1~Crónicas 16 - CHUYA QELLQA La Biblia en Quechua de Ayacucho 2012

¹ Aparamuspankum Diospa Arcanta churarqaku Davidpa sayachisqan carpaman, hinaspam lliw kañana sacrificiotawan Dioswan allinlla kasqankumanta ofrendakunata Tayta Diosman ofrecerqaku.

² Lliw kañana sacrificiotawan Dioswan allinlla kasqankumanta ofrendakuna ofreceyta tukuruspanmi, Tayta Diospa sutinpi llapa runakunata David bendeciykurqa.

³ Hinaspanmi Israelpa mirayninkunaman qarimanpas warmimanpas, tantata, frutakunamanta tortillata hinaspa pasasmanta tortillata aypuchirqa.

⁴ Davidmi levitakunamanta churarqa Tayta Diospa Arcanpa ñawpaqninpi servikuspa yupaychanankupaq, graciasta qonankupaq hinaspa Tayta Diosta hatunchanankupaq.

⁵ Asafmi kamachikuq karqa, qepanmanñataqmi Zacarías, Jeiel, Semiramot, Jehiel, Matatías, Eliab, Benaía, Obed-edom hinaspa Jeiel. Paykunam salteriokunata, arpakunata tocarqaku, Asafñataqmi platillokunata tocarqa.

⁶ Sacerdote Benaiawan sacerdote Jahazielñataqmi Diospa pacto ruwasqan Arcapa ñawpaqninpi sapa punchaw trompetakunata tocarqaku.

Davidpa takisqanmanta

⁷ Chay punchawpim David kamachirqa Asaftawan wawqenkunata kay takiwan Tayta Diosman graciasta qonankupaq:

⁸ Tayta Diosta yupaychaychik, sutinta hatunchaychik, ruwasqankunata llaqtakunaman reqsichiychik.

⁹ Paytayá takikunawan yupaychaychik, admirakuypaq ruwasqankunamantayá willakuychik.

¹⁰ Chuya sutinmantayá alabakuychik, Tayta Diosta maskaqkuna sonqoykichikpi kusikuychik.

¹¹ Tayta Diosta hinaspa atiyninta maskaychik, tukuy tiempo payllata maskaychik.

¹² Admirakuypaq ruwasqankunata yuyariychik, kamachikuyninkunata yuyariychik.

¹³ Serviqnin Israelpa mirayninkuna, akllakusqan Jacobpa mirayninkuna:

¹⁴ Tayta Diosqa Diosninchikmi, payqa kay pachapi munaychakuqmi.

¹⁵ Pacto ruwasqantaqa wiñaypaqmi yuyachkan, waranqantin miraykunapaq kamachisqantaqa manam qonqanchu.

¹⁶ Abrahamwan pacto ruwasqantaqa manam qonqanchu, Isaacman jurasqanmantaqa manam qonqanchu.

¹⁷ Jacobmanmi kamachikuyninkunata qorqa, wiñaypaq pactotam Israelwan ruwarqa,

¹⁸ kaynata nispan: Canaán allpatam qanman qosqayki, herenciayki kananpaqmi qosqayki, nispa.

¹⁹ Paykunaqa asllaraq kachkaptinkupas, huklaw llaqtayuqlla kay pachapi kachkaptinkupas,

²⁰ nación-nación purichkaptinkupas, llaqtan-llaqtan purichkaptinkupas,

²¹ Tayta Diosqa manam pipas ñakarichinanta munarqachu, paykunata kuyasqanraykum reykunatapas kaynata qaqcharqa:

²² Akllasqaykunataqa amam llapchayllapas llapchankichikchu, profetaykunataqa amam imanankichikchu, nispa.

²³ Kay pachapi llapallan runakuna Tayta Diosta yupaychaychik, sapa punchaw salvacionninmanta willakuychik.

