Salmos 98 - Chuya Qellqa 1992

Tayta Diosqa allin ruwaq kasqanmanta

Diosman takinapaq

¹ Tayta Diosman musoq takita takiychik, admirakuypaq kaqkunatam ruwarun, enemigonkunatam atiyninwan vencerun, chuya makinwanmi vencerun.

² Tayta Diosmi vencesqanta qawachikun, nacionkunamanmi allin ruwaq kasqanta qawachikun.

³ Israel castakuna kuyasqantam yuyarirqa Israelpa mirayninkuna mana saqerusqantam yuyarirqa. Kay pachapi llapallan yachaqkunam Diosninchikpa vencesqanta rikurqaku.

⁴ Kay pachapi llapallan yachaqkuna, kusikuywan Tayta Diosman takiychik. Kusikuywan taqllakuspa qapariywan takiychik.

⁵ Arpata tocaspa Tayta Diospaq takiychik, payman takispa arpata tocaychik.

⁶ Tayta Diosmanyá kusikuywan takiychik, Reyninchikpa qayllanpiyá trompetakunata tocaychik.

⁷ Lamar qochapas qaparichunku, chaypi kaqkunapas qaparichunku. Kay pachapas qaparichun, chaypi yachaqkunapas qaparichunku.

⁸ Mayukunapas taqllakuchunku, orqokunapas huklla qaparichunku.

⁹ Tayta Diospa ñawpaqninpi takichunku; payqa kay pachata juzgananpaqmi hamunqa. Allin arregloman hinam kay pachata juzganqa, mana pimanpas sayapakuspam juzganqa.