Salmos 95 - Chuya Qellqa 1992

Tayta Diosman kusikuywan takinamanta

¹ ¡Hamuychik, Tayta Diosman kusikuywan takisunchik! ¡Qaqa hina salvaqninchikman kusikuywan takisunchik!

² ¡Ñawpaqninman asuykusun takikunawan qaparispayá payman takisunchik!

³ Tayta Dioslla hatun Dios kasqanrayku, payqa dioskunapapas hatun Reynin kasqanrayku.

⁴ Uku allpa pachapas makillanpim kachkan, payllapam alto orqokunapas.

⁵ Lamar qochapas paypam, paymi unancharqa, chaki allpatapas makinkunawanmi ruwarqa.

⁶ Hamuychik, kumuykuspa yupaychasunchik, Tayta Diospa qayllanpi qonqorakusunchik, paymi ñoqanchiktaqa unanchawarqanchik.

⁷ Paymi ñoqanchikpa Diosninchikqa, ñoqanchikqa llaqtanmi kanchik, pastonpi michinan ovejankunam kanchik. Rimarisqanta kunan uyarispaqa,

⁸ amayá sonqoykichikta rumiyachiychikchu Meribapi hinaqa; amayá sonqoykichikta rumiyachiychikchu chunniq Masah lawpi hinaqa.

⁹ Chaypim ñawpaq taytaykichikkuna, ruwasqaykunata rikuchkaspankupas pruebawaspa piñachiwarqaku.

¹⁰ Tawa chunka watam paykunawan piñasqa karqani, hinaspam nirqani: “Kay runakunaqa pantaq sonqoyuqmi, kamachikuyniykunatapas mana kasukuqmi”, nispa.

¹¹ Chayraykum piñakuyniypi jurarqani: “Samanankupaq qosqay allpamanqa manam yaykunqakuchu”, nispay.