kuyanakunaykichikpaq. Chaynaqa, qamkunapurayá chuya sonqoykichikwan hinaspa tukuy kallpaykichikwan kuyanakuychik.

²³ Qamkunaqa musoqmantam nacerqankichik, ichaqa manam wañuq tayta-mamamantachu, aswanqa Diospa kawsaq hinaspa takyaq palabranmantam.

²⁴ Chuya Qellqam kaynata nin: “Llapa runakunaqa qora hinallam, kuyayllapaq kayninkupas qorapa waytan hinallam. Qora chakiruptinqa waytanpas wichirunmi.

²⁵ Señorpa palabranmi ichaqa wiña-wiñaypaq takyan”, nispa. Chay palabranqa allin noticiam, qamkunamanmi willasqa karqa.