1~Corintios 15 - CHUYA QELLQA La Biblia en Quechua de Ayacucho 2012

Cristopa kawsarimusqanmanta

¹ Kunanqa wawqe-panikuna, Cris-tomanta allin noticia willasqaytam yuyarinaykichikta munani, chayqa chaskisqaykichik noticiam, chaywantaqmi qamkunaqa qaqa hina sayachkankichik.

² Chay allin noticiawanmi qamkunaqa willasqayman hina salvasqa kankichik, mana chayqa yanqapaqchiki iñiwaqchik karqa.

³ Tukuymanta llalliqtaqa chaskisqayman hinam yachachirqaykichik: Qellqapa nisqanman hinam Cristoqa huchanchikkunarayku wañurqa.

⁴ Chaynallataq Qellqapa nisqanman hina, pampasqa kasqanmanta kimsa punchawman kawsarimurqa,

⁵ hinaspam Pedroman rikuriykurqa. Chaymantañataqmi rikuriykurqa chunka iskayniyuq apostolninkunaman,

⁶ hinaspa pichqa pachak masnin huñunasqa wawqe-panikunaman, wakinkunaqa kaw-sakuchkanraqmi, wakinkunam ichaqa wañukunkuña.

⁷ Chaymantañataqmi Jacoboman hinaspa llapallan apostolkunaman rikuriykurqa.

⁸ Tukupaytañataqmi mana tiemponpi nacemuq wawaman hina ñoqaman rikuriykuwarqa.

⁹ Ñoqaqa llapallan apostolkunamantapas taksan kaqmi kani, ñoqaqa iñiqkunata ñakarichisqayraykum mana apostolwan sutichawanankupaq hinachu kani.

¹⁰ Ichaqa Diospa kuyapayakuyninman hinam kunanqa apostolña kani, paypa kuyapayawasqanqa manam yanqapaqchu karqa, ñoqaqa llamkachkani wakin apostolkunamantapas mastaraqmi, ichaqa manam kikillaymantachu aswanqa Diospa yanapakuyninwanmi.

¹¹ Manam imananchu ñoqa willakuptiypas otaq paykuna willakuptinkupas, kay willakusqaykuraykum qamkunapas iñirqankichik.

Wañukuqkunapa kawsarimunanmanta

¹² Willakunikuqa Cristopa kawsarimusqanmantam, hinaptinqa, ¿imaynamá wakiqnikichikqa ninkichik: Wañuqkunaqa manam kawsarimunqachu, nispaykichikqa?

¹³ Sichum wañuqkuna mana kawsarimunan kaptinqa Cristopas manachiki kawsarimurqachu.

¹⁴ Sichum Cristo mana kawsarimuptinqa yanqapaqchiki kay willakusqaykupas kanman, manataqchiki iñisqaykichikpas valenmanchu.

¹⁵ Chayna kaptinqa ñoqaykupas Diospa llulla testigonkunachá kaymanku “Diosmi Cristota kawsarirachirqa nisqaykumanta”. Wañuqkuna mana kawsarimunan kaptinqa manataqchiki Diospas Cristota kawsarichimurqachu.

¹⁶ Wañuqkuna mana kawsarimunan kaptinqa Cristopas manataqchiki kaw-sarimurqachu.

¹⁷ Cristo mana kawsarimuptinqa yanqapaqchiki iñisqaykichikpas, chaynaqa hinallaraqmi huchapi kachkankichik.

¹⁸ Chayna kaptinqa Cristopi iñispa wañukuqkunapas chinkasqachiki kachkanku.

¹⁹ Sichum kay pachapi kawsanallapaq Cristopi confiakuspanchikqa, lliw runakunamantapas aswan llakipayaypaqmi kachkanchik.

²⁰ ¡Manam chaynachu! Cristoqa kaw-sarimurqam, payqa wañuqkunamanta punta kawsarimuqmi.

