1~Juan 5 - CHUYA QELLQA La Biblia en Quechua de Ayacucho 2012

Kay pachapi mana allin kaqkuna vencenamanta

¹ Jesusqa Cristo kasqanta creeqkunaqa Diospa churinñam, haykam taytan kuyaqkunaqa, taytanpa churinkunatapas kuyananmi.

² Kaywanmi yachanchik Diospa churinkuna kuyasqanchikta, Diosta kuyaspaqa kamachikuyninkunatam waqaychankichik.

³ Diosta kuyayqa kamachikuyninkuna kasukuymi, kamachikuyninkunaqa manam sasa apaychu,

⁴ haykam Diosmanta naceqkunaqa kay pachapi mana allin kaqkunataqa vencerunñam. Iñiyninchikmi kay pachapi mana allin kaqkunata vencerachiwanchik.

⁵ Jesusqa Diospa Churin kasqanta creeqkunallam kay pachapi mana allin kaqkunataqa vencenku.

Diospa churinmanta

⁶ Jesucristo kay pachaman hamuspanqa yakuwanmi bautizachikurqa hinaspam wañuspan yawarninta chaqchurqa. Jesucristo pim kasqantaqa yachanchik manam bautizakusqallanwanchu, aswanqa wañusqanpiwanmi. Chaytaqa kikin Espiritum yachachiwanchik. Payqa manam llullakunchu.

⁷ Kay kimsankum testigo kanku. [Hanaq pachapi Dios Tayta, Dios Churi, Dios Chuya Espíritu, kay kimsanmi huklla kanku].

⁸ Espíritu, yaku hinaspa yawarpiwan. Chay kimsanmi huklla kanku.

⁹ Sichum runakunapa imapas willakusqankuta allinpaq hapispaqa, aswanraqchiki Diospa willawasqanchiktaqa allinpaq hapichwan. Paymi nirqa: “Jesusqa Churiymi”, nispa.

¹⁰ Pipas Diospa Churinman iñiqqa chay nisqantam tukuy sonqonwan chaskin. Pipas Diospa nisqanta mana creeqmi ichaqa Diosta llullapaq hapichkan.

¹¹ Diospa nisqanqa kaymi: Diosmi wiñay kawsayta qowarqanchik, chay wiñay kawsayqa tarikun Churin Jesucristollapim.

¹² Pipapas sonqonpi Diospa Churin Jesucristo kawsaptinqa wiñaypaqñam kawsakuchkan, sichum pipapas sonqonpi Diospa Churin mana kawsaptinqa manam kawsanchu.

Cartapa tukuyninmanta

¹³ Diospa Churinpi iñikuqkunamanmi kaykunata qellqamuykichik, chaynapi wiñay kawsayniyuqña kasqay-kichikta yachanaykichikpaq.

¹⁴ Dios-pi confiakuspam yachanchik: Paypa munasqanman hina mañakuptinchikqa uyariwasqanchikta.

¹⁵ Dios uyariwas-qanchikta yachaspaqa, yachanchiktaqmi mañakusqanchikqa ruwasqaña kasqantapas.

¹⁶ Sichum pipas rikunman wañuyman mana apakuq huchapi iñiqmasin kasqanta, hinaspaqa paypaqmi Diosta mañapunan, sichum chay huchallikusqan wañuyman mana apakuq kaptinqa Diosmi kawsachinqa. Kantaqmi wañuyman apakuq huchapas, chayna huchapi kaqpaqqa manam mañapuychikyá nikichikchu.

¹⁷ Tukuy mana allin ruwaykunaqa hucham, ichaqa kanmi wañuyman mana apakuq huchakuna.

¹⁸ Yachanchikmi haykam Diosmanta naceqkunaqa manaña huchallikuq kasqanta, Diospa Churin Jesucristo waqaychaptinmi diablopas manaña imananchu.

¹⁹ Yachanchikmi Diospaña kasqanchikta chaynataq kay pachapi kaqkunaqa diablopa makinpiña kasqantapas.

²⁰ Yachanchiktaqmi Diospa Churin hamusqantapas, paymi yachayta qowarqanchik cheqap Diosta reqsinanchikpaq. Cheqap kaq Diospa ChurinJesucristowanmi hukllawas-qa kachkanchik. Payqa cheqap Diosmi hinaspa wiñay kawsaymi.

²¹ Churillaykuna, idolokunamantaqa karun-chakuychikyá. Amén.