1~Corintios 11 - CHUYA QELLQA La Biblia en Quechua de Ayacucho 2012

¹ Imaynam ñoqapas Cristopa ruwas-qanta hina ruwani, chaynayá qamkunapas ñoqapa ruwasqayta hina ruwaychik.

Warmikunaqa imaynam huñunakuypi kanankumanta

² Wawqe-panillaykuna alabaykichikmi yuyariwasqaykichikmanta hinaspa yachachisqaykuna kasukusqaykichik-mantapas.

³ Ichaqa munanim kay yachanaykichikta: Cristoqa llapa qaripa umanmi, qariñataqmi warminpa uman Diosñataqmi Cristopa uman.

⁴ Sichum huk qari uman sukutasqa Diosta mañakunqa otaq profetizanqa, hinaspaqa umantam penqayman churan.

⁵ Sichum huk warmi qala umalla Diosta mañakunqa otaq profetizanqa, hinaspaqa umantam penqayman churan, payqa uman kachiy-kachiy rutusqa hinam kachkan.

⁶ Huk warmi umanta mana sukutakuspaqa allinmi kanman rutuchikuynin. Sichum uman rutuchikuynin otaq kachiy-kachiy kaynin penqaypaq kaptinqa sukutakuchunyá.

⁷ Qariqa manam umantaqa sukutakunanchu, payqa Diosman rikchakuqmi hinaspa Dios hatunchaqmi, warmiñataqmi qari hatunchaq.

⁸ Qariqa manam warmimantachu karqa, aswanqa warmim qarimanta karqa.

⁹ Manam qarichu warmirayku unanchasqa karqa, aswanqa warmin qarirayku unanchasqa karqa.

¹⁰ Chay-raykum warmiqa umanta sukutakunan qariman sujetasqa kasqanta angelkunamanpas qawachinanpaq.

¹¹ Chayraykum Señorpa qayllanpiqa qaripas mana kanmanchu mana warmi kaptinqa, manataqmi warmipas kanmanchu mana qari kaptinqa.

¹² Imaynam warmiqa qarimanta hamun, chaynataqmi qaripas warmimanta nacemun, ichaqa llapallanmi Diosmanta paqarimunku.

¹³ Qamkunayá tanteaychik: ¿Allinchu kanman huk warmi mana umanta sukutakuspan Diosta mañakuynin?

¹⁴ Costumbrepunim yachachiwanchik, qaripa chukchasapa kayninqa penqaypaq kasqanta.

¹⁵ Warmipaqñataqmi chukchasapa kayninqa kusallaña, velowan sukutakunanpa rantinpi servikusqanrayku.

¹⁶ Chaynaqa, pipas kaymanta atipanakuyta munaspaqa yachachunyá, ñoqanchikpipas chaynataq iglesiakunapipas chay costumbreqa manam kanchu.

Santa Cenapi mana allin ruwasqankumanta

¹⁷ Kayta qellqamuspayqa manam alabaykichikmanchu, huñunakuynikichik allin kananpaq kachkaptinmi mana allinllapaq huñunakunkichik.

¹⁸ Willawasqankutam uyarini, qamkunapa huñunakuynikichikpis rakinakuykuna kan. Cheqaptaqa niwasqankuman hinam creeni.

¹⁹ Arí, qamkunapiqa kananmi rakinakuykunaqa, chaynapi pikunam cheqap iñiqkuna kasqankuta yachanapaq.

²⁰ Huñunakuspaykichikpas manañam Señorpa Cenanta mikunaykichikpaqñachu huñunakunkichik.

²¹ Santa Cena hora chayaramuptinmi sapakama mikuyta qallaykunkichik, wakiqnikichikñataqmi yarqaymanta kachkankichik, hukkunañataqmi sinkakuchkankichik.

²² ¿Manachu wasikichikpi imapas mikunaykichikpaq hinaspa tomanaykichikpaq kan? Chaynata ruwaspaqa Diospi iñiq-kunatam despreciachkankichik, chaynataqmi wakchakunata penqayman churachkankichik. ¿Imatataq nikichikman? ¿Alabaykichikmanchu? ¡Manam kaymantaqa alabaykichikmanchu!

Santa Cenamanta

²³ Kay yachachisqaytaqa kikin Señormantam chaskirqani. Entregasqa kasqan tutam Señor Jesús hapiykurqa tantata.

²⁴ Diosman graciasta qoykuspanmi pakiykurqa hinaspam nirqa: Mikuychik, kaymi cuerpoy qamkunarayku pakipasqa. Qamkunapas kaynatam ruwankichik ñoqamanta yuyariwanaykichikpaq, nispa.

²⁵ Cenayta tukuruspanñataqmi copata hapiykuspan nirqa: Kay copam yawarniywan ruwasqay musoq pacto, kayta sapa kuti tomaspam ñoqamanta yuyariwankichik, nispa.

²⁶ Kay tantata sapa kuti mikuspam, kay copamanta tomaspam Señorpa kutimunankama wañusqanmanta willakunkichik.

Santa Cenamanta

²⁷ Chaynaqa, pipas mana chaypaq hina kachkaspa Señorpa tantan mikuqqa hinaspa Señorpa copanmanta tomaqqa Señorpa cuerponpa hinaspa yawarninpa contranpim huchallikuchkan.

²⁸ Chaynaqa, sapakamayá sonqonta tapukuchun manaraq tantata mikuchkaspa hinaspa copamantapas manaraq tomachkaspa.

²⁹ Sichum pipas mikunqa hinaspa tomanqa Señorpa cuerpon kasqanta mana piensarispan hinaspaqa mikunqapas tomanqapas kikinpa castigonpaqmi.

³⁰ Chayraykum qamkuna ukupiqa achkaq onqoqkuna hinaspa eqoyasqakuna kachkan, wakinqa wañukunkuñam kanpas.

³¹ Sichum sonqonchikta sumaqta tapukuptinchikqa Señorqa manam juzgawachwanchu.

³² Juzgaspam Señorqa castigawanchik chaynapi mana Diospi iñiqkunawan kuska mana condenasqa kananchikpaq.

³³ Chaynaqa, wawqe-panillaykuna, Santa Cenapaq huñunakuspaqa suyanakuychikyá kuska mikunaykichikpaq.

³⁴ Pipas yarqaymanta kaspaqa wasinpiyá mikumuchun chaynapi huñunakuypi chayna ruwasqaykichikmanta Dios mana castigasunaykichikpaq. Wakin asuntokunataqa hamuspayñam allichasaq.