²¹ Imaynam kay pachaman wañuy huk runantakamalla yaykumurqa, chaynataqmi kawsarimuypas huk runantakamalla hamurqa.

²² Imaynam Adanpa huchallikus-qanwan llapallan runa wañun, chaynallataqmi Cristopi iñiqkunapas llapallan kawsarimunqa.

²³ Ichaqa sapakamam qatinasninpi kawsarimunqa: Cristom puntata kawsarimurqa, pay hamuptinñataqmi iñiqninkunapas kawsarimunqa.

²⁴ Chaymantañam tukupay tiempo chayamunqa, chay tiempopiqa Cristom llapallan atiyniyuqkunata, munayniyuqkunata hinaspa autoridadkunata chinkarachinqa, hinaspam munaychakuyninta Dios Taytanmanña qoykunqa.

²⁵ Cristoqa munaychakunqa llapallan enemigonkunata Dios saruchinankamam.

²⁶ Qepallaña chinkachinapaq kaq enemigoqa wañuymi.

²⁷ Diosmi tukuy imata Cristowan saruchirqa. Chuya Qellqapim kaynata nin: Paytaqa tukuy imapa hawapim churaykurqa, nispa. “Tukuy imata” nispaqa manam Diospipas munaychakunqam nichkanchu, aswanqa Diosmi Cristowan tukuy imata saruchin.

²⁸ Tukuy imapi Cristo munaychaku-ruspanñam paypas Taytanpa munaychakusqan kanqa, chaynataqa ruwanqa tukuy imata Taytan saruchisqanman hinam. Chaynapim tukuy imakunapipas Diosña munaychakunqa.

²⁹ Wakin iñiqkunam bautizakunku wañuqkunarayku. Wañuqkuna mana kawsarimunan kach-kaptinqa, ¿imanasqataq chaytaqa ruwanku?

³⁰ Chaynaqa, ñoqaykupas ¿imapaqtaq peligrollapi tukuy tiempo kachkaniku?

³¹ Arí wawqe-panikuna, sapa punchawmi wañuypa patanpi hinaña kachkani. Ichaqa Señor Jesucristopi kasqaykichikwanmi kusisqa kachkani.

³² Ñoqam purun animalkunawan Éfeso llaqtapi pelearqani, chaywanqa, ¿imatataq hurqokuni? Wañuqkuna mana kawsarimunan kaptinqa allintam ninku: Mikukusun, upyakusun, paqarinqa wañukusunmi, nispanku.

³³ Amayá engañachikuychikchu, mana allin rimaykunaqa allin kawsakuytam pierdechin.

³⁴ Allinta rikchapakuspayá ama huchallikuychikchu, wakiqnikichikqa manaraqmi Diosta reqsinkichikchu, penqakunaykichikpaqmi kaytaqa nikichik.

Wañuqkunapa imaynam kawsarimunanmanta

³⁵ Icha pipas tapukunman: ¿Imaynatataq wañuqkunaqa kawsari-munqa? ¿Imayna cuerpoyuqtaq kawsa-rimunqa? nispanku.

³⁶ ¡Mana yuyayniyuqpa tapukuynin-mi chayqa! Muhu tarpusqaykiqa wañunqaraqmi musoq planta wiñamunanpaqqa.

³⁷ Tarpunchikqa manam plantatañachu aswanqa muhullatam, trigo kaptinpas otaq sapaq muhu kaptinpas.

³⁸ Chaymantaqa Diosñam sapakamata wiñachin imayna sayayniyuqtapas munasqanman hina.

³⁹ Manam llapan aychaqa chay hinallachu, runakunapa aychanqa huk rikchaqmi, huk rikchaqtaqmi animalkunapa aychanpas, alton pawaq animalkunapa aychanpas chaynataq challwakunapa aychanpas.

⁴⁰ Kachkantaqmi hanaq pachamanta cuerpopas chaynataq kay pachamanta cuerpopas, ichaqa hanaq pachapi kaq cuerpokunapa sumaq kayninqa huk rikchaqmi, kay pachapi cuerpokunapa sumaq kayninpas huk rikchaqtaqmi.

