1~Crónicas 22 - CHUYA QELLQA La Biblia en Quechua de Ayacucho 2012

¹ Chayraykum David nirqa: Kaypim Tayta Diospa templonqa kanqa, Israel runakunapa lliw kañana sacrificio ofrecenanku altarpas kaypitaqmi kanqa, nispa.

Templo ruwanankupaq alistasqankumanta

² Chaymantam rey David Israelpi huklaw llaqtayuqkunata huñurachispan paykunamanta akllarqa rumita labranankupaq, chaynapi Diospa templonta hatarichinanpaq.

³ Davidqa alistachirqam achkallaña fierrokunatapas, chaykunawan punkukunata clavanankupaq hinaspa bisagrakunapaq; broncetapas achkallatañam huñuchirqa,

⁴ chaynataq cedro qerukunatapas manaña yupay atinata. Chay qerukunataqa Sidón hinaspa Tiro runakunam Davidman apamurqaku.

⁵ Davidmi tantearqa: Churiy Salomonqa warmallaraqmi, Tayta Diospa templontaqa ruwasunchik allin hatuntam, suma-sumaq hinaspa ancha reqsisqa kananpaq. Chayraykum llapa materialkunatapas listollataña saqesaq, nispan. Chaynata nispanmi Davidqa manaraq wañukuchkaspan tukuy imata achkanpi alistarqa.

⁶ Chaymantam churin Salomonta qayachispan kamachirqa Israelpa Diosninpaq templota ruwachipunanpaq.

⁷ Hinaspam Salomonta nirqa: Churilláy, ñoqam sonqoypi munarqani Diosniypaq templo ruwachiyta.

⁸ Ichaqa Tayta Diosmi niwarqa: “Qamqa achka runakunata wañuchispa yawar chaqchuqmi kanki, guerrakunapi puriqmi kanki, chayraykum mana qamchu temploytaqa ruwachipuwanki.

⁹ Aswanqa huk churikim nacenqa, payqa hawka kawsakuqmi kanqa. Ñoqam muyuriqninpi enemigonkunawan hawkayaypi kawsachisaq, chayraykum Salomón sutin kanqa. Paypa tiempopim Israel nacionman hawkayayta qosaq.

¹⁰ Paymi temployta ruwanqa. Paymi ñoqapa churiy kanqa, ñoqañataqmi paypa taytan kasaq, hinaspaymi Israel nacionpi munaychakusqanta wiñaypaq takyachisaq”, nispa.

¹¹ Chaynaqa, churilláy Tayta Diosyá qanwan kachun, nisusqaykiman hina Tayta Diospa wasinta ruwanaykipaq.

¹² Tayta Diosyá yachaytawan allin tanteoyuq kayta qosunki, chaynapi Israel nacionpi munaychakuspayki Tayta Diospa kamachikuyninkunata kasukunaykipaq.

¹³ Sichum Israelpa mirayninkunaman Moisesnintakama Tayta Diospa qosqan kamachikuykunata, decretonkunata kasukunki, hinaptinqa ima ruwasqaykipas allinmi lloqsinqa. Chaynaqa, kallpanchakuspayá qarinchakuy, ama manchakuychu nitaq hukmanyaychu.

¹⁴ Anchata kallpanchakuspaymi Tayta Diospa templonpaq alistaruniña, kimsa waranqa kimsa pachaknin tonelada qorita, kimsa chunka kimsayuq waranqa tonelada qollqeta, achka-achka broncetawan fierrotapas manaña pesay atinata. Huñurqanitaqmi qerukunatawan rumikunatapas, chaykunamanmi qampas yapanki.

¹⁵ Qanwanmi kachkan achka llamkaqkuna, rumi labraqkuna, albañilkuna, carpinterokuna hinaspa tukuy imata ruwaq maestrokuna.

¹⁶ Qoripas, qollqepas, broncepas hinaspa fierropas achka-achkam kachkan. Chaynaqa, hatarispa llamkayman churakuy, Tayta Diosmi qanwan kachkan, nispa.

¹⁷ Davidqa kamachirqataqmi Israel nacionpi kaq llapa kamachikuqkunatapas churin Salomonta yanapanankupaq. Paykunatam nirqa:

¹⁸ Tayta Diosmi qamkunawan kachkan, paymi tukuy hinastinpi hawkayayta qoykusunkichik. Paymi qoykuwan mu-yuriqninchik nacionkunapi llapallan runakunata, Tayta Diospa hinaspa runankunapa munaychakusqanña kanankupaq.

¹⁹ Chaynaqa, tukuy sonqoykichikwanyá Tayta Diosta maskaychik, hinaspayá Tayta Diospa santuarionta hatarichiychik, chaynapi Tayta Diospa pacto ruwasqan Arcatawan paypaq sapaqchasqa serviciokunata Tayta Diospaq ruwasqaykichik temploman apanaykichikpaq, nispa.