1~Crónicas 18 - CHUYA QELLQA La Biblia en Quechua de Ayacucho 2012

Enemigonkunata David vencesqanmanta

¹ Chaykunapa qepantam filisteokunata David venceruspan pay-kunapi munaychakuyta qallaykurqa, hinaspam Gat llaqtatawan llaqtachankunata qechururqa.

² Vencerurqataqmi Moab tropakunatapas, chaymi paykunapi David munaychakuyta qallaykuptin impuestota pagarqaku.

³ Rey Davidqa vencerurqataqmi Soba nacionpa reynin Hadad-ezertapas. Soba nacionqa kachkan Hamat lawpim. Paytaqa vencerurqa Eufrates lawpi munaychakuyninta takyachinanpaq richkaptinmi.

⁴ Paykunamantam David qechururqa guerrapaq waranqa carretakunata, presocharurqataqmi qanchis waranqa sillada soldadokunata, iskay chunka waranqa chakiwan riq soldadokunatapas. Pachak carretallapaqña caballokunata puchuykachispanmi carreta aysaq caballokunapa ankuntapas kuchuparachirqa.

⁵ Damasco llaqtamantam Asiria tropakuna hamurqaku Soba nacionpa reynin Hadad-ezerta yanapanankupaq, Davidmi ichaqa, Siria tropakunamanta iskay chunka iskayniyuq waranqa soldadokunata wañurachirqa.

⁶ Chaymantam Davidqa, soldadonkunata churarurqa Siria nacionpi kaq Damasco llaqtapi; chaynapim Siria runakunaqa Davidta servispanku impuestota pagarqaku. Chaynatam Davidta mayman peleaq riptinpas Tayta Dios vencechirqa.

⁷ Davidqa Hadad-ezerpa soldadonku-napa apamusqanku qorimanta escudonkunatapas qechuruspanmi Jerusalén llaqtaman aparqa.

⁸ Chaynallataqmi Tibhat llaqtamantawan Cun llaqtamantapas nana-nanaq bronceta apakurqa. Chay llaqtakunapiqa Hadad-ezermi munaychakurqa. Chay broncemantam Salomón ruwachirqa estanqueta, pilarkunata hinaspa templopa servicionkunata.

⁹ Soba nacionpa reynin Hadad-ezerpa lliw tropankunata David vencerusqanta Hamat nacionpa reynin Toi yacha-ruspanmi,

¹⁰ churin Adoramta kacharqa Hadad-ezerta vencerusqanmanta rey Davidta rimaykuspa felicitamunanpaq, paywanmi apachirqa qorimanta, qollqemanta hinaspa broncemanta serviciokunata. Rey Toiqa chayta ruwarqa rey Hadad-ezerwan guerrapi kasqanraykum.

¹¹ Tukuy chaykunatawan kuskatam rey Davidqa Tayta Diospaq sapaqcharqa, Edommanta, Moabmanta, Amonmanta, Filisteamanta hinaspa Amalecmanta qechumusqan qoritapas qollqetapas.

¹² Sarviapa wawan Abisaipas Kachi wayqopim chunka pusaqniyuq waranqa Edom soldadokunata wañurachirqa.

¹³ Chaymantam rey Davidqa soldadonkunata Edom nacionpi churarurqa, chaynapim Edom runakunaqa Davidtaña servirqaku. Tayta Diosmi Davidta mayman peleaq riptinpas vencechirqa.

Davidpa tropanta kamachiqkunamanta

¹⁴ Davidmi Israel nacionpi munaychakurqa, allinta munaychakuspanmi llapallan runakunapaq allinta ruwarqa.

¹⁵ Sarviapa wawan Joabmi llapallan tropankunapa kamachiqnin karqa. Ahiludpa churin Josafatñataqmi reypa secretarion karqa.

¹⁶ Ahitobpa churin Sadocwan Abiatarpa churin Ahimelecñataqmi sacerdotekuna karqaku; Savsañataqmi tukuy ima pasakusqanmanta qellqaq karqa.

¹⁷ Joiadapa churin Benaiam kamachirqa Ceret ayllumantawan Pelet ayllumanta kaq reyta waqaychaq soldadokunata. Davidpa churinkunañataqmi karqaku ñawpaqninpi yanapaqninkuna.