1~Corintios 10 - CHUYA QELLQA La Biblia en Quechua de Ayacucho 2012

Idolokunapa contranpi yachachikuymanta

¹ Wawqe-panikuna munanim kaykuna yachanaykichikta. Ñawpaq taytanchikkunaqa llapallankum puyupa llantuyninpi karqaku, hinaspam llapallanku Puka lamar qochanta pasarqaku.

² Chaynapim llapallanku Moiseswan huklla kanankupaq puyupi hinaspa lamar qochapi bautizasqa karqaku.

³ Chaynataqmi Diospa qomusqan mikuyllata llapallanku mikurqaku.

⁴ Llapallankutaqmi huk rikchaq yakullata tomarqaku, chay yakuqa qaqamanta lloqsimuqmi karqa, chay qaqaqa paykunawan riq Cristom karqa.

⁵ Ichaqa paykunamantam Diosqa mana agradakurqachu, chaymi purunpi achkaq wañururqaku.

⁶ Chaykunaqa pasakurqa ñoqanchikpaq huk ejemplo hina kananpaqmi, chaynapi paykunapa mana allin munapayasqanta hina ñoqanchikpas mana munapayananchikpaq.

⁷ Chaynaqa, wakinkuna hinaqa amayá idolokunataqa yupaychaychikchu, Chuya Qellqapim kaynata nin: “Runakunam tiyaykuspanku mikurqaku, tomarqaku hinaspam hatarispanku aychankuta kusichirqaku”, nispa.

⁸ Amayá paykuna hinaqa huchapakuyman wichisunchu, chaynapim paykunamanta huk punchawllapi iskay chunka kimsayuq waranqa runakuna wañururqaku.

⁹ Amataqyá Señortapas tentasunchu, imaynam paykunamanta wakiqninkupa tentasqanta hinaqa, chaynapim paykunamanta kaqkunaqa wakiqninku maqta urupa kachusqan wañururqaku.

¹⁰ Paykunamanta wakiqninku hinaqa amataqyá Diospa contranpiqa rimaychikchu, chayraykum paykunataqa wañuchiq ángel wañurachirqa.

¹¹ Tukuy chaykunam ñawpaq taytanchikkunata pasarqa, ejemplonchik kananpaq, chaykunam qellqasqa karqa qepa tiempokunapi yuyayta hapispa allinta kawsananchikpaq.

¹² Chaynaqa, pipas qaqa hina sayasqanpaq hapikuqqa wichiykunanmanta cuidakuchun.

¹³ Tentasqa kasqaykichikqa manam wakinkunapa tentasqa kasqankumantaqa maschu. Ichaqa Diosmi hapipakuna kasqanrayku mana munanqachu mana aguantay atinaykichikkama tentasqa kanaykichiktaqa. Tentacionkuna hamuptinqa Diosmi yanapasunkichik chaymanta lloqsinaykichikpaq.

¹⁴ Chaynaqa, kuyasqay wawqe-panillaykuna, idolokuna yupaychaymanta ayqekuychik.

¹⁵ Yachayniyuq runakuna kaptikichikmi rimapayaykichik, chaynaqa qamkunayá nisqaykunata yuyaymanaychik.

¹⁶ Señorpa cenanta tomaspa Diosman graciasta qospanchikqa ¿Manachu Cristopa yawarninman hukllawakuchkanchik? Tantata pakispanchikpas ¿Manachu Cristopa cuerponman hukllawakuchkanchik?

¹⁷ Tantaqa chullallam, ñoqanchikñataqmi achkallaña kachkaspapas huk cuerpolla kanchik, llapallanchik huk tantallamanta mikusqanchikrayku.

¹⁸ Qawaychik Israel llaqtapa ruwasqanta: Sacrificiopaq ruwasqanku aychata mikuqkunaqa ¿Manachu altarwan hukllawasqa kanku?

¹⁹ Chaynaqa, ¿ima nisaqtaq? ¿Idoloqa ima allintaq karqa? ¿Chayman sacrificasqa aychaqa valorniyuqchu karqa?

²⁰ Diospi mana iñiq runakuna animalkunata ofrecespankuqa demoniokunamanmi ofrecechkanku, manam Diosmanchu. Chaynaqa, manam munanichu demoniokunawan hukllawakunaykichiktaqa.

²¹ Señorpa copanmanta tomachkaspaqa manam demoniokunapa copanmantaqa tomawaqchikchu, nitaqmi Señorpa mikunanmanta mikuchkaspapas demoniokunapa mikunanmantaqa mikuwaqchikchu.

²² ¿Señortachu piñachisun? ¿Paymanta aswan kallpayuqchu kanchik?

Libre kaspa kuyanakunanchikmanta

²³ Tukuy ima munasqaytaqa ruwaymanmi, ichaqa manam lliwchu allinniypaq kanman. Tukuy imatam ruwachwan, ichaqa manam lliwchu wiñachikun.

²⁴ Amayá pipas kikillanpa munasqantaqa maskachunchu, aswanqa wakinkunapa allinnintayá maskachun.

²⁵ Aycha qatupi rantikusqanku aycha-taqa lliwtayá mikuychik, concienciaykichikrayku ama imatapas tapukuspa.

²⁶ “Señorpam tukuy kay pachapi kaqkunaqa, paypataqmi kay pachapi tukuy ima kaqkunapas”.

²⁷ Sichum Diospi mana iñiq runakuna convidasuptikichikqa imam qarasusqaykichiktayá concienciaykichikrayku ama imatapas tapukuspa mikuychik.

²⁸ Sichum pipas nisunkichik: “Kay aychaqa idolokunaman ofrecesqam karqa” nispa, hinaptinqa willasusqaykichikraykum hinaspa concienciaraykum ama mikunkichikchu.

²⁹ Rimachkaniqa hukpa conciencianmantam, manam qamkunapamantachu. Ichapas hukkaqnin tapukunman: ¿Imanasqataq libre kayniytaqa huk runapa conciencianraykuqa juzgawanman?

³⁰ Diosman graciasta qospay mikusqaymantaqa, ¿imanasqataq contraypiqa rimanmanku graciasta qospay mikuchkaptiyqa? nispa.

³¹ Mikuspapas tomaspapas otaq imataña ruwaspapas llapantayá Dios hatunchasqa kananpaq ruwaychik.

³² Amayá judiokunatapas, mana judiokunatapas, nitaq Diospi iñiqkunatapas huchallichiychikchu.

³³ Ñoqaqa llapallankutam lliwpi agradayta munani, manam kikillaypa allinniyta maskaspaychu, chaynapi salvasqa kanankupaq.