Salmos 91 - Chuya Qellqa 1992

Dioslla waqaychawaqninchik kasqanmanta

¹ Tukuy imapa hawanpi munaychakuqpa pakaykusqan yachakuq runaqa, Tukuy Atiyniyuqpa llantuykusqanmi kawsakunqa.

² Paymi Tayta Diosta ninqa: Qamqa waqaychaqniymi kanki, pakakunay wasim kanki, hapipakunay Diosmi kanki, nispa.

³ Paymi libraykusunki pakasqa toqllamantapas, chaynataq wañuchikuq onqoymantapas.

⁴ Rapranwanmi pakaykusunki, puranwanmi wankuykusunki, cheqap kayninmi waqaychaspa harkaykusunki.

⁵ Tutayaypi manchakuytapas manam manchakunkichu, punchawpi flechakunatapas manam manchakunkichu,

⁶ tutapi muyuq onqoytapas manam manchakunkichu, punchawpi wañuchikuqtapas manam manchakunkichu.

⁷ Ichoqnikipim waranqa wañunqa, alleqnikipim chunka waranqa wañunqa qamtam ichaqa mana imapas pasasunkichu.

⁸ Cheqaptapas qamqa qawayllam qawanki, mana allin ruwaqkunapa castigo chaskisqanta.

⁹ Tayta Diosta pakaykusuqnikipaq churasqaykiraykum, tukuy imapa hawanpi munaychakuqta harkaykusuqnikipaq hapisqaykiraykum,

¹⁰ mana imapas imanasunkichu, onqoypas manam wasikiman chayamusunkichu.

¹¹ Qamraykum angelninkunata kamachinqa mayta riptikipas waqaychasunaykipaq.

¹² Rumipi chakiki mitkananmantapas makinwanmi harkaykusunki.

¹³ Leonkunapa, maqta urukunapa kasqantam purinki, uña leonkunata, venenoyuq maqta urukunatam sarunki.

¹⁴ Diosmi nin: Hapipakuwasqanraykum libraykusaq, reqsiwasqanraykum tukuy imapa hawanpi churaykusaq.

¹⁵ Qayakamuwaptinmi uyariykusaq, sasachakuyninpim payta yanapasaq, libraspaymi payta hatunchaykusaq.

¹⁶ Unay watakunatam kawsachisaq, salvasqaytam qawachisaq, nispa.