1~Corintios 5 - CHUYA QELLQA La Biblia en Quechua de Ayacucho 2012

Huchallikuqta Pablopa juzgasqanmanta

¹ Yachanim qamkuna ukupi hukkaqnikichik madrastrallanwan kakusqanta, chay hatun huchataqa Diospi mana iñiqkunapas manam ruwanmankuchu.

² Chaywanpas penqakuywan kanaykichikpas kachkaptinmi hatun tukunkichikraq. Chayna ruwaq runataqa qamkuna ukumanta qarqoychik.

³ Manaña qamkunawan kaspaypas espiritupiqa qamkunawanmi kachkani, hinaspam chaypipas kachkayman hina juzgaruniña chay hucha ruwaqta.

⁴ Señor Jesucristopa sutinpi huñunakuychik, hinaptinqa ñoqapas espiritupim qamkunawan kasaq, qamkunawantaqmi kanqa Señorninchik Jesucristopa atiyninpas.

⁵ Chaynaqa, chay huchallikuq runapa cuerponyá Satanaspa makinman churasqa kachun ñakarichisqa kananpaq, chaynapi Señor Jesús kutimuptin espiritunñataq salvasqa kananpaq.

⁶ Chaynaqa, amayá alabakuykichikchu. ¿Manachu yachankichik aslla levadurapas achka masa poqochisqanta?

⁷ Wischuychikyá chay ñawpaq huchallichisuqnikichik levadurata, chaynapi musoq masamanta ruwasqa kanaykichikpaq. Qamkunaqa kankichik Pascua fiestapi mikuna mana levadurayuq tanta hinam. Kikin Cristom chakatasqa wañurqa ñoqanchikrayku, paymi Pascua Corderonchikqa.

⁸ Chaynaqa, Pascua fiestapi mana levadurayuq tantatayá mikusun, chay mana levadurayuq tantaqa tukuy sonqowan ruwasqanchikmi hinaspa cheqap rimasqanchikmi. Amayá huchallikusunchu nitaq mana allintapas ruwasunchu ñawpaq levadurayuq tanta ruwasqanchikta hinaqa.

⁹ Ñawpaq cartaypim nimurqaykichik huchapakuq runakunawanqa ama hukllawakunaykichikpaq.

¹⁰ Kaywanqa manam nichkaykichik kay pachapi llapallan huchapakuq runakunamanta, qollqella kuyaqkunamanta, suwakunamanta, ídolo yupaychaqkunamanta pasaypaq rakikurunaykichiktachu, chayna kaptinqa kay pachamantachiki lloqsikuchwanña.

¹¹ Qellqamurqaykichikqa iñiqmi kani nichkaspa huchapakuqkunawan, qollqella kuyaqkunawan, ídolo yupaychaqkunawan, cuento qepikunawan, sinkakuqkunawan hinaspa suwakunawan mana hukllawanakunaykichikpaqmi. Chaykunawanqa amam kuskapas mikunaykichikchu.

¹² Manam ñoqaqa mana iñiqkunataqa juzgaymanchu, iñiqkunatam ichaqa qamkuna juzganaykichik.

¹³ Diosmi mana iñiqkunataqa juzganqa. Qamkuna ukupi chay mana allin runataqa qarqoychik.