1~Crónicas 20 - CHUYA QELLQA La Biblia en Quechua de Ayacucho 2012

Rabá llaqtata David vencesqanmanta

¹ Qatiqnin watapim, costumbrenkuman hina reykunapa guerraman lloqsinanku tiempopi, tropankunawan Joab lloqsispan, Amonpa mirayninkunapa llaqtankunata pasaypaqta purmarachirqa. Chaymanta pasaspanmi Rabá llaqtata atacaruspan purmarachirqa. Davidñataqmi Jerusalén llaqtapi kachkarqa.

² Chay-mantam Davidqa, Rabá llaqtapa reyninpa umanmanta qorimanta coronanta hurqorurqa. Chay coronapa llasayninmi karqa kimsa chunka kimsayuq kilo, sumaq alhaja rumikunawan adornasqataqmi karqa. Chay coronatam Davidpa umanman churaykurqaku. Llaqtapa tukuy ima valorniyuq kaqninkunatapas apakurqam.

³ Llaqtapi puchuq runakunatapas pusaruspanmi sierrakunawan, trillanakunawan hinaspa hachakunawan llamkachirqa. Amonpa allpanpi wakin llaqtankunawanpas Davidqa chaynallatam ruwarqa. Chaymantam llapallan tropankunawan Jerusalenman kutikurqa.

Hatunkaray runakunawan David peleasqankumanta

⁴ Chaykunapa qepantam Filistea tropakunawan Gezer llaqtapi David pelearqa. Chaypim Husa llaqtayuq Sibecai wañurachirqa hatunkaray runakunapa miraynin Sipaita; chaynapim filisteokunapi Israelpa mirayninkuna munaychakururqaku.

⁵ Kaqmantam filisteokunawan guerra karqa, chaymi Jairpa churin Elhanán wañurachirqa Gat llaqtayuq Goliatpa wawqen Lahmita. Paypa lanzanpa kaspinmi karqa telarpa rodillon hina rakusu.

⁶ Huktawanmi Gat llaqtapi guerra karqa, chaypim karqa huk hatunkaray runa, paypa makinkunawan chakinkunam soqta dedoyuqkama karqa, llapallan dedonkunam iskay chunka tawayuq karqa. Paypas hatunkaray runakunapa castanmi karqa.

⁷ Paymi Israel tropakunata insultarqa, chaymi Davidpa wawqen Simeapa churin Jonatán wañurachirqa.

⁸ Paykunam Gat llaqtayuq hatunkaray Refapa mirayninkuna karqaku. Paykunatam Davidwan soldadonkuna wañurachirqaku.