1~Crónicas 14 - CHUYA QELLQA La Biblia en Quechua de Ayacucho 2012Davidman rey Hiram comisionta kachasqanmanta ( 2~S 5.11-12 ) 1 Tiro llaqtapa reynin Hiranmi runankunata Davidman kacharqa, kacharqataqmi albañilkunatawan carpinterokunatapas cedromanta qerukunata apachispan, Davidpa palacionta ruwamunankupaq. 2 Chaywanmi David-qa yachakururqa Israelpi rey kananpaq Tayta Diospa churasqanta chaynataq Israel nacionpi munaychakuynin hatunchasqantapas. Davidpa Jerusalenpi naceq churinkunamanta ( 2~S 5.13-16 ; 1~Cr 3.5-9 ) 3 Davidmi Jerusalén llaqtapi warmikunawan casarakuruspan qarikunata warmikunata churyakurqa. 4 Davidpa Jerusalenpi naceq churinkunam karqa: Samúa, Sobab, Natán, Salomón, 5 Ibhar, Elisúa, Elpelet, 6 Noga, Nefeg, Jafía, 7 Elisama, Beeliada hinaspa Elifelet. Filisteokunata David vencesqanmanta ( 2~S 5.17-25 ) 8 Israel nacionpi rey kananpaq David churasqa kasqanta yacharuspankum llapa Filisteokuna paypa contranpi hamurqaku. Chayta yacharuspanmi Davidpas paykunapa contranpi lloqsirqa. 9 Filisteokunam Refaim qechwaman chayaruspanku chayninta qespimurqaku. 10 Hinaptinmi Diosta David tapurqa: ¿Risaqchu filisteokunapa contranpi? ¿Makiymanchu paykunata churaykamunki? nispa. Chaymi Tayta Dios nirqa: Riypuni, filisteokunataqa makikimanmi churamusaq, nispa. 11 Chaymi Baal-perazim sitiokama chayaruspan filisteokunata David vencerurqa, chayraykum nirqa: Lloqllapa wayqosqanta hinam Tayta Diosqa enemigoykunapa chawpinta ñanta kichaykapuwan, nispa. Chayraykum chay sitiota suticharqa “Baal-perazim” nispa. 12 Filisteokuna llapa idolonkuta chaypi saqeruptinkum David kañarachirqa. 13 Filisteokunam kaqllamanta Refaim qechwapi yachaqkunata salteanankupaq hamururqaku. 14 Chaymi David huktawan Diosta tapurqa, hinaptinmi Dios nirqa: Ama riychu paykunapa ñawpaqninmanqa, aswanqa muyuriruspaykichik bálsamo sachakunapa ñawpaqninmanta atacaychik. 15 Bálsamo sachakunapa hawanpi tropakunapa kallpasqanta hina uyarispaykim atacayta qallaykunki, ñoqa Diosñataqmi qampa ñawpaqnikita risaq Filistea tropakunata wañuchinaypaq, nispa. 16 Diospa kamachisqanman hina ruwaspanmi Filistea tropakunata David vencerurqa, Gabaón llaqtamanta Gezer llaqtapa hichpankama. 17 Davidpa tukuy ima ruwasqankunam llapa nacionkunapi uyarikurqa, Tayta Diosñataqmi chay nacionkunaman manchakuyta qoykurqa Davidta manchakunankupaq. |
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
Peruvian Bible Society