1~Crónicas 4 - CHUYA QELLQA La Biblia en Quechua de Ayacucho 2012

Judapa mirayninkunamanta

¹ Judapa churinkunam kaykuna: Fares, Hezrón, Carmi, Hur hinaspa Sobal.

² Sobalpa churin Reaiapa churinmi karqa Jahat. Jahatpa churinkunam karqa Ahumai hinaspa Lahad. Paykunam karqaku Zora castakuna.

³ Etampa churinkunam karqa: Jezreel, Isma hinaspa Ibdas. Paykunapa paninkum karqa Haze-lelponi.

⁴ Belenpa taytan Efratapa piwi churin Hurpa churinkunam karqa: Gedorpa taytan Penuel hinaspa Husapa taytan Ezer.

⁵ Tecoapa taytan Asurpa warminkunam karqa Hela hinaspa Naara.

⁶ Naarapa wawankunam karqa: Ahuzam, Hefer, Temeni hinaspa Ahastari.

⁷ Helapa wawankunam karqa: Zeret, Jezoar hinaspa Etnán.

⁸ Cospa churinkunam karqa: Anub, Zobeba hinaspa Harumpa churin Aharhelpa ayllunkuna.

⁹ Jabesqa wawqenkunamantapas ancha reqsisqam karqa. Mamanmi Jabeswan suticharqa: “Llumpay nanaywan wachakusqaymi”, nispan.

¹⁰ Jabesmi Israelpa Diosninta mañakuspa nirqa: “Ruegakuykim bendeciykuwanaykipaq, hatun allpata qoykuwanaykipaq, yanapaykuwanaykipaq, mana allinmanta libraykuwanaykipaq, chaynapi mana ñakarinaypaq”, nispa. Chaymi mañakusqanta Dios qoykurqa.

¹¹ Suahpa wawqen Quelubpa churinmi karqa Mehir, paymi karqa Estonpa taytan.

¹² Estonpa churinkunam karqa: Bet-rafa, Paseah hinaspa Nahas llaqtapa taytan Tehina. Paykunam karqaku Reca lawpi yachaq runakuna.

¹³ Cenazpa churinkunam karqa: Otoniel hinaspa Seraías. Otonielpa churinkunam karqa Hatat,

¹⁴ hinaspa Ofrapa taytan Meonotai. Seraiaspa churinmi karqa Joab, paymi karqa Carisim qechwapi yachaqkunapa taytan. Chaypi yachaqkunaqa artesanokunam karqaku.

¹⁵ Jefonepa churin Calebpa churinkunam karqa: Iru, Ela hinaspa Naam. Elapa churinmi karqa Cenaz.

¹⁶ Jehalelelpa churinkunam karqa: Zif, Zifa, Tirías hinaspa Asareel.

¹⁷ Esdraspa churinkunam karqa: Jeter, Mered, Efer hinaspa Jalón. Meredmi casarakurqa Faraonpa churin Bitiawan. Bitiam wachakurqa: Mariata, Samaita hinaspa Estemoapa taytan Isbata.

¹⁸ Meredpa huknin warmin Jehudaiam wachakurqa Gedorpa taytan Jeredta, Socopa taytan Heberta hinaspa Zanoapa taytan Jecutielta.

¹⁹ Hodiaspa warminmi karqa Nahampa panin, paymi wachakurqa Garmit casta Keilapa taytanta hinaspa Maacat casta Estemoata.

²⁰ Simonpa churinkunam karqa: Amnón, Rina, Ben-hanán hinaspa Tilón. Isipa churinkunam karqa: Zohet hinaspa Benzohet.

²¹ Judapa churin Selapa churinkunam karqa: Lecapa taytan Er, Maresapa taytan Laada, Bet-asbea lawpi lino awaqkunapa castankuna,

²² Joacim, Cozeba lawpi yachaqkuna, Joás hinaspa Saraf. Paykunam Moab warmikunawan casarakururqaku hinaspam Belenman kutikurqaku, ñawpaq qellqakunapa nisqanman hina.

²³ Paykunaqa alfarerokunam karqaku, Netaim llaqtapiwan Gedera llaqtapim yacharqaku, hinaspam reyta servirqaku.

Simeonpa mirayninkunamanta

²⁴ Simeonpa churinkunam karqa: Nemuel, Jamín, Jarib, Zera hinaspa Saúl.

²⁵ Saulpa churinmi karqa Salum. Salumpa churinmi karqa Mibsam, Mibsampañataqmi Misma.

²⁶ Mismapa churinmi karqa Hamuel, Hamuelpañataqmi Zacur, Zacurpañataqmi Simei.

²⁷ Simeipam karqa chunka soqtayuq qari churinkuna, warmi churinkunañataqmi soqta. Simeipa qari churinkunaqa mana ancha mirayniyuqmi karqaku, chayraykum Judapa churinkuna hinaqa mana mirarqakuchu.

²⁸ Paykunam yacharqaku Beersebapi, Moladapi, Hazar-sualpi,

²⁹ Bilha, Ezempi, Toladpi,

³⁰ Betuelpi, Hormapi, Siclagpi,

³¹ Bet-marcabotpi, Hazar-susimpi, Bet-biraipi hinaspa Saaraimpi. Kaykunam paykunapa llaqtanku karqa Davidpa munaychakusqankama.

³² Taksa llaqtankunañataqmi karqa pichqa: Etam, Aín, Rimón, Toquén hinaspa Asán.

³³ Chaynallataq chay hatun llaqtakunapa muyuriqninpi kaq taksa llaqtachakunapas Baalat llaqtakama. Chaykunam karqa paykunapa yachanan llaqtakuna, chaykunataqmi mirayninkunapas.

³⁴ Mesobab, Jamlec, Amasiaspa churin Josías,

³⁵ Joel, Seraiaspa willkan hinaspa Josibiaspa churin Jehú. Seraiasqa karqa Asielpa churinmi;

³⁶ Elioenai, Jaacoba, Jesohaía, Asaías, Adiel, Jesimiel, Benaía,

³⁷ Alonpa willkan hinaspa Sifipa churin Ziza. Alonqa karqa Semaiaspa churin Simripa willkanmi; Simriñataqmi karqa Jedaiaspa taytan.

³⁸ Paykunam ayllunkupi kamachikuqkuna, paykunam ayllunkuman hina llumpayta mirarurqaku.

³⁹ Paykunam animalninkupaq pastota maskaspanku chayarurqaku Gedor llaqtaman yaykunakama. Gedorqa qechwapa intipa qespimunan lawninpim kachkan.

⁴⁰ Chaypim sumaq pastokunata, hatun pampakunata hinaspa hawka yachakunankupaq allpata tarirurqaku. Ñawpaqtaqa Campa mirayninkunam chaypi yacharqaku.

⁴¹ Ichaqa Judá nacionpi rey Ezequías munaychakuchkaptinmi, chay listasqa runakuna hamuruspanku chaypi ñawpaq yachaqkunata atacarurqaku, carpankunatawan chukllankunatapas pasaypaqta tuñirachispankum paykunaña chaypi yachachkanku, animalninkupaq sumaq pastokuna kasqanrayku.

⁴² Chaynallataqmi Simeonpa mirayninkunamanta pichqa pachak soldadokunapas Seir orqoman rirqaku, Isipa churin Pelatiasta, Neariasta, Refaiasta hinaspa Uzielta capitanninkupaq churakuykuspanku.

⁴³ Paykunam wañurachirqaku Amalec castakunamanta puchuqkunata. Hinaspam chaypi kunan punchawkama yachachkanku.