1~Corintios 12 - CHUYA QELLQA La Biblia en Quechua de Ayacucho 2012

Atiyninta Chuya Espíritu qowasqanchikmanta

¹ Wawqe-panikuna, Chuya Espi-ritupa atiynin sapakamaman qowasqanchikmantam yachanaykichikta munani.

² Qamkunaqa yachankichikmi, manaraq iñikuchkaspaykichikqa mana rimaq idolokunamanmi ñawsa hina aysasqa karqankichik.

³ Chaynaqa, kaytayá yachaychik “Jesusqa ñakasqayá kachun” niq runaqa manam Diospa Espiritunpa atiyninwanchu rimachkan. Manataqmi pipas ninmanchu: “Jesusqa Señormi” nispaqa mana Chuya Espíritu rimachiptinqa.

⁴ Tukuy rikchaq atiykunam kan, Espiritum ichaqa hina kaqlla.

⁵ Achka llamkaykunam kan servikunapaq, Señormi ichaqa hina kaqlla.

⁶ Atiypa tukuy rikchaq ruwayninkunam kan, ichaqa kikin Diosllam atiyninwan llapa runakunapi ruwan.

⁷ Diosmi sapakamaman Chuya Espiritupa atiyninta qon, llapallanpa allinninpaq.

⁸ Espirituntakamam wakinman atiyta qon yachaywan rima-nanpaq, wakinmanñataq yuyaywan rima-nanpaq.

⁹ Chay Espirituntakamallataq-mi wakinmanpas qon iñiy atiyta, wakin-manñataqmi onqoqkunata sanoyachi-nanpaq,

¹⁰ wakinmanñataq milagrokuna ruwananpaq, wakinmanñataqmi pro-fetizananpaq, wakinmanñataq espiritukunata reqsinanpaq, wakinmanñataq mana reqsisqa rimaykunata rimananpaq, wakinmanñataq chay rimaykuna uya-risqanta interpretananpaq.

¹¹ Aswanqa tukuy kaykunataqa ruwan kikin Chuya Espiritullam, paymi munasqanman hina sapakamaman kaykunataqa qon.

Iñiqkunaqa huk cuerpolla kasqanchikmanta

¹² Runapa cuerponqa huklla kachkaspapas achka parteyuqmi, ichaqa achka parteyuq kachkaspapas huk cuerpollam, chaynam Cristopas.

¹³ Llapallanchikmi judiopas, griegopas, esclavopas hinaspa librepas chulla Espiritullawan bautizasqa karqanchik, chaynapi huk cuerpollaña kananchikpaq, huk Espiritullatataqmi chaskirqanchikpas.

¹⁴ Cuerpoqa manam huk parteyuqllachu aswanqa achka parteyuqmi.

¹⁵ Sichum chaki ninman: “Ñoqaqa manam makichu kani chaymi mana cuerpopachu kani” nispa, chaynata nispaqa manam cuerpopa parten kaymantaqa sapaqchakunmanchu.

¹⁶ Sichum rinripas ninman: “Ñoqaqa manam ñawichu kani chaymi mana cuerpopachu kani” nispa, chaynata nispaqa manam cuerpopa parten kaymantaqa sapaqchakunmanchu.

¹⁷ Lliw cuerpo ñawilla kaptinqa ¿maypitaq rinriqa kanman? Otaq lliw cuerpo rinrilla kaptinqa, ¿maypitaq senqaqa kanman?

¹⁸ Chaynaqa, Diosmi cuerpopa partenkunataqa maymi munasqan sitiopi churarqa.

¹⁹ Sichum llapallan partekuna huknillan kaptinqa ¿maypitaq cuerpoqa kanman?

²⁰ Achka parteyuq kaspapas cuerpoqa hukllam.

²¹ Manam ñawiqa ninmanchu makita, “Manam necesitaykichu” nispaqa, nitaqmi umapas ninmanchu chakita, “Manam necesitaykichu” nispaqa.

²² Aswanqa cuerpopa manayniraq hina parten kaqkunataraqmi mastaqa necesitanchikpas,

²³ cuerpopi mana ancha kaqpaq hapisqanchiktaraqmi aswan sumaqtaraq pachachinchik, mana qawachikunapaq kaqkunatañataqmi allinta cuidanchik.

²⁴ Qawachikunapaq kaqkunatam ichaqa mana cuidanchikchu. Diosmi ruwarqa cuerpopa manayniraqpaq hapisqa partenta allin cuidasqa kananpaq,

²⁵ chaynapi cuerpopi kaqkunaqa mana rakinasqa kanankupaq, aswanqa llapanku hukninkumanta hukninkukama yanapanakunankupaq.

²⁶ Cuerpopa hukkaqnin parten ñakariptinqa wakiqninkupas ñakarintaqmi, huknin parten allin kuyasqa kaptinqa llapallantaqmi kusikunku.

²⁷ Qamkunaqa Cristopa cuerponmi kankichik, sapakamam chay cuerpopa parten kankichik.

²⁸ Diosmi iglesiapi puntata churarqa apostolkunata, iskay kaqpiñataq profetakunata, kimsa kaqpiñataq yachachiqkunata, chaymantañataq milagrokuna ruwaqkunata, onqoqkuna sanoyachiqkunata, yanapa-kuqkunata, imamantapas nanachikuqkunata hinaspa mana yachasqanchik rimaykuna rimaqkunata.

²⁹ ¿Llapallanchu apostolkuna? ¿Llapallankuchu profetakuna? ¿Llapallankuchu yachachiqkuna? ¿Lliwchu milagro ruwaqkuna?

³⁰ ¿Lliw-taqchu onqoqkunata sanoyachinku? ¿Lliwchu mana reqsisqanchik rimaykunata rimanku? ¿Lliwtaqchu mana reqsisqanchik rimaykunata interpretanku? ¡Manam!

³¹ Qamkunaqa Diospa allinnin atiynintayá maskaychik. Ñoqam ichaqa imaynam aswan allin kawsanaykichikta qawachisqaykichik.