1~Crónicas 23 - CHUYA QELLQA La Biblia en Quechua de Ayacucho 2012

Levitakunapa imam ruwanankumanta

¹ Rey Davidmi llumpayta yuyaq-yaruspan churin Salomonta Israel nacionpi rey kananpaq churarqa.

² Israel nacionpi llapallan kamachikuqkunata, sacerdotekunata hinaspa levitakunata huñurachispanmi,

³ llapa levitakunata kimsa chunka watayuqmanta hanayman yupachirqa, chaymi chulla-chullamanta yupaptinku karqa kimsa chunka pusaq-niyuq waranqa qarikuna.

⁴ Chay levi-takunamantam iskay chunka tawayuq waranqa runakuna, Tayta Diospa templonta ruwarqaku, soqta waranqañataqmi kamachikuqkunawan juezkuna karqaku,

⁵ tawa waranqa runakunañataqmi punkuta nanachikurqaku, tawa waranqañataqmi Tayta Diosta yupaycharqaku Davidpa ruwachisqan tocanakunawan.

⁶ Leví ayllumantam kimsaman David rakinarurqa, paykunam karqaku Gersonpa, Coatpa hinaspa Meraripa mirayninkuna.

⁷ Gersonpa mirayninkunamantam karqa Laadanwan Simei.

⁸ Laadanpa churinkunam karqa: Piwi kaq Jehiel, qatiqnin Zetam hinaspa Joel.

⁹ Simeipa churinkunam karqa: Selomit, Haziel hinaspa Harán. Paykunam karqaku Laadanpa mirayninkunapi kamachikuqkuna.

¹⁰ Simeipa churinkunam karqa: Jahat, Ziza, Jeús hinaspa Bería.

¹¹ Jahatmi Piwi karqa, qatiqninñataqmi Ziza. Jeuswan Beriaqa mana ancha churiyuqmi karqaku, chayraykum paykunaqa yupasqa karqaku huk ayllu hinallaña, hinaspam huk ruwayllamanña churasqa karqaku.

¹² Coatpa churinkunam karqa: Amram, Izhar, Hebrón hinaspa Uziel.

¹³ Amrampa churinkunam karqa: Aaronwan Moisés. Aaronmi churinkunapiwan rakisqa karqa Tayta Diosllapaqña ofrendakunata wiñaypaq sapaqchanankupaq, Tayta Diospa qayllanpi inciensota kañanankupaq hinaspa payllataña servispa paypa bendicionninta wiñaypaq mañakunankupaq.

¹⁴ Diospa serviqnin Moisespa churinkunapas leví aylluwan kuskam yupasqa karqaku.

¹⁵ Moisespa churinkunam karqa Gerson-wan Eliezer.

¹⁶ Gersonpa churinmi karqa Sebuel. Paymi kamachikuq karqa.

¹⁷ Eliezerpa churinqa karqa Rehabiasllam manam hukqa karqachu, Rehabiasqa churisapam karqa.

¹⁸ Izharpa churinmi karqa Selomit. Paymi kamachikuq karqa.

¹⁹ Hebronpa churinkunam karqa: Piwi kaq Jeraías, paymi kamachikuq karqa, qatiqninkunam karqa Amarías, Jahaziel hinaspa Jecamán.

²⁰ Uzielpa churinkunam karqa: Micaías, paymi kamachikuq karqa, qatiqninñataqmi karqa Isaías.

²¹ Meraripa churinkunam karqa: Mahliwan Musi. Mahlipa churinkunam karqa: Eleazarwan Cis.

²² Eleazarqa wañukurqa mana qari churiyuqmi, paypaqa karqa warmi churinkunallam. Chaymi ayllun Cispa qari churinkuna paykunawan casarakurqaku.

²³ Musipa churinkunam karqa: Mahli, Edar hinaspa Jeremot.

²⁴ Paykunam karqaku Leviypa mirayninkuna, taytankupa mirayninkuman hina sapa ayllupi kamachikuqkuna. Paykunam iskay chunka watayuqmanta hanayman sutin-sutin yupasqa karqaku, Tayta Diospa templonpi servikunankupaq.

²⁵ Davidmi nirqa: Tayta Diosmi, Israelpa Diosninmi llaqtanman hawkayayta qoykun, paymi Jerusalén llaqtapi wiñaypaq yachanqa.

²⁶ Chayraykum Leví ayllukunaqa, Tayta Diospa yachanan carpatapas nitaq llapa servicionkunatapas manaña apaykachanqakuñachu, nispa.

²⁷ Chaynapim Davidpa qepa kamachikuyninman hina, Leviypa mirayninkunata iskay chunka watayuqmanta hanayman yuparqaku.

²⁸ Paykunatam Aaronpa mirayninkuna kamachirqaku Tayta Diospa templonpi, pationkunapi, cuartonkunapi, Diospaq sapaqchasqa kaqkuna limpiaypi hinaspa Diospa templonpi tukuy ima ruwaypi llamkanankupaq.

²⁹ Paykunam nanachikurqaku Tayta Diospa qayllanpi ofrenda tantawan, sacrificiopaq kawsaykunamanta ruwasqa harinawan, mana levadurayuq tortillakunawan, sartenpi teqtisqa hinaspa yanusqa ofrendakunawan hinaspa pesokunawan chaynataq tupukunawanpas.

³⁰ Paykunam kamachisqa karqaku, sapa tutapayta hinaspa sapa tardeykuyta templopi Tayta Diosman graciasta qospa yupaychanankupaq,

³¹ chaynallataq sapa samana punchawpi, musoq killapi hinaspa huk fiestakunapipas Tayta Diosman lliw kañana sacrificiota ofrecenankupaq. Chaytaqa mana tipiytam Tayta Diospa qayllanpi ruwaqku, chaypaq akllasqa kasqankuman hina hinaspa haykam kasqankuman hina.

³² Paykunam Tayta Diosman asuykuna carpatapas chaynataq santuariotapas nanachikurqaku. Chaykunatam Tayta Diospa templonpi ruwarqaku ayllunku Aaronpa mirayninkunapa kamachisqanman hina.