⁴¹ Intipa achkiyninqa huk rikchaqmi killapa achkiyninmantaqa, huk rikchaqtaqmi sapakama chaskakunapa achkiyninpas.

⁴² Chaynataqmi, wañuqkunapas kawsa-rimuspankuqa huk rikchayniyuq kanqaku. Wañuqta pampaptinchikqa ismurunmi, kawsarimuspanmi ichaqa manaña wañunqachu.

⁴³ Wañuqpa ayantaqa pampanchik asnarichkaqtam, kawsarimunqam ichaqa kancharichkaqña. Pampanchikqa manaña kallpayuqtam, kawsarimunqam ichaqa kallpasapallaña.

⁴⁴ Pampanchikqa aycha cuerpollatam, kawsarimunqam ichaqa espirituman hina cuerpoyuqña, kanmi kay pachamanta kaq cuerpo, kantaqmi hanaq pachamanta cuerpopas.

⁴⁵ Chuya Qellqapim kaynata nin: Punta kaq Adanmi kawsaq runa karqa, qepa kaq Adanñataqmi kawsay qokuq Espíritu, nispa.

⁴⁶ Manam espiritumanta kaqchu punta cuerpoqa aswanqa aychamanta kaqmi, chaymantañam Espiritumanta cuerpoqa.

⁴⁷ Punta kaq runaqa kay pachamantam karqa allpamanta ruwasqa, qepa kaq runam ichaqa hanaq pachamanta hamurqa, payqa Señormi.

⁴⁸ Kay pachapaqmi runaqa ruwasqa karqa, kay pachapaqtaqmi runakunapas kanchik. Hanaq pachamantam Cristoqa karqa, hanaq pachapaqtaqmi iñiqkunapas kanchik.

⁴⁹ Imaynam allpamanta ruwasqa runaman rikchakunchik, chaynataqmi hanaq pachapi kaqmanpas rikchakusunchik.

⁵⁰ Nikichikmi wawqe-panikuna, aychayuq yawarniyuq runaqa manam Diospa munaychakusqanmanqa yaykunqachu, tukuruqlla kaqpas manataqmi chaskinmanchu mana tukuq kaqtaqa.

⁵¹ Kunanmi manaraq pipapas yachas-qanta nisqaykichik: Manam lliwchu wañusunchik, ichaqa lliwmi tikrasqa kasunchik.

⁵² Huk ñawi qemchiyllatam trompetapa tukupay tocayninpi tikrasqa kasunchik, trompetata tocaykamuptinmi wañuqkuna kawsarimunqa manaña wañunankupaq, ñoqanchikpas tikrasqam kasunchik.

⁵³ Kay tukuruqlla cuerponchikmi musoq pachawan pachakuchkaq hina mana tukuqman tikrakunqa, wañuqlla cuerponchikñataqmi wiñaypaq kaqman tikrakunqa.

⁵⁴ Kay tukuruqlla cuerponchikmi mana tukuqmanña pachakunqa, kay wañuqlla cuerponchik manaña wañuqwan pachakuruptinña-taqmi Qellqapa kayna nisqan cumpli-kunqa: “Wañuyqa vencesqañam kachkan,

⁵⁵ yaw wañuy, ¿maytaq wañuchikuq kayniki? ¿Maytaq wañuchina puyaykiqa?”

⁵⁶ Wañuypa puyanmi hucha, leyñataqmi huchapa atiynin.

⁵⁷ Ichaqa Diosman gracias kachun Señor Jesucristowan vencesqanchikmanta.

⁵⁸ Chaynaqa, kuyasqay wawqe-pani-llaykuna, qaqa hina sayaspayá Señorpa llamkayninpi aswan llamkaychik. Qamkunaqa yachankichikmi Señorpaq llamkasqaykichikqa manam yanqapaqchu kanqa.