1~Corintios 1 - CHUYA QELLQA La Biblia en Quechua de Ayacucho 2012

Cartapa qallariyninmanta

¹ Ñoqa Pablotam munayninman hina Dios qayaykuwarqa Jesucristopa apostolnin kanaypaq. Iñiqmasinchik Sostenespiwanmi

² Corinto llaqtapi iglesiaman kay cartata qellqamuykichik, qamkunaqa kankichik Cristo Jesuspi Diospa akllasqankunam. Diosmi qayasurqankichik Señor Jesucristota maypipas yupaychaqkunawan kuska akllasqakuna hina kawsanaykichikpaq. Jesusmi, paykunapapas ñoqanchikpapas Señorninchikqa.

³ Dios Taytanchikwan Señorninchik Jesucristoyá hawkayaytawan kuyakuyninta qamkunaman qosunkichik.

Cristorayku bendecisqa kaymanta

⁴ Tukuy tiempom qamkunamanta Diosman graciasta qoni, Jesucristontakama kuyakuyninta Dios qosusqaykichikmanta.

⁵ Cristowan huklla kasqaykichikraykum Dios yanapasurqankichik allinta rimanaykichikpaq hinaspa allin yachayniyuq kanaykichikpaq.

⁶ Cristomanta willakusqaykutam qamkunaqa allin kawsakuynikichikwan willakuchkankichik.

⁷ Chaynapi Señorninchik Jesucristo rikurimunanta suyasqaykichikpi, Diospa qosusqaykichik mayqan atiyninpas mana pisisunaykichikpaq.

⁸ Paytaqmi tukupay tiempokama takyachisunkichik, Señor-ninchik Jesucristo kutimuptin mana pipapas acusasqan kanaykichikpaq.

⁹ Diosqa prometesqantaqa cumplinmi, payqa Churin Señorninchik Jesucristowan huklla kanaykichikpaqmi qayasurqankichik.

Iñiqpura rakinakurusqankumanta

¹⁰ Wawqe-panillaykuna, Señorninchik Jesucristopa sutinpim ruegakamuykichik, rimaynikichikpas hukllayá kachun, amayá qamkunapiqa rakinakuyqa kachunchu; qamkunaqa huk sonqollayá hinaspa huk piensayniyuqllayá kaychik.

¹¹ Wawqe-panikuna, Cloepa ayllunmi niwan qamkuna ukupi liryanakuy kas-qanmanta.

¹² Kaytam nisqaykichik, qam-kunam kaynata ninakunkichik: Ñoqaqa Pablopam kani, ñoqaqa Apolospam kani, ñoqaqa Pedropam kani, ñoqañataqmi Cristopa kani, nispaykichik.

¹³ ¿Cristoqa rakinasqachu kachkan? ¿Pablochu qamkunarayku chakatasqa karqa? ¿Icha Pablopa sutinpichum bautizasqa karqankichik?

¹⁴ Diosman gracias kachun manam mayqannikichiktapas bautizarqaykichikchu, ñoqaqa bautizarqani Crispotawan Gayollatam,

¹⁵ chaynaqa manam pipas ninmanchu sutiypi bautizasqaytaqa.

¹⁶ Bautizarqanitaqmi Estefanaspa aylluntapas, ichaqa manam yuyanichu hukkuna bautizasqaytaqa.

¹⁷ Cristoqa kachamuwarqa manam bautizanaypaqchu, aswanqa allin noticiata willanaypaqmi, ichaqa manam runapa yachayninwanchu, chaynapi Cristopa chakatachikusqan mana yanqachasqa kananpaq.

Cristollapi Diospa atiyninwan yachayninqa kasqanmanta

¹⁸ Chinkasqakunapaqqa, Cristopa cruzpi wañusqanmanta willakuyqa mana valeqpaq hapisqam, salvakuy munaqkunapaqmi ichaqa kay willakuyqa atiyniyuq.

¹⁹ Chuya Qellqapas kaynatam nin: “Yachaysapa runapa yachaynintam chinkarachisaq, yuyaysapa runapa yuyaynintam yanqacharusaq”, nispa.

²⁰ ¿Maypitaq yachaysapa kachkan? ¿Maypitaq Diospa leynin yachachiq kachkan? ¿Maypitaq kay pachapi kaqkunamanta rimaq kachkan? Diosmi kay pachapi runakunapa yachayninta yanqacharun.

²¹ Kay pachapi runakunaqa kikinkupa yachayninwanmi Diosta mana reqsirqakuchu, hinaptinmi Diosqa hatun yachayniyuq kaspa iñiqkunata salvayta munarqa Cristomanta allin noticiata willachispan, chaynatam kay pachapi runakunapaq ruwarqa, kay allin noticia mana valeqpaq rikchakuchkaptinpas.

²² Judiokunam milagrokuna qawayta munanku, griegokunañataqmi yachayta maskanku,

²³ ñoqanchikmi ichaqa chakatasqa Cristomanta willakunchik. Judiokunapaqmi kay willakuyqa urmachiqninku hina, mana judío kaqkunapaqñataqmi mana valeqman rikchakun.

²⁴ Diospa qayasqakunapaqmi ichaqa judío kaptinpas, mana judío kaptinpas, Cristoqa Diospa atiyninwan hinaspa Diospa yachaynin.

²⁵ Diospa imapas yachachisqanqa runakuna mana valeqpaq hapichkaptinpas, runakunapa yachayninkumantaqa aswan yachayniyuqmi. Chaynataqmi Diospa imapas ruwasqanqa runakunapaq facilla rikchakapuptinpas, paykunapa ruwasqanmantaqa aswan atiywan ruwasqa kachkan.

²⁶ Wawqe-panikuna, imaynam qayasqa kasqaykichikmanta qawarikuychik, runakunapa qawasqanman hinaqa qamkuna ukupiqa asllam yachayniyuqkunaqa, asllataqmi atiyniyuqpas chaynataq ancha reqsisqakunapas kachkankichik.

²⁷ Aswanqa kay pachapi mana yachayniyuqkunatam Dios akllarqa, chaynapi yachayniyuqkunata penqayman churananpaq. Akllarqataqmi kay pachapi mana atiyniyuqkunatapas, chaynapi atiyniyuqkunata penqayman churananpaq.

²⁸ Diosqa akllarqa kay pachapi wakchakunatawan, despreciasqakunatam hinaspa mana imapaqpas valeqkunatam, chaynapi hatunchakuqkunata mana kaqpaqña churananpaq.

²⁹ Chaynapi Diospa qayllanpi mana pipas hatun tukunanpaq.

³⁰ Qamkunatam ichaqa Diospuni Cristo Jesuswan hukllawasurqankichik, paytam churarqa yachayninchik, pampachaqninchik, chuyanchaqninchik hinaspa salvaqninchik kananpaq.

³¹ Imaynam Qellqapa kayna nisqanman hina: “Pipas alabakuyta munaspaqa Señor-mantayá alabakuchun”, nispa.