1~Crónicas 28 - CHUYA QELLQA La Biblia en Quechua de Ayacucho 2012

Davidpa rantinpi Salomón munaychakusqanmanta

¹ Davidmi Israelpi kamachikuqkunata Jerusalén llaqtapi huñurachirqa: Sapa ayllupi kamachi-kuqkunata, reyta serviq tropakunapa kamachiqninkunata, waranqa solda-dokunapi, pachak soldadokunapi ka-machikuqkunata, reypa chakrankunawan chaynataq animalninkuwan nana-chikuqkunata, churinkunamanta nanachi-kuqkunata, ancha reqsisqa runakunata hinaspa ancha reqsisqa capitankunatapas.

² Chaymi sayariykuspan rey David nirqa: Kuyasqay llaqtalláy, wawqellaykuna uyariwaychik: Ñoqam Tayta Diospa pacto ruwasqan Arcata churanapaq templo ruwayta munarqani, chaymanta Tayta Dios munaychakunanpaq. Chaypaqmi tukuy imakunatapas alistarurqaniña.

³ Ichaqa Diosmi niwarqa: “Manam qamchu temploytaqa ruwapuwanki, qamqa guerrapi peleaq hinaspa runapa yawarnin chaqchuqmi kanki”, nispa.

⁴ Chaywanpas Tayta Diosmi, Israelpa Diosninmi taytaypa ayllun ukumanta akllaykuwarqa Israelpi wiñaypaq rey kanaypaq. Paymi Judá aylluta kamachikunanpaq akllarqa, Judá ayllumantañataqmi ñoqapa aylluyta akllaykurqa, aylluymantañataqmi ñoqata akllaykuwarqa Israel nacionpi rey kanaypaq.

⁵ Tayta Diosmi churikunata achkallataña qoykuwan, paykunamantam churiy Salomonta Tayta Dios akllaykun, chaynapi Tayta Diospa munaychakusqan Israel nacionpi rey kananpaq.

⁶ Tayta Diosmi niwarqa: “Churiki Salomonmi temploytawan patioykunataqa ruwapuwanqa, paytam churiypaq akllakuni, ñoqañataqmi paypa taytan kasaq.

⁷ Paypa munaychakuynintam wiñaypaq takyachisaq, chaynataqa ruwasaq kamachikuyniykunata kunankama kasukusqanta hina kallpanchakuspan kasukuptinmi”, nispa.

⁸ Chaynaqa, kunanyá, Tayta Diospa huñunasqa Israel llaqtanpa qayllanpi, uyariwaqninchik Tayta Diospa qayllanpi, tukuy sonqoykichikwan yupaychasqanchik Tayta Diospa kamachikuyninkunata kasukuychik, chaynapim kay sumaq allpa hina qamkunallapa kanqa, hinaptinmi churikichikkunamanpas herenciata saqenkichik.

⁹ Kuyasqay churiy Salomón, qamñataqyá kay taytaykipa Diosninta reqsikuspayki tukuy sonqoykiwan hinaspa tukuy kallpaykiwan serviy. Tayta Diosqa llapa runakunapa sonqontam qawachkan, reqsintaqmi runapa imam munasqanta hinaspa tanteasqantapas. Diosta maskaspaykiqa tarinkim, payta saqeruptikim ichaqa paypas wiñaypaqña saqerusunki.

¹⁰ Amam qonqankichu, kunanmi Tayta Dios akllaykusunki santuarionpaq templota ruwanaykipaq. ¡Chaynaqa, kallpanchakuspaykiyá ruway! nispa.

¹¹ Chaykunata niykuspanmi templopa, corredorninkunapa, punkunkunapa, almacén cuartokunapa, altosninpi cuartokunapa, uku lawpi kaq cuartokunapa hinaspa hucha pampachana cuartopa planonkunata churin Salomonman David qoykurqa.

¹² Qorqataqmi templopa pationkunapi tukuy ima ruwayta tanteasqanpa planonkunatapas, chaynallataq patiokunapa muyuriqninpi wasikunapa, Tayta Diospa kapuqninkunata waqaychana cuartokunapa, Diospaq sapaqchasqa ofrendakunata waqaychana cuartokunapa,

¹³ templopa servicionkunata waqaychana cuartokunapa hinaspa sacerdotekunawan levitakuna templopi servikunankupaq turnonpi hamuspa puñunanku cuartonkunapa planonkunatapas.

¹⁴ Qorqataqmi qoritapas qollqetapas achkanpi, chaykunawan templopa serviciokunata qorimanta qollqemanta ruwachinanpaq.

¹⁵ Candelabrokuna-paqwan mecheronkunapaqpas llasayninman hinam sapakamapaq qoritawan qollqetam qorqa.

¹⁶ Qorqataqmi qorimanta qollqemanta mesakunapaqpas, patanasqa tantanta churanankupaq.

¹⁷ Qorqataqmi trinchekunata, aysakukunata, tazonkunata ruwachinanpaqpas, sapakamapa haykam llasasqanman hina.

¹⁸ Qorqataqmi incienso kañananku altarpaqpas, qorimanta querubinkunapa carretanpaqpas. Chay querubinkunam Tayta Diospa pacto ruwasqan Arcata raprankuta mastarispa tapaqku.

¹⁹ Tukuy chaykunam qellqasqa karqa Davidman Tayta Diospa qawachisqanman hina, chaypim nirqa tukuy imatapas planoman hina ruwananpaq.

²⁰ Salomontaqa nirqataqmi: ¡Kallpanchakuspayá ruway, amayá hukmanyaruychu nitaq manchakuychu, Señorninchik Tayta Diosmi qanwan kachkan! Payqa manam saqesunkichu nitaqmi karunchakunqachu Tayta Diospa templonta chaynataq llapa servicionkunatapas ruway tukunaykikama.

²¹ Kayqaya llapa sacerdotekunawan levitakunapas Tayta Diospa templonpi servikunankupaq tupachisqaña kachkanku, paykunam ruway tukunaykikama yanapasunki; kikinkumanta ofrecekuqkunapas yanapasunkim, kachkanmi tukuy ima ruwayta yachaq maestrokunapas. Llapa kamachikuqkunawan llapa runakunapas makillaykipim kachkanku, nispa.