²⁴ Ancha reqsisqa kasqanmanta nacionkunapi willakuychik, admirakuypaq ruwasqankunamanta runakunaman willakuychik.

²⁵ Tayta Diosqa ancha hatunmi, payqa yupaychana Diosmi, dioskunamantapas aswan manchakuypaqmi.

²⁶ Llaqtakunapa diosninkuqa idolokunallam, Tayta Diosmi ichaqa cielokunata unancharqa.

²⁷ Paypa qayllanpiqa kanchariymi kachkan, santuarionpas atiywan kusikuywan huntarisqam kachkan.

²⁸ Llapa llaqtakunapi ayllukuna, Tayta Diosta hatunchaychik, atiyninta reqsikuspa hatunchaychik.

²⁹ Tayta Diosta pim kasqanmanta yupaychaychik, ofrendakunata apamuspa qayllanman hamuychik, Tayta Diosta chuya wasinpi qonqorakuspa yupaychaychik.

³⁰ Kay pachapi llapa runakunayá paypa qayllanpi katkatataychik, paymi kay pachata mana kuyurinanpaq takyachirqa.

³¹ Cielokunapas kusikuchun, kay pachapas kusikuchun. Nacionkunapi nichunku: “Tayta Diosmi munaychakuchkan”, nispanku.

³² Lamar qochapas, chaypi kaqkunapas qaparichunku, campokunapas chaypi kaqkunapas kusikuchunku.

³³ Montepi sachakunapas Tayta Diospa qayllanpi kusikuymanta takichunku, payqa kay pachata juzgananpaqmi hamunqa.

³⁴ Allin kasqanraykuyá Tayta Diosman graciasta qoychik, kuyapayakuyninqa wiña-wiñaypaqmi.

³⁵ Qamkunayá niychik: ¡Diosnillayku, salvaqniykum kanki, salvaykullawayku! huñuykuwaspaykiku nacionkunamanta libraykullawayku, chuya sutikimanta willakunaykupaq, kusikuyllawanña yupaychanaykupaq.

³⁶ Israelpa yupaychasqan Tayta Diosyá wiñaymanta wiñaykama yupaychasqa kachun, nispan. Llapa runakunañataqmi ¡Amén! nispanku Tayta Diosta yupaycharqaku.

³⁷ Davidmi Asaftawan wawqenkunata saqerqa Tayta Diospa pacto ruwasqan Arcapa ñawpaqninpi, sapa punchaw imam ruwanankupi servikunankupaq.

³⁸ Saqerqataqmi Obed-edomtawan soqta chunka pusaqniyuq llamkaqmasin runakunatapas; Jedutunpa churin Obed-edomtawan Hosatañataqmi punkukunata nanachikunankupaq.

³⁹ Sacerdote Sadoctawan sacerdote masinkunatapas Tayta Diospa carpanpi kanankupaqmi saqerqa, chay carpaqa karqa Gabaón moqopim.

⁴⁰ Paykunatam saqerqa mana tukuyta sapa tutapayta hinaspa sapa tardeykuqta Tayta Diosman lliw kañana sacrificiota ofrecenankupaq, Israelpa mirayninkunaman Tayta Diospa kamachisqan qellqaman hina ruwanankupaq.

⁴¹ Paykunatawan kuskatam saqerqa Hemantawan Jedutuntapas chaynataq takinankupaq sutin-sutin akllasqa kaqkunatapas, wiña-wiñaypaq kuyakuyninmanta Tayta Diosman graciasta qonankupaq.

⁴² Hemanwan Jedutunmi trompetakunata, platillokunata hinaspa wakin tocanakunata tocarqaku, takiqkunawan kuska Tayta Diosta yupaychanankupaq. Jedutunpa churinkunañataqmi punkukunata nanachikurqaku.

⁴³ Chaymantam llapa runakunapas sapakama wasinkuman ripukurqaku. Davidpas wasinmanmi kutikurqa ayllunkunata bendecinanpaq.