Salmos 99 - Chuya Qellqa 1992

Reyqa Tayta Dioslla kasqanmanta

¹ ¡Tayta Diosmi Reyqa! Llapa runakuna katkatatachun. Querubinkunapa chawpinpim tiyachkan, lliw nacionkuna kuyurichun, allpa pachapas katkatatachun.

² Sión llaqtapi Tayta Diosqa hatunmi, llapa llaqtakunapim payqa munaychakun.

³ Dios taytalláy, hatu-hatun sutikita yupaychachunku, manchakuypaq sutikita hatunchachunku. ¡Diosqa chuyam!

⁴ Qamqa atiyniyuq reymi kanki, qamqa allin arreglotam kuyanki; qamllam allin ruwaytaqa yachachinki. Jacobpa mirayninkunapaqmi allin arreglota ruwanki, mana pimanpas sayapakuspam ruwanki.

⁵ Señorninchik Tayta Diosta hatunchaychik, chakinkunapa ñawpaqninpi qonqorakuychik. ¡Payqa chuyam!

⁶ Moiseswan Aaronmi sacerdotekunawan karqa, Samuelñataqmi yupaychaqkunawan karqa. Tayta Diospa yanapakuyninta qayakuptinkum payqa uyariykamurqa.

⁷ Sayaq puyumantam paykunata rimapayamurqa, paykunañataqmi kamachikuyninkunata kasukurqaku, yachachikuyninkunatam ruwayman churarqaku.

⁸ Dios Taytallayku, qayakuyninkutam uyariykurqanki, pampachaqninku Diosmi karqanki, huchankuman hinam castigarqanki.

⁹ Yupaychasqanchik Tayta Diosta hatunchaychik, sapaqchasqan orqopi qonqorakuychik. ¡Señorninchik Tayta Diosqa chuyam!