Salmos 93 - Chuya Qellqa 1992

Tayta Dioslla Rey kasqanmanta

¹ ¡Tayta Diosmi Reyqa! ¡Rey pachanwan pachasqam kachkan! ¡Hatu-hatun atiyninwan chumpisqam kachkan! Paymi kay allpa pachata takyachirqa, mana kuyurinanpaq.

² Dios Taytalláy, qallariymantapacham munaychakuynikiqa takyan, qamqa wiña-wiñaypaqmi kanki.

³ Dios Taytalláy, mayukunam hoqarikuchkanku, mayukunam qaparichkanku, mayukunapa olankunam orqonchakuchkanku.

⁴ Hanaq pachapi Dios Taytalláy, lamar qochapa qapariyninmantapas, lamar qochapa olankunamantapas, aswan atiyniyuqmi kanki.

⁵ Dios Taytalláy, kamachikuynikikunaqa mana kuyuriqmi, chuya kaynikipas wiña-wiñaypaq temploykipa adornonmi.