1~Corintios 13 - CHUYA QELLQA La Biblia en Quechua de Ayacucho 2012

¹ Sichum ñoqa rimayman runa-kunapa chaynataq angelkunapa rimayninpipas, ichaqa mana kuyakuyniy kaptinqa campanapa otaq platillopa chinchinyaynin hinallam kani.

² Sichum profetizayman, pakasqa kaqkunatawan, reqsiymantaq tukuy rikchaq yachaykunatapas chaynataq iñiyniypas kanman orqokunata maymi kasqanmanta suchuchinaypaq, mana kuyakuyniy kaptinqa manam imapaqpas valenichu.

³ Sichum tukuy kapuqniykunata wakchakunaman aypuruyman, cuerpoytapas kañasqa kananpaq entregayman, ichaqa mana kuyakuyniy kaptiyqa manam imapaqpas servinchu.

⁴ Pipas kuyakuyniyuqqa pacienciakuqmi, imapas qokuykuqmi, manam envidiosochu, manam hatun tukuqchu, manam alabakuqchu,

⁵ manam penqaypaq ruwaqchu, manam kikillanpaq munaqchu, manam piñakuqchu, nitaqmi cheqnikuqchu,

⁶ manataqmi kusikunchu hukpa huchankunamantapas, aswanqa cheqap kaqmantam kusikun.

⁷ Tukuytam ñakarin, tukuytam creen, tukuytam suyan, tukuytam aguantan.

⁸ Kuyakuyqa wiñaypaqmi, profeciakunam ichaqa tukunqa, mana reqsisqanchik rimaypi rimaykunapas tukunqam, yachaypas manañam kanqañachu.

⁹ Wakillantam yachanchik, wakillantataqmi profetizanchikpas.

¹⁰ Cheqap kaq hamuruptinqa, wakin yachasqanchikmi tukurunqa.

¹¹ Taksallaraq kaspayqa warma hinam rimarqani, piensarqani, yuyaymanarqani, hatunyaruspaymi ichaqa manaña warma hinañachu ruwani.

¹² Kunanqa espejopi hinam chinka-chinkallata qawachkanchik, ichaqa huk punchawmi imam kaqta rikusunchik. Kunanqa reqsini wakillantam, chay punchawmi ichaqa tukuy imata reqsisaq imaynam ñoqata Dios reqsiwasqanta hina.

¹³ Kunanqa takyachkan iñiyllam, confianzawan suyayllam hinaspa kuyakuyllam. Kay kimsanmanta aswan allinqa kuyakuyllam.