1~Crónicas 15 - CHUYA QELLQA La Biblia en Quechua de Ayacucho 2012

Diospa Arcanta Jerusalenman David apachisqanmanta

¹ Davidmi wasikunata ruwachikurqa “Davidpa Llaqtanwan” sutichasqanku llaqtapi, hinaspam huk carpata sayachispan Diospa Arcanpaq sitiota allicharqa.

² Hinaspam David nirqa: Diospa Arcantaqa levitakunallam apan-qaku, paykunatam Tayta Diosqa akllarqa Arcanta apanankupaq hinaspa tukuy tiempo payta servinankupaq, nispa.

³ Chaymantam Israelpa mirayninkunata Jerusalén llaqtaman huñuchirqa, allichasqan sitioman Tayta Diospa Arcanta apamunankupaq.

⁴ Huñuchirqataqmi Aaronpa mirayninkunatawan llapa levita-kunatapas.

⁵ Coatpa mirayninkunamantam huñurachirqa pachak iskay chunka runakunata, paykunapa kamachiqninmi karqa Uriel.

⁶ Meraripa miray-ninkunamantam huñurachirqa iskay pachak iskay chunka runakunata, paykunapa kamachiqninmi karqa Asaías.

⁷ Gersonpa mirayninkunamantam huñurachirqa pachak kimsa chunka runakunata, paykunapa kamachiqninmi karqa Joel.

⁸ Elizafanpa mirayninkunamantam huñurachirqa iskay pachak runakunata, paykunapa kamachiqninmi karqa Semaías.

⁹ Hebronpa mirayninkunamantam huñurachirqa pusaq chunka runakunata, paykunapa kamachiqninmi karqa Eliel.

¹⁰ Uzielpa mirayninkunamantam huñurachirqa pachak chunka iskayniyuq runakunata, paykunapa kamachiqninmi karqa Aminadab.

¹¹ Chaymantam David qayachirqa sacerdote Sadocta, sacerdote Abiatarta, Leví ayllumanta kaq Urielta, Asaiasta, Joelta, Elielta hinaspa Aminadabta.

¹² Paykunatam nirqa: Leví ayllukunapi kamachikuqkuna kasqaykichikrayku, qamkunapas waw-qekichikkunapas chuyanchakuychik, chaynapi alistasqay sitioman Israelpa yupaychasqan Tayta Diospa Arcanta apamunaykichikpaq.

¹³ Puntata apamuptiyku qamkuna mana apamusqaykichikraykum Señorninchik Tayta Dios wakiqninchikta wañurachirqa, chaynataqa ruwarqa Tayta Diospa kamachikuyninman hina mana ruwasqanchikraykum, nispa.

¹⁴ Chaymi llapa sacerdotekunawan levitakuna chuyanchakurqaku Israelpa yupaychasqan Tayta Diospa Arcanta apamunankupaq.

¹⁵ Hinaspankum Leviypa mirayninkuna Tayta Diospa Arcanta hombrorikuspanku apamurqaku, chaynataqa ruwarqaku Moisesman Tayta Diospa kamachisqanman hinam.

¹⁶ Davidqa kamachirqataqmi levitakunapa kamachiqninkunatapas, ayllun-kumanta takiqkunata tocanantintakama churanankupaq, chaynapi arpakunata, platillokunata kusikuywan tocaspa takinankupaq.

¹⁷ Chaymi llapa levitakuna akllarqaku Meraripa mirayninkumanta: Joelpa churin Hemanta, Berequiaspa churin Asafta, Cusaiaspa churin Etan-ta.

¹⁸ Paykunawan kuska templopi yana-pakunankupaqmi hina casta masinkumanta akllasqa karqa: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu hinaspa Micnías. Punkuta nanachikunankupaqmi akllarqaku Obed-edomtawan Jehielta.

¹⁹ Takiqkunamantam Hemanwan, Asaf hinaspa Etán broncemanta platillokunata tocarqaku.

²⁰ Zacariaswan Aziel, Semiramot, Jehiel, Uni, Eliab, Maasías hinaspa Benaiañataqmi llañu tonopi salteriokunata tocarqaku.

²¹ Matatiaswan Elifelehu, Micnías, Obed-edom, Jeiel hinaspa Azariasñataqmi arpakunata raku tonopiraq llañu tonopiraq tocarqaku.

²² Levitakunapa kamachiqnin Quenaniasñataqmi, takikunamanta llumpayta yachasqanrayku directorninku karqa.

²³ Berequiaswan Elcanam Arcapa punkunta nanachikuqkuna karqaku.

²⁴ Sebaniaswan Josafat, Natanael, Amasai, Zacarías, Benaía hinaspa Eliezerñataqmi, Tayta Diospa Arcanpa ñawpaqninpi trompetakunata tocarqaku. Paykunaqa sacerdotekunam karqaku. Obed-edomwan Jehiaspas Diospa Arcanpa punkunta waqaychaqkunam karqaku.

²⁵ Davidmi rirqa Israelpa ancianon-kunawan hinaspa waranqapi kamachiqkunawan, Tayta Diospa pacto ruwasqan Arcata, Obed-edompa wasinmanta kusikuywan apamunankupaq.

²⁶ Pacto ruwasqan Arcanta apamuq levitakunata Tayta Dios yanapasqanraykum qanchis malta torokunata hinaspa qanchis carnerokunata sacrificaspa ofrecerqaku.

²⁷ Davidpas linomanta ruwasqa pachayuqmi rirqa, Arca apaq levitakunawan takiqkunapas hina chayna pachasqakamam rirqaku; Quenaniasmi karqa takiqkunapa directornin. Davidqa linomanta efodwan churasqam rirqa.

²⁸ Chaynatam Israelpa mirayninkuna Tayta Diospa pacto ruwasqan Arcata aparqaku, kusikuymanta qaparistin, cornetakunata, trompetakunata, platillokunata, salteriokunata hinaspa arpakunata tocastin.

²⁹ “Davidpa Llaqtanwan” sutichasqanku llaqtaman Tayta Diospa pacto ruwasqan Arcan chayaruptinmi, Saulpa warmi churin Mical, ventanamanta qawarispa rey Davidta kusikuymanta tusuchkaqta rikururqa, hinaspam llumpayta despreciarqa.