1~Crónicas 24 - CHUYA QELLQA La Biblia en Quechua de Ayacucho 2012

¹ Aaronpa mirayninkunam gruponpi rakisqa karqaku. Paykunam karqaku: Nadab, Abiú, Eleazar hinaspa Itamar.

² Nadabwan Abiuqa manaraq churiyuq kachkaspankum taytankumanta puntata wañukurqaku, chaymi Eleazarwan Itamarña sacerdotekuna karqaku.

³ Davidmi Eleazarpa mirayninmanta kaq Sadocpa hinaspa Itamarpa mirayninmanta kaq Ahimelecpa yanapakuyninwan rakinarqa llapa sacerdotekunata turnonpi imam ruwayninkupi servinankupaq.

⁴ Ichaqa Itamarpa qari churinkunamanta Eleazarpa qari churinkuna achka kasqankuraykum, kaynata rakinarqaku: Eleazarpa mirayninmantam akllarqaku chunka soqtayuq kamachikuqkunata, Itamarpa mirayninmantañataqmi pusaq kamachikuqkunata.

⁵ Paykunamantam sorteaspa tupasqanman hina rakinarqaku, chaytaqa ruwarqaku Eleazarpa mirayninmanta chaynataq Itamarpa mirayninmanta kaqkuna santuariopi kamachikuqkuna hinaspa Diospa wasinpi servikuqkuna kasqanraykum.

⁶ Leví ayllunmanta kaq Natanaelpa churin secretario Semaiasñataqmi sutinkuta qellqarqa, reypa, kamachikuqkunapa, sacerdote Sadocpa, Abiatarpa churin Ahimelecpa, sacerdotekunapa kamachiqninkunapa hinaspa levitakunapa kamachiqninkunapa qayllanpi. Sorteaptinkum Eleazarpa mirayninkunaman iskay turno tuparurqa, Itamarpa mirayninkunatañataqmi huk turno.

^7-18 Sorteaptinkum kayna qatinasninpi turno tuparurqa: Puntatam tuparurqa Joiaribman, qepantañataqmi Jedaiasman, Harimman, Seorimman, Malquiasman, Mijaminman, Cosman, Abiasman, Jesuaman, Secaniasman, Eliasibman, Jaquimman, Hupaman, Jesebeabman, Bilgaman, Imerman, Hezirman, Afsesman, Petaiasman, Hezequielman, Jaquinman, Gamulman, Delaiaman hinaspa Maa-ziasman.

¹⁹ Paykunam ruwayninkuman hina rakinasqa karqaku, taytanku Aaronpa kamachisqanman hina Tayta Diospa templonman yaykuspa, Israelpa yupaychasqan Tayta Diospa kamachisqanman hina llamkanankupaq.

²⁰ Leviypa wakin churinkunam kaykuna karqa: Amrampa mirayninmanta kaq Subael, Subaelpa mirayninmanta kaq Jehedías,

²¹ Rehabiaspa mirayninmanta kaq Isías, paymi kamachikuq karqa,

²² Izharpa mirayninmanta kaq Selomot, Selomotpa mirayninmanta kaq Jahat.

²³ Hebronpa churinkunamantam karqaku: Punta kaq churin Jerías, paymi kamachikuq karqa, qepanmanñataqmi Amarías, Jahaziel hinaspa Jecamán.

²⁴ Uzielpa churin Micaías, Micaiapa churin Samir,

²⁵ Micaiapa wawqen Isías, Isiaspa churin Zacarías.

²⁶ Meraripa churinkunamantam karqa: Mahli, Musi hinaspa Jaaziaspa churin Beno.

²⁷ Meraripa churinkunamantam karqa: Beno, Soham, Zacur hinaspa Ibri.

²⁸ Mahlipa mirayninmantam karqa: Eleazar, payqa qolluqmi karqa.

²⁹ Cispa churin Jerameel.

³⁰ Musipa churinkunamantam karqa: Mahli, Edar hinaspa Jerimot. Paykunam ayllunkuman hina karqaku Leviypa mirayninkuna.

³¹ Paykunapas ayllunku Aaronpa mirayninkuna hinam sortearqaku, rey Davidpa, Sadocpa, Ahimelecpa, sacerdotekunapa mirayninpi kamachikuqkunapa hinaspa levitakunapi kamachikuqkunapa qayllanpi. Mayor wawqenkupa ayllunpas hinaspa sullka wawqenkupa ayllunpas hina chayna sorteasqallam karqaku.