1~Crónicas 29 - CHUYA QELLQA La Biblia en Quechua de Ayacucho 2012

¹ Chaymantam llapallan huñunasqa runakunata rey David nirqa: Diosmi templonta ruwananpaq churiy Salomonta akllaykun, payqa warmallaraqmi, yuyayninpas manam huntasqaraqchu, ruwananmi ichaqa ancha hatun; payqa manam runapa wasintachu ruwanqa aswanqa Tayta Diospa wasintam.

² Kallpanchakuspaymi Diosniypa templonta ruwachinaypaq alistaruni: Qorita, qollqeta, bronceta, fierrota, qerukunata, chaykunawan templota hinaspa servicionkunata ruwanankupaq. Alistaru-nitaqmi: Ónice rumita, yana rumita, rikchaqmana colorniyuq rumikunata, kuyayllapaq rumikunatapas, mármol rumikunatapas achkallatañam alistaruni.

³ Tukuy ima alistasqaymantapas, Diosniypa templonta kuyasqayraykum kikiypa kaqmantapas qoni: Qorita, qollqeta,

⁴ Ofir lawmanta apachimusqay suma-sumaq qoritapas pachak waranqa kilota, suma-sumaq chuyanchasqa qollqetapas iskay pachak kimsa chunka waranqa kilota, chay qollqewan templopa perqankunata llusinankupaq.

⁵ Qoritam qoni qorimanta kaqkunapaq, qollqetañataqmi qollqemanta kaqkunapaq, chaykunawan templopa servicionkunata artesanokuna ruwanankupaq. Chaynaqa, ¿pitaq kunan qamkunamanta Tayta Diospa templonpaq ofrenda qoykuyta munanman? nispa.

⁶ Hinaptinmi sapa ayllupi kamachikuqkuna, Israelpa mirayninkunapi kamachikuqkuna, waranqa soldadokunapi, pachak soldadokunapi kamachikuqkuna hinaspa reypa kapuqninkunata nanachikuqkunapas ofrendankuta qorqaku,

⁷ Tayta Diospa templonta ruwanankupaq pachak soqta chunka pichqayuq waranqa kilo qorita, chaymanmi yaparqaku iskay pachak chunka soqtayuq waranqan kilo qoritaraq. Qorqakutaqmi kimsa pachak kimsa chunka waranqa kilo qollqetapas, soqta pachak waranqa kilo broncetapas hinaspa kimsa wara-waranqa kimsa pachak waranqa kilo fierrotapas.

⁸ Alhaja rumiyuq kaqkunapas, ruminkutam Tayta Diospa templonpaq Gersonpa miraynin Jehielman qorqaku.

⁹ Chay qosqankuwanmi llapa runakuna kusikurqaku, tukuy sonqomanta Tayta Diosman qosqankurayku, rey Davidpas anchatam kusikurqa.

¹⁰ Chayraykum llapallan runakunapa qayllanpi Tayta Diosta yupaychaspan David nirqa: Taytanchik Israelpa Diosninyá wiña-wiñaypaq hatunchasqa kachun.

¹¹ Dios Taytalláy, mayna hatunmi qamqa kanki, mayna hatunmi atiynikipas, mayna sumaqmi kanki, mayna kuyayllapaqmi kanki, mayna munayniyuqmi kanki; cielopi kaqkunapas qamllapam, kay pachapi kaqkunpas qamllapam. Dios Taytalláy, qamllam tukuy imapi munaychakuqqa kanki.

¹² Apuyaywan ancha reqsisqa kaypas qanmantam hamun, kallpapas atiypas makikipim kachkan, atiypas ancha reqsisqa kaypas qamllamantam hamun.

¹³ Dios Taytallayku, chayraykum graciasta qospa suma-sumaq sutikita yupaychamuniku.

¹⁴ Ichaqa, ¿pitaq ñoqaqa karqani, pitaq llaqtaypas, chaynapi tukuy kaykunata qanman ofrecemunaykupaqqa? Tukuy imapas qamllapam, qanmanta chaskisqallaykutam qoykikupas.

