1~Crónicas 11 - CHUYA QELLQA La Biblia en Quechua de Ayacucho 2012

Israelpi David munaychakusqanmanta

¹ Llapa Israelpa mirayninkunam Hebrón llaqtaman rispanku Davidta nirqaku: Ñoqaykuqa tulluyki chaynataq ya-warnikim kaniku.

² Saúl munaychakuchkaptinpas guerrakunapiqa qanmi Israelpa tropankunata kamachirqanki. Tayta Diostaqmi prometesurqanki Israel llaqtanta kamachispa paykunapi munaychakunaykipaq, nispanku.

³ Kaynatam Israelpa ancianonkuna rispanku rey Davidwan Hebrón llaqtapi rimamurqaku; Davidñataqmi Tayta Diospa qayllanpi paykunawan contratota ruwarqa. Hinaspankum Davidta sapaqcharqaku Israelpi rey kananpaq, profeta Samuelnintakama Tayta Diospa nisqanman hina.

Sión llaqtata David vencesqanmanta

⁴ Chaymantam Davidqa Israelpa mirayninkunawan Jerusalén llaqtaman rirqa. Jerusalén llaqtapa huknin sutinqa karqa Jebusmi. Chay allpapiqa jebuseokunam yacharqaku.

⁵ Paykunam Davidta nirqaku: Manam kaymanqa yaykumuyta atiwaqchu, nispanku. Davidmi ichaqa chay murallasqa Sión llaqtata munaychakururqa. Chaymi Sión llaqtata suticharqaku “Davidpa Llaqtan” nispa.

⁶ Davidmi nirqa: Pipas jebuseokunata puntata atacaqmi kanqa llapallan tropakunapa kamachiqnin, nispa. Chaymi Sarviapa wawan Joab pun-tata atacarurqa, hinaptinmi payta llapallan tropakuna kamachiqpaq David churarqa.

⁷ Davidmi yachayta qallaykurqa chay murallasqa llaqtapi, chayraykum suticharqaku “Davidpa Llaqtan” nispa.

⁸ Davidmi muyuriqninpi llaqtakunata hatarichirqa, Milomanta qallaykuspa murallapa kasqankama. Mana tukusqa kaqkunatañataqmi Joab allichachirqa.

⁹ Tukuy Atiyniyuq Tayta Dios yanapaptinmi Davidqa aswan atiyniyuqraq rikurirurqa.

Davidpa allinnin qari-qari soldadonkunamanta

¹⁰ Kaykunam Davidpa allinnin qari-qari soldadonkuna karqa, paykunam munaychakuyninpi yanaparqaku, Israelpa mirayninkunawan kuskam Davidta Israelpi munaychakunanpaq churarqaku, imaynam Tayta Diospa Israelman nisqanman hina.

¹¹ Davidpa allinnin qari-qari soldadonkunam karqa: Hacmonipa churin Jasobeam, paymi karqa kimsa allinnin qari-qari soldadokunapa kamachiqnin, paymi huk kutipi lanzanwan kimsa pachak runakunata wañurachirqa.

¹² Paymanmi qatirqa Ahoh llaqtayuq Dodopa churin Eleazar, paymi chay kimsa allinnin qari-qari runakunamanta huknin karqa.

¹³ Paymi Davidwan kuska Pas-damim lawpi karqa, llapa filisteokuna Israelpa mirayninkunawan peleanankupaq huñunakaramuptinku. Chaypim karqa cebada chakra, chaymi Israel tropakunaqa filisteokunamanta lluptiptinku,

¹⁴ Eleazarñataq chay cebada chakrapa chawpinpi churakuruspan defienderqa, hinaspam filisteokunata vencerurqa. Tayta Dios yanapaptinmi vencerurqaku.

¹⁵ Huk kutipim, kimsa chunka allinnin qari-qari soldadokunamanta kimsa allinnin qari-qari runakuna uraykurqaku Davidwan Adulam machaypi tupamunankupaq. Filistea tropakunapa campamentonñataqmi kachkarqa Refaim qechwapi.

¹⁶ Davidmi pakakusqan sitiopi kachkarqa, Filistea tropankunapa cuartelninñataqmi Belén llaqtapi kachkarqa.

¹⁷ Chaypim David kaynata nirqa: ¡Piraq Belén llaqtapa punkunpi pozomanta yakuta tomaykachiwanman! nispa.

