1~Crónicas 27 - CHUYA QELLQA La Biblia en Quechua de Ayacucho 2012

Davidpa tropankunapa capintanninkunamanta

¹ Kaykunam Israelpa mirayninkunamanta ayllukunapi kamachikuqkuna, waranqapi, pachakpi kamachikuqkuna hinaspa llapa tropakunapi kamachikuqkuna karqaku. Paykunam turnonpi watantin huk killanka reyta servirqaku, sapa turnopaqmi rakisqa karqaku iskay chunka tawayuq waranqa soldadokuna.

² Punta kaq killapi reyta serviq tropakunapa kamachiqninmi karqa Zabdielpa churin Jasobeam.

³ Jasobeamqa karqa Farespa mirayninmi, paymi kamachirqa punta kaq killapi serviq tropakunapa llapallan kamachiqninkunata.

⁴ Iskay kaq killapi reyta serviq tropakunapa kamachiqninmi karqa Ahohipa miraynin Dodai, yanapaqninñataqmi karqa Miclot.

⁵ Kimsa kaq killapi reyta serviq tropakunapa kamachiqninmi karqa sumo sacerdote Joiadapa churin Benaía.

⁶ Benaiaqa karqa kimsa chunka allinnin qari-qari soldadokunapa hukninmi. Chay kamachisqan tropakunapa hukninmi karqa churin Amisabod.

⁷ Tawa kaq killapi reyta serviq tropakunapa kamachiqninmi karqa Joabpa wawqen Asael, Asael wañuruptinmi paypa rantinpi churin Zebadiasña kamachirqa.

⁸ Pichqa kaq killapi reyta serviq tropakunapa kamachiqninmi karqa Izrapa miraynin Samhut.

⁹ Soqta kaq killapi reyta serviq tropakunapa kamachiqninmi karqa Iquespa churin Ira, payqa Tecoa llaqtayuqmi karqa.

¹⁰ Qanchis kaq killapi reyta serviq tropakunapa kamachiqninmi karqa Pelonitapa miraynin Heles, payqa karqa Efraín ayllumantam.

¹¹ Pusaq kaq killapi reyta serviq tropakunapa kamachiqninmi karqa Zera ayllumanta kaq Husapa miraynin Sibecai.

¹² Isqon kaq killapi reyta serviq tropakunapa kamachiqninmi karqa Anatot llaqtayuq Abiezer, payqa karqa Benjamín ayllumantam.

¹³ Chunka kaq killapi reyta serviq tropakunapa kamachiqninmi karqa Netofa llaqtayuq Zeratpa miraynin Maharai.

¹⁴ Chunka hukniyuq kaq killapi reyta serviq tropakunapa kamachiqninmi karqa Efrainpa mirayninmanta kaq Piratón llaqtayuq Benaía.

¹⁵ Chunka iskayniyuq kaq killapi reyta serviq tropakunapa kamachiqninmi karqa Otonielpa miraynin Netofa llaqtayuq Heldai. Paykunam sapakama iskay chunka tawayuq waranqa soldadokunapi kamachikurqaku.

¹⁶ Kaykunam Israelpa mirayninkunapi, sapa ayllupi kamachikuqkuna karqaku: Rubén ayllupa kamachiqninmi karqa Zicripa churin Eliezer. Simeón ayllupa kamachiqninmi karqa Maacapa churin Sefatías.

¹⁷ Leví ayllupa kamachiqninmi karqa Kemuelpa churin Hasabías. Aaronpa mirayninkunapa kamachiqninmi karqa Sadoc.

¹⁸ Judá ayllupa kamachiqninmi karqa Davidpa wawqen Eliú. Isacar ayllupa kamachiqninmi karqa Micaelpa churin Omri.

¹⁹ Zabulón ayllupa kamachiqninmi karqa Abdiaspa churin Ismaías. Neftalí ayllupa kamachiqninmi karqa Azrielpa churin Jerimot.

²⁰ Efraín ayllupa kamachiqninmi karqa Azaziaspa churin Oseas. Manasespa wakin ayllupa kamachiqninmi karqa Pedaiaspa churin Joel.

²¹ Galaad lawpi kaq Manasespa wakin ayllupa kamachiqninmi karqa Zacariaspa churin Iddo. Benjamín ayllupa kamachiqninmi karqa Abnerpa churin Jaasiel.

²² Dan ayllupa kamachiqninmi karqa Jerohampa churin Azareel. Paykunam karqaku Israelpa mirayninkunapi kamachikuqkuna.

²³ Tayta Diosmi prometerqa Israel runakunata cielopi chaskakunata hina-ña mirachinanpaq, chayraykum Davidqa mana yupachirqachu iskay chunka watanman manaraq chayaq runakunataqa.

²⁴ Sarviapa wawan Joabmi runakuna yupayta qallaykurqa, ichaqa manam yupayta tukurqachu, Israelpa mirayninkunata peste onqoywan Dios castigasqanrayku. Chayraykum rey Davidpa vidanmanta willakuq libropiqa haykam yupasqa kasqankupas mana qellqasqachu karqa.

²⁵ Adielpa churin Azmavetmi reypa tukuy imanta nanachikurqa. Uziaspa churin Jonatanñataqmi chakrakunapi, llaqtakunapi, llaqtachakunapi hinaspa torrekunapi kaqninkunata nanachikurqa.

²⁶ Quelubpa churin Izriñataqmi chakrapi llamkaqkunata kamachirqa.

²⁷ Ramat llaqtayuq Simeimi uvas chakrakunata nanachikurqa. Sefam llaqtayuq Zabdiñataqmi almacenpaq vino huñuymanta cuentallikurqa.

²⁸ Gedera llaqtayuq Baal-hananmi waqtakunapi aceitunas sachakunata hinaspa purun higoskunata nanachikurqa. Joasñataqmi almacenpi aceitemanta nanachikurqa.

²⁹ Sarón llaqtayuq Sitraimi Sarón pampapi mikuq uywakunata nanachikurqa. Adlaipa churin Safatñataqmi qechwakunapi mikuq uywakunata nanachikurqa.

³⁰ Ismaelpa miraynin Obilmi camellokunata nanachikurqa. Meronot llaqtayuq Jehediasñataqmi asnokunata nanachikurqa.

³¹ Agar llaqtayuq Jazizmi ovejakunata nanachikurqa. Paykunam llapallanku karqaku rey Davidpa kapuqninkunawan nanachikuqkuna.

³² Davidpa tion Jonatanmi karqa consejero, allin tanteoyuq hinaspa secretario. Hacmonipa churin Jehielñataqmi reypa churinkunamanta nanachikurqa.

³³ Ahitofelmi reypa consejaqnin karqa, Arqui casta Husaipas reypa confianzanmi karqa.

³⁴ Ahitofelpa rantinpim karqaku Benaiapa churin Joiada hinaspa Abiatar. Joabñataqmi reypa tropankunapa kamachiqnin karqa.