Salmos 88 - Chuya Qellqa 1992

Wañuy patanpiña kaspa mañakusqanmanta

Coreypa miraynin Ezra casta Hemanpa qellqasqan

¹ Dios Taytalláy, salvaykuqniy Diosnilláy, tuta punchawmi qayakamullayki.

² Mañakamusqayta chaskiykullaway, qayakamusqayta uyariykullaway.

³ Sasachakuypa intusqanmi almallay tarikun, wañuy patanpiñam kallachkani.

⁴ Wañusqapaq hapisqañam kallachkani, mana kallpayuqñam kallachkani.

⁵ Wañusqakunapa chawpinpim qonqasqa kallachkani, guerrapi wañuruspa pamparusqanku hinam kallachkani, saqesqayki hinañam kallachkani, qonqarusqayki hinañam kallachkani.

⁶ Uku-uku uchkumanmi wischuykuwanki, tutayaq ukumanraqmi wischuykuwanki.

⁷ Piñakuynikitam kachaykamuwanki, olaykikunapa llasayninwanmi ñitirachiwanki.

⁸ Reqsiqniykunatam ñoqamanta karuncharunki, paykunapa millakusqantam ruwaruwanki, mana lluptiy atiq preso hinam kallachkani.

⁹ Llumpay waqasqaypim ñawsayaruchkaniña, Dios Taytalláy, sapa punchawmi qayakamullayki, qamllamanmi makillayta hoqarimullani.

¹⁰ ¿Yaqachu wañusqakunapaq milagroykikunata ruwaruwaq? ¿Yaqachu wañusqakuna hatarinmanku yupaychasunaykipaq?

¹¹ ¿Yaqachu sepulturapi kuyakuynikimanta rimanmanku? ¿Yaqachu wañusqakunapa kasqanpi cheqap kaqmanta rimanmanku?

¹² ¿Yaqachu tutayaypi admirakuypaq ruwasqaykikunata yachanmanku? ¿Yaqachu manaña imapas yuyarina sitiopi allin ruwasqaykikunata yuyarinmanku?

¹³ Dios Taytalláy, ñoqallayqa qamllatam qayakamullayki, tutapaytam mañakamullayki.

¹⁴ Dios Taytalláy, ¿Imanasqataq qepanchakuruwanki? ¿Imanasqataq ñoqamanta pakakurunki?

¹⁵ Warma kasqaymantapunim ñakarirqani, wañuy patanpiñam karqani, hatun sasachakuykunatam kachaykamuwarqanki, manam aguantayta atiniñachu.

¹⁶ Hatun piñakuynikim hayparullawan, ñakarichiwasqaykim chinkarachiwachkanña.

¹⁷ Tukuy punchawmi yaku hina muyurullawan, yakupa tuytusqanmi kallachkani.

¹⁸ Aylluykunatam ñoqamanta karuncharunki, kuyaqniykunatam ñoqamanta rakiruwanki, kunanqa tutayayllapiñam saqerullawanki