¹⁵ Qayllaykipiqa ñawpaq taytayku hina huklaw llaqtayuqllam kaniku, kay pachapiqa kawsayniykupas llantuy hina chinkaruqllam.

¹⁶ Dios Taytallayku, wasikita ruwanaykupaq tukuy kaykuna qosqaykuqa qampam, qamllamantam hamun.

¹⁷ Dios Taytalláy, yachanim runakunapa sonqonta qawasqaykita, sonqomanta ruwaqkunatam qamqa kuyanki, chayraykum allin sonqoywan tukuy kaykunata ofrecemuyki. Kunanmi huñunasqa llaqtaykita qawaykuni, tukuy sonqomanta kusikuywan ofrendanku qosusqaykita.

¹⁸ Dios Taytalláy, Abrahampa, Isaacpa hinaspa Jacobpa Diosnin, kay llaqtaykipa kuyakuynintayá hina kaynallata wiñaypaq waqaychay, tukuy sonqonkuwantaqyá qamtapas kuyasunki.

¹⁹ Churiy Salomonmanpas allin sonqotayá qoykuy, chaynapi kamachikuynikikunata decretoykikunata, yachachikuynikikunata kasukuspan kay alistasqay kaqkunawan temploykita ruwananpaq, nispa.

²⁰ Chaymantam huñunasqa runakunata David nirqa: Kunanyá Tayta Diosta yupaychaychik, nispa. Hinaptinmi llapallan huñunasqa runakuna ñawpaq taytankupa yupaychasqan Tayta Diospa ñawpaqninpi hinaspa reypa ñawpaqninpi qonqoranpa kumuykuspa yupaycharqaku.

²¹ Paqarinnintin punchawñataqmi lliw kañana sacrificiokunata Tayta Diosman ofrecerqaku: Waranqa malta torokunata, waranqa carnerokunata, waranqa malta carnerokunatapas vino ofrendakunatawan kuskata. Israelpa mirayninkunapa partenmantapas achka-achka sacrificiokunatam ofrecerqaku.

²² Chay punchawmi kusikuyllawanña Tayta Diospa qayllanpi mikurqaku hinaspa tomarqaku, hinaspam Israelpi rey kananpaq Davidpa churin Salomonta yapamanta churarqaku, hinaspam Tayta Diospa qayllanpi paykunapi munaychakuq kananpaq aceitewan tallirqaku. Sadoctapas sacerdote kananpaqmi aceitewan tallirqaku.

²³ Chaynapim Salomonqa taytan Davidpa rantinpi munaychakunanpaq Tayta Diospa trononpi tiyaykurqa, hinaspam ancha bendecisqa karqa. Israelpa mirayninkunapas paytam kasurqaku.

²⁴ Llapa kamachikuqkunawan allinnin qari-qari soldadokunapas hinaspa Davidpa lliw churinkunapas, llapallankum rey Salomonta munaychakuyninpi yanaparqaku.

²⁵ Tayta Diosmi Israel runakunapa qayllanpi rey Salomonta llumpayta hatuncharqa, munaychakuynintapas ancha reqsisqatam ruwarqa, payta hinaqa manam mayqan reytapas Israel nacionpiqa hatuncharqachu.

Davidpa wañukusqanmanta

²⁶ Isaipa churin Davidmi lliw Israel nacionpi munaychakurqa.

²⁷ Qanchis watam Hebrón llaqtapi munaychakurqa, kimsa chunka kimsayuq watañataqmi Jerusalén llaqtapi. Israel nacionpiqa tawa chunka watam munaychakurqa.

²⁸ Payqa ancha yuyaqñam wañukurqa, apu-apu hinaspa ancha reqsisqam karqa. Wañukuptinmi paypa rantinpi churin Salomonña munaychakurqa.

²⁹ Rey Davidpa imaynam kawsasqanwan imakunam ruwasqanpas qallariyninmanta tukupayninkamam profeta Samuelpa libronpi, profeta Natanpa libronpi hinaspa profeta Gadpa libronpi qellqasqa kachkan.

³⁰ Imayna munaychakusqanpas, atiyninpas chaynataq payta, Israel nacionta wakin nacionkunata imakunam pasasqanpas chay librokunapim qellqasqa kachkan.