1~Corintios 2 - CHUYA QELLQA La Biblia en Quechua de Ayacucho 2012

Cristomanta Pablopa willakusqanmanta

¹ Wawqe-panillaykuna, Diosmanta qamkunaman willakuq hamuspayqa, manam sumaqllaña rimaywanchu nitaq hatun yachaywanchu willarqaykichik.

² Qamkunawan kaspayqa manam imamantapas yachaytaqa munarqanichu, aswanqa chakatasqa Jesucristollamantam.

³ Qamkunamanmi mana kallpayuq hina hinaspa manchakuymanta katkatatastin hamurqani.

⁴ Diosmanta willakuspayqa manam runakunapa yachayninman hinachu nitaq sumaq rimayman hinachu iñichiyta munarqani. Aswanqa iñichirqaykichikqa Chuya Espiritupa atiyninwanmi.

⁵ Chaynapi iñiynikichik mana runakunapa yachayllanpi sapinchasqa kananpaq, aswanqa Diospa atiyninpi.

Diosqa Espiritunwan reqsichikusqanmanta

⁶ Yachaymantaqa rimaniku iñiyninkupi wiñasqakunawanmi, ichaqa manam kay pachapi yachaytachu, nitaq kay pachapi kamachikuqkunapa yachaynintachu, chaykunaqa tukuruqllam.

⁷ Rimanikuqa Diospa waqaychaspa pakasqan yachay-mantam, chaytaqa manaraqpas kay pacha unanchasqa kachkaptinmi Diosqa tantearqaña, chaynapi ñoqanchik kancharinanchikpaq.

⁸ Kaytaqa manam kay pachapi mayqan kamachikuqkunapas yacharqakuchu, yachaspankuqa manachá Atiyniyuq Señorninchiktaqa chakatanmankuchu karqa.

⁹ Imaynam Qellqapa kayna nisqanman hina: “Diosmi kuyaqninkunapaq prepararqa, mana pipapas rikusqanta, mana pipapas uyarisqanta, mana pipapas piensasqanta”.

¹⁰ Diosmi Espirituntakama tukuy chaykunata reqsichiwarqanchik, Espirituqa tukuy imatam yachan, reqsintaqmi Diospa sonqonpi pakasqa kaqkunatapas.

¹¹ Runapa piensasqankunataqa manam huk runaqa yachanchu, aswanqa kikin runapa espiritullanmi, chaynataqmi Diospa piensasqantapas mana pipas yachanchu, aswanqa kikin Diospa Espiritullanmi.

¹² Ñoqanchikpas manam kay pachapi espiritutachu chaskirqanchik, aswan-qa Diosmanta hamuq Espirituntam, chaynapi Diospa kuyakuyninman hina qowasqanchikta yachananchikpaq.

¹³ Kaykunamantaqa rimaniku manam runapa yachayninwan yachachiwasqankuman hinachu, aswanqa Diospa Espiritunpa yachachiwasqankuman hinam, chaynapim yachachiniku Espiritumanta kaqkunata Espiritupa yachachisqan rimaykunawan.

¹⁴ Aychallaman hina kawsaq runaqa manam Diospa Espiritunmanta kaqkunataqa chaskinmanchu, paypaqa mana valeqpaqmi rikchakapun, nitaqmi entiendenchu, chaykunaqa espirituman hina entiendena kasqanrayku.

¹⁵ Espiritupa yanapasqan runam ichaqa tukuy imatapas juzganman, paytam ichaqa mana pipas juzganmanchu.

¹⁶ ¿Pitaq Señorpa piensasqanta yachanman? ¿Pitaq payta consejayta atinman? Ñoqanchikmi ichaqa Cristopa piensasqanman hina piensanchik.