Salmos 9 - Chuya Qellqa 1992

Tayta Diosqa allin juez kasqanmanta Álef

Kay takiqa arpakunawan qenakunawan takinam
Álef

¹ Dios Taytalláy, tukuy sonqoymantam yupaychasqayki, admirakuypaq kaqkuna ruwasqaykimantam willakusaq.

² Dios Taytalláy, qamqa tukuy imapa hawanpi munaychakuqmi kanki, ñoqaqa qamllapim llumpayta kusikusaq, takispaymi sutikita yupaychasaq.

Bet

Bet

³ Qampa ñawpaqnikimantam enemigoykuna ayqenku, ñawpaqnikipi wichiykuspankum puchukarunku.

⁴ Qamqa allin juezmi kanki, tronoykipi tiyaykuspam allin arreglota ruwanki.

Guímel

Guímel

⁵ Llapa nacionkunatam qaqchaparurqanki, mana allin ruwaqkunatam puchukarachirqanki, sutinkutapas wiñaypaqmi chinkarachirqanki.

⁶ Enemigoykunam wañurunku, wiña-wiñaypaqmi puchukarunku, manaña pipas yuyarinankupaqmi llaqtankutapas purmarachinki.

⁷ Tayta Diosqa wiña-wiñaypaq munaychakuqmi, juzgananpaqmi tiyananta alistarun.

⁸ Allin arregloman hinam kay pachata juzganqa, munasqanman hinam llaqtakunatapas sentencianqa.

Vav

Vav

⁹ Dios Taytalláy, ñakariqkunapa amparakunanmi kanki, sasachakuy tiempopi waqaychaqninmi kanki.

¹⁰ Sutiki reqsiqkunaqa qamllapim hapipakunqaku, maskaqnikikunataqa manam haykapipas saqerunkichu.

Zayin

Zayin

¹¹ Sionpi munaychakuq Tayta Diosmanyá takiychik. Tukuy imakuna ruwasqanmantayá runakunaman willakuychik.

¹² Tayta Diosqa ñakariqkunatam yuyarin, qayakuyninkutapas manam qonqanchu; wañuchiqpa yawar chaqchusqantaqa manapunim qonqanqachu.

Jet

Jet

¹³ Dios Taytalláy, llakipayaykullaway, cheqniqniykunapa causanpi ñakarisqayta qawariykullaway, wañuypa patanmanta hurqoykullaway,

¹⁴ hatunchasqa kanaykimanta Jerusalén llaqtapa punkupi willakunaypaq, salvaykuwasqaykimanta kusikunaypaq.

Tet

Tet

¹⁵ Nacionkunam kikinkupa uchkusqankuman wichiykunku, kikinkupa toqlla churasqankuwanmi hapirachikunku.

¹⁶ Tayta Diosqa mana pimanpas sayapakuq juez kasqanpim reqsichikun; mana allin ruwaqqa kikinpa trampallanmanmi wichiykun.

Yod

Yod

¹⁷ Mana allin runakunaqa, Diosta qonqaruq nacionkunaqa, wañuqkunapa kasqanmanmi apasqa kanqaku.

Kaf

Kaf

¹⁸ Wakchakunaqa manam wiñaypaqchu qonqasqa kanqaku, ima suyasqankupas manam wiñaypaqchu chinkachisqa kanqa.

¹⁹ Dios Taytalláy, hatariy; runaqa amayá hatun tukuchunchu, nacionkunapas ñawpaqnikipi juzgasqa kachunku.

²⁰ Dios Taytalláy, paykunatayá hatu-hatunta mancharichiy, wañuq runalla kasqankuta yachakunankukama.