¹⁸ Hinaptinmi chay kimsa allinnin qari-qari runakuna, Filistea tropakunapa campamentonman yaykuruspanku, Belén llaqtapa punkunpi pozomanta yakuta hurqoramuspa Davidman aparamurqaku. Davidmi ichaqa mana tomayta munaspan chay yakuta Tayta Diospaq ofrendata hina tallispan

¹⁹ nirqa: ¡Diosyá libraykuwachun kay yaku tomanaymanta! ¿Imaynataq tomayman kay runakuna vidanta wañuyman churaykuspa apamusqanku yakutaqa? nispa. Chaynata nispanmi mana tomayta munarqachu. Chaytam chay kimsa allinnin qari-qari runakuna ruwarqaku.

²⁰ Joabpa wawqen Abisaimi karqa chay kimsa chunka allinnin qari-qari runakunapa kamachiqnin. Paymi huk kutipi lanzanwan wañurachirqa kimsa pachak soldadokunata. Chaynapim paypas chay kimsa allinnin qari-qari runakunawan kuska ancha reqsisqa karqa.

²¹ Abisaimi chay kimsa chunka allinnin qari-qari runakunamanta ancha reqsisqa karqa, chayraykum kamachiqninku karqa. Ichaqa manam chay kimsa allinnin qari-qari runakuna hinachu karqa.

²² Cabseel llaqtayuq Joiadapa churin Benaiam allinnin qari-qari runa kaspan hatun ruwaykunata ruwarqa. Paymi Moab nacionniyuq Arielpa iskay allinnin qari-qari churinkunata wañurachirqa. Huk punchawmi ritimuchkaptin uchkuman yaykuruspan huk leonta wañurachirqa.

²³ Egipto nacionniyuq hatunkaray runatapas lanza makintin hamuchkaqtam wañurachirqa. Chay egipcio runaqa karqa yaqa iskay metro parten sayayniyuqmi, lanzanñataqmi karqa telarpa rodillon hina. Benaiam huk kaspiwan pawaykurqa, hinaspam lanzanta qechuruspa chaywan wañurachirqa.

²⁴ Chaykuna ruwasqanwanmi Benaiaqa chay kimsa chunka allinnin qari-qari runakunapi ancha reqsisqa rikurirurqa.

²⁵ Chay kimsa chunkamanta ancha reqsisqa kachkaspapas manam chay kimsa allinnin qari-qari runakuna hinachu karqa. Chayraykum Benaiata David churarurqa waqaychaqnin soldadokunapa kamachiqnin kananpaq.

²⁶ Chay allinnin qari-qari runakunam kaykuna karqaku: Joabpa wawqen Asael, Belén llaqtayuq Dodopa churin Elhanán,

²⁷ Harod llaqtayuq Samot, Paltiel llaqtayuq Heles,

²⁸ Tecoa llaqtayuq Iquespa churin Ira, Anatot llaqtayuq Abiezer,

²⁹ Husa llaqtayuq Sibecai, Ahoh llaqtayuq Ilai,

³⁰ Netofa llaqtayuq Maharai, Netofa llaqtayuq Baanapa churin Heled,

³¹ Benjamín allpapi Gabaa llaqtayuq Ribaipa churin Itai, Piratón llaqtayuq Benaía,

³² Gaas mayupi yachaq Hurai, Arabá lawpi yachaq Abiel,

³³ Bahurim llaqtayuq Azmavet, Saalbim llaqtayuq Eliaba,

³⁴ Gizon llaqtayuq Hasempa churinkuna, Arar llaqtayuq Sagepa churin Jonatán,

³⁵ Arar llaqtayuq Sacarpa churin Ahiam, Urpa churin Elifal,

³⁶ Mequer llaqtayuq Hefer, Pelet llaqtayuq Ahías,

³⁷ Carmel llaqtayuq Hezro, Esbaipa churin Naarai,

³⁸ Natanpa wawqen Joel, Hagraipa churin Mibhar,

³⁹ Amón llaqtayuq Selec, Beerot llaqtayuq Naharai, paymi karqa Sarviapa wawan Joabpa arman apaq,

⁴⁰ Itri llaqtayuq Ira, Itra llaqtayuq Gareb,

⁴¹ Het llaqtayuq Urías, Ahlaipa churin Zabad,

⁴² Rubén ayllumanta kaq Sizapa churin Adina. Adinaqa karqa Rubén ayllukunapa kamachiqninmi, paypam karqa kimsa chunka runankuna.

⁴³ Maacapa churin Hanán, Mitni llaqtayuq Josafat,

⁴⁴ Astarot llaqtayuq Uzías, Aroer llaqtayuq Hotampa iskaynin churinkuna: Sama hinaspa Jehiel,

⁴⁵ Simripa churin Jediael, Tizi llaqtayuq wawqen Joha,

⁴⁶ Mahanaim llaqtayuq Eliel, Elnaampa iskay churinkuna: Jerebai hinaspa Josavía; Moab nacionniyuq Itma,

⁴⁷ Eliel, Obed hinaspa Mesoba llaqtayuq Jaasiel.