1~Crónicas 26 - CHUYA QELLQA La Biblia en Quechua de Ayacucho 2012

Punku nanachikuqkunamantawan kamachikuqkunamanta

¹ Turnonpi punku nanachikuqkunapas kayna rakinasqam karqaku: Coreypa mirayninmantam karqa Ebiasafpa churin Meselemías.

² Meselemiaspa churinkunamantam karqa: Piwi churin Zacarías, qatiqnin Jediael, Zebadías, Jatniel,

³ Elam, Johanán hinaspa Elioenai.

⁴ Obed-edompa churinkunamantam karqa: Piwi churin Semaías, qatiqnin Jozabad, Joa, Sacar, Natanael,

⁵ Amiel, Isacar hinaspa Peultai. Kayna achka churikunawanmi Obed-edomta Dios bendeciykurqa.

⁶ Obed-edompa churin Semaiaspapas karqam iskay churinkuna, paykunam ayllunku ukupi kamachikuspanku alli-allin qarikuna karqaku.

⁷ Semaiaspa churinkunamantam: Otni, Rafael, Obed, Elzabad, Eliú hinaspa Samaquías. Paykunam alli-allin qarikuna karqaku.

⁸ Paykunam Obed-edompa mirayninkuna karqaku, churinkunapiwan hinaspa wawqenkunapiwan qanchis chunka iskayniyuq qarikuna, paykunaqa allin poqosqa hinaspa kallpasapa qarikunam karqaku.

⁹ Meselemiaspa churinkunawan waw-qenkunam chunka pusaqniyuq allinnin qarikuna karqaku.

¹⁰ Meraripa mirayninmanta kaq Hosa-pa churinmantam karqa: Simri. Paytam mana piwi churin kachkaptinpas taytan churarurqa kamachikuq kananpaq.

¹¹ Qepanmanñataqmi Hilcías, Tebalías Zacarías. Hosapa churinkunawan waw-qenkunam chunka kimsayuq qarikuna karqaku.

¹² Paykunam punku nanachikunankupaq turnonpi churasqa karqaku. Paykunawan llamkaqmasinkuna hinaspa kamachikuqkunam Tayta Diospa templonpi servikunankupaq kamachisqa karqaku.

¹³ Sapa punkuta nanachikunankupaqmi sortearqaku ayllunkuman hina, mayorpaqpas otaq sullkapaqpas hina chaynallatam ruwarqaku.

¹⁴ Intipa qespimunan lawpi punkupaqmi suerte tuparurqa Selemiasman. Norte law punkuñataqmi tuparurqa Selemiaspa churin Zacariasman, payqa yachaywan consejakuqmi karqa.

¹⁵ Obed-edommanmi tuparurqa sur lawpi punku, churinkunamanñataqmi tuparurqa templopi llapa tukuy ima waqaychana cuartokuna.

¹⁶ Sofanmanwan Hosamanmi tuparurqa intipa seqaykuna lawpi Salequetwan sutichasqa punku. Chay punkuqa wichayman riq ñan lawmanmi qawachkan. Punkuta nanachikunankupaqmi kayna rakinasqa karqaku:

¹⁷ Intipa qespimunan lawpaqmi churarqaku soqta levitakunata, norte lawpaqmi churarqaku sapa punchawpaq tawa levitakunata, sur lawpaqmi sapa punchawpaq tawa levitakunata, almacén cuartokunapaqñataqmi iskaytakama.

¹⁸ Intipa seqaykunan lawpi ñanpaqmi tawa runakunata churarqaku, patiopiñataqmi iskayta.

¹⁹ Chayna rakisqam karqaku punkukunata nanachikuqkuna, paykunaqa karqaku Coreypa hinaspa Meraripa mirayninkunam.

²⁰ Wakin levitakunam karqaku Dios-pa templonpi llapa valorniyuq kaqkunamantawan Diospaq sapaqchasqa kaq-kunamanta nanachikuqkuna.

²¹ Ger-sonpa mirayninmanta kaq Laadanpa churinkunapim Jehielpa mirayninkuna kamachikurqaku.

²² Jehielipa churin Zetamwan hinaspa wawqen Joelmi Tayta Diospa templonpi tukuy ima valorniyuq kaqkunata nanachikurqaku.

²³ Amrampa, Izharpa, Hebronpa hinaspa Uzielpa mirayninmanta kaq

²⁴ Gersonpa churin Sebuelmi qollqe waqaychaqkunapa kamachiqnin karqa. Gersonqa karqa Moisespa churinmi.

²⁵ Gersonpa wawqen Eliezerpa mirayninkunam karqa: Rehabías, Jesahías, Joram, Zicri hinaspa Selomit.

²⁶ Selomitwan wawqenkunam nanachikurqaku rey Davidpa, ayllukunapi kamachiqninkunapa, waranqapi, pachakpi chaynataq tropakuna ukupi wakin kamachiqkunapa Tayta Diospaq sapaqchasqanku kaqkunamanta.

²⁷ Chaykunaqa karqa guerrapi qechumuspanku Tayta Diospa templonta allichachinankupaq sapaqchasqankum.

²⁸ Chaypitaqmi karqa profeta Samuelpa, Cispa churin Saulpa, Nerpa churin Abnerpa chaynataq Sarviapa wawan Joabpa sapaqchasqankunapas. Diospaq tukuy imapas sapaqchasqa kaqkunaqa Selomitpawan wawqenkunapa nanachikusqanmi karqa.

²⁹ Izharpa mirayninmanta kaq Que-naniaswan churinkunam karqaku gobernadorkunawan juezkuna. Paykunam karqaku templomanta hawapi ima asuntokunapas allichaqkuna.

³⁰ Hebronpa mirayninmantam Hasa-biaswan wawqenkuna karqaku allin poqosqa kallpasapa waranqa qanchis pachaknin qarikuna. Paykunam Jordán mayupa intipa seqaykunan lawninpi Israel nacionta kamachirqaku Tayta Diospa kaqninkunapipas chaynataq reypa kamachisqan kaqkunapipas.

³¹ Hebronpa mirayninkunapim ayllun-ayllun rakinasqa kasqankuman hina Jerías kamachiqninku karqa. Paykunam tawa chunka wataña David munaychakuchkaptin listasqa karqaku, chaymi paykunamanta Galaad law Jazer llaqtapi kallpasapa alli-allinnin qarikunata tarirurqaku.

³² Jeriaspa wawqenkunaqa allin kallpasapa qarikunam karqaku, ayllunkupi kamachisqankuman hinam iskay waranqa qanchis pachaknin karqaku; paykunatam rey David churarqa Rubén ayllupi, Gad ayllupi hinaspa Manasespa wakin ayllupi kamachikunankupaq, Tayta Diospa kaqninkunapipas chaynataq reypa kaqninkunapipas.