1~Crónicas 17 - CHUYA QELLQA La Biblia en Quechua de Ayacucho 2012

Rey Davidman Tayta Dios prometesqanmanta

¹ Rey Davidmi palacionpiña yachachkaspan profeta Natanta nirqa: Qawariy, ñoqaqa cedromanta palaciopim yachachkani, Diospa pacto ruwasqan Arcanñataqmi carpallapi kachkan, nispa.

² Chaymi Davidta Natán nirqa: Tayta Diosmi qanwan kachkan, son-qoykipa nisqanman hinayá ruway, nispa.

³ Chay tutallam Natanta Tayta Dios nirqa:

⁴ Rispayki serviqniy Davidta nimuy: Tayta Diosmi kaynata nin: Manam qamchu temploytaqa ruwapuwanki.

⁵ Egiptomanta Israelpa mirayninkunata hurqomusqay punchawmanta kunankamam templopiqa mana yacharqanichu, aswanqa carpan-carpan yachastinmi purirqani.

⁶ Israelpa mirayninkunawan tukuy tiempo purichkaspaypas, manam llaqtayta kamachinankupaq churasqay juezkunataqa mayqantapas kamachirqanichu cedromanta wasita ruwapuwananpaqqa.

⁷ Chaynaqa, kunanyá serviqniy David-man kaynata nimuy: Tukuy Atiyniyuq Tayta Diosmi kaynata nin: Oveja michisqaykimantam hurqomurqayki, Israel llaqtaypi munaychakuq kanaykipaq.

⁸ Maypiña puriptikipas qanwanmi karqani, enemigoykikunatapas qayllaykimantam tukururqani. Kay pachapi atiyniyuqkunata hinam ancha reqsisqata ruwasqayki.

⁹ Israel llaqtaypaqpas huk sitiotam akllaruniña, chaypim paykunata churani manaña pipas kuyuchinanpaq; chaypiqa manañam pipas nitaq mana allin runakunapas ñakarichinqañachu,

¹⁰ imaynam Israel llaqtaypi juezkunata churasqay punchawkunapi hinaqa. Llapa enemigoykikunatapas ñoqa Tayta Diosmi penqayman churasaq, miraynikikunamantapas reykunatam hatarichisaq.

¹¹ Machuyaruspa ñawpaq taytaykikuna hina wañukuptikim, qampa miraynikita munaychakunanpaq churasaq, hinaspam munaychakuyninta takyachisaq.

¹² Paymi temploytaqa ruwapuwanqa, ñoqañataqmi munaychakuyninta wiñaypaq takyachisaq.

¹³ Ñoqam paypaq taytan kasaq, payñataqmi ñoqapaq churiy kanqa. Paymantaqa manam kuyakuyniytapas qechusaqchu imaynam Saulmanta qechurusqayta hinaqa.

¹⁴ Aswanmi paytaqa wasiypi hinaspa munaychakuyniypi wiñaypaq takyachisaq, chaynapim munaychakuyninpas wiñaypaq takyanqa, nispa.

¹⁵ Chaymi profeta Natán, visionpi tukuy ima qawasqanta chaynataq uyarisqanta Davidman willarqa.

¹⁶ Chaymi Tayta Diospa qayllanman yaykuspan rey David nirqa: Dios Taytalláy, ¿pitaq ñoqallayqa kani chaynataq aylluykunapas kaykama chayachimuwanaykipaqqa?

¹⁷ Diosnilláy, chaypas asllapaq rikchakapusuptikim kay serviqnikipa miraynin imaynam kananmantapas rimariykuwanki, Dios Taytalláy, ancha reqsisqa runatapas hinaraqmi qawaykullawanki.

¹⁸ ¿Imatawanraqtaq nikiman kay serviqnikita hatunchasqaykimanta? Kay serviqnikitaqa qanmi reqsiwanki.

¹⁹ Dios Taytalláy, kuyawasqaykiman hinam, tukuy kay admirakuypaq kaqkunata ruwarunki, munasqaykiman hina reqsisqa kananpaq.

²⁰ Dios taytalláy, qam hinaqa manam pipas kanchu, uyarisqaykuman hinaqa qanmanta huk Diosqa manam kanchu.

²¹ Israel llaqtayki hinaqa manam ima nacionpas kay pachapiqa kanchu. Diosnilláy, qanmi llaqtayki kananpaq Egipto nacionmanta libramurqanki, hatun manchakuypaq chaynataq admirakuypaq kaqkunata ruwaspaykim reqsichikurqanki, llaqtaykipa qayllanmantam llapa nacionkunatapas qarqospa idolonkunatapas ñutururqanki.

²² Qanmi Israelta wiñaypaq llaqtayki kananpaq takyachirqanki, Dios Taytalláy, qanmi Diosnin kanki.

²³ Dios Taytalláy, kunanyá kay serviqnikimantawan mirayninmanta rimasqaykita wiñaypaq takyachiy. Nisqaykiman hinayá ruway.

²⁴ Prometesqaykiyá ruwasqa kachun, chaynapi sutiki wiñaypaq hatunchasqa kaptin runakunapas “Tukuy Atiyniyuq Tayta Diosmi Israelpa Diosninqa” ninankupaq. Kay serviqniki Davidpa mirayninyá qampa yanapakuynikiwan takyachun.

²⁵ Diosnilláy, qanmi kay serviqnikiman niwarqanki mirayniyta takyachinaykipaq. Chayraykum kay serviqnikiqa qamta mañakamullayki.

²⁶ Dios Taytalláy, qamllam Diosqa kanki, tukuy kaykunatam kay serviqnikiman prometeykuwanki.

²⁷ Kunanmi kay serviqnikipa mirayninta munasqaykiman hina bendeciykunki, chaynapi wiñaypaqña takyananpaq. Diosnilláy, qanmi paykunata bendeciykunki, chaynaqa wiñaypaq bendecisqam kanqaku, nispa.