1~Corintios 9 - CHUYA QELLQA La Biblia en Quechua de Ayacucho 2012

Apostolpa derechonmanta

¹ Ñoqaqa, ¿manachum apóstol kani? ¿Manachum libre kani? ¿Manachum Señorninchik Jesucristotaqa rikurqani? ¿Manachum qamkunapas Señorman iñichisqay kankichik?

² Wakinkunapaq mana apóstol kaptiypas qamkunapaqmi ichaqa apóstol kani, qamkunata Señorman iñichisqaymi sello hina sutilla apóstol kasqaymanta kachkan.

³ Contraypi rimaqkunatam kaynata nini:

⁴ ¿Manachum kan derechoyku mikunaykupaq hinaspa tomanaykupaq?

⁵ ¿Sichum iñiq warmiwan casado kaspaqa manachum kuska puriymanku wakin apostolkuna hina? Chaynatam Señorpa wawqenkunapas hinaspa Pedropas ruwar-qaku.

⁶ ¿Icha ñoqawan Bernabeyllachu mana llamkanaykupaq kasaqku?

⁷ ¿Pitaq soldado kanman kikinmanta gastakuspan? ¿Pitaq uvasta tarpuspa mana rurunta mikunmanchu? ¿Pitaq ovejata uywachkaspan mana lechenta tomanmanchu?

⁸ Yanqataq kaykuna nisqayta creewaqchik runapa nisqanta hinalla,

⁹ Moisespa qellqasqan leypipas kaynatam nin: “Erapi trillaq bueyestaqa amam senqapankichu”, nispa. Diosqa kaytaqa nirqa manam animalkunamanta llakikuspachu,

¹⁰ aswanqa ñoqanchikpaq ejemplo kananpaqmi. Imaynam chakrapi yapukuqpas, trillakuqpas llamkan pagonta chaskinanpaq, chaynam kay leyqa qellqasqa karqa allinninchikpaq.

¹¹ Chaymi ñoqaykupas tarpuchkaq hina espiritumanta kaqkunata willachkaspaykuqa qamkunamanta cosechachkaq hina pagoykuta chaskinayku.

¹² Sichum hukkunapas qamkunamanta pagonta chaskichkaptinqa, ¿manachu ñoqaykuqa aswanraq chaskiymanku? Ichaqa manam chay derechoykutaqa chaskirqanikuchu, aswanqa kikiykum llamkakurqaniku, chaynapi Cristomanta allin noticia willasqayku mana yanqa-chasqa kananpaq.

¹³ Qamkunaqa yachan-kichikmi Diospa templonpi llamkaqkunaqa ofrendakunamanta mikusqankuta, altarpi llamkaqkunañataqmi altarman ofrenda apamusqankumanta mikunku.

¹⁴ Chaynataqmi Señorpas kamachikurqa allin noticia willakuqkunaqa, willakusqankumanta mantienekunankupaq.

¹⁵ Ichaqa manam chay derechoytaqa mañarqaykichikchu nitaqmi qellqamuchkaykichikpas imapas qowanaykichikraykuchu. Wañukuymi aswan allinqa kanman imapas qowanaykichikmantaqa. Qowaptikichikqa manañachá alabakuymanñachu.

¹⁶ Cristomanta allin noticia willakuyniyqa manam alabakunaypaqchu, aswanqa willakunaypunim. ¡Ay, imay-naraq kayman allin noticiata mana willakuspayqa!

¹⁷ Chayraykum kikillaymanta ruwaptiyqa premioy kapuwanqa, sichum mana voluntadwan ruwaspayqa Diospa kamachisqallantam ruwachkani.

¹⁸ Chay premioyqa Cristomanta allin noticiata mana imallapaq willakuymi hinaspa derechoyta mana mañakuspa llamkayniymi.

¹⁹ Mana pipa esclavon kachkaspaymi, esclavo hina churakuykurqani llapallanta servinaypaq, chaynapi achka runakunata Cristoman pusanaypaq.

²⁰ Judiokunawan kaspayqa judío hinam kani paykunata gananayrayku, Moisespa leynin kasukuqkunawan kaspayqa leytam kasukuni paykunata gananayrayku, chaynatam ruwani leytaqa mana kasukunay kachkaptinpas.

²¹ Moisespa leynin mana kasukuqkunata gananayraykum leyta mana kasukuq hina kani, chaywanpas Diospa leynintaqa kasukunim Cristopa leyninta kasukuspay.

²² Pisi iñiyniyuqpaqmi pisi iñiyniyuq churakurqani, lliwpaqmi tukuy imaymana kayman churakurqani paykunata gananayrayku, chaynapi hukkaqllantapas salvanaypaq.

²³ Tukuy chaykunatam ruwani Cristomanta allin noticia willakunayrayku hinaspa allin noticiamanta allin kaqkuna chaskinayrayku.

²⁴ Yachasqaykichikpi hinapas llallinakuspa kallpaypiqa achkam kallpanku, ichaqa hukllam premiotaqa chaskin, chaynayá qamkunapas kallpachkaq hina kawsaychik premio chaskinaykichikpaq.

²⁵ Kallpanankupaq preparakuqkunaqa tukuy mana allinninpaq kaqkunamantam waqaychakunku, chaynataqa ruwanku tukuruqlla premiota chaskinallankupaqmi, ñoqanchikmi ichaqa ruwachkanchik wiña-wiñaypaq premio chaskinanchikpaq.

²⁶ Ñoqaqa kallpani manam ñawsa hinachu nitaqmi peleanipas wayrata takachkaq hinachu.

²⁷ Aswanqa cuerpoytam yachakachini, hinaspam kasuwananpaq churani, yanqañataq hukkunamanpas willakuq kachkaspay kikiyñataq wischusqa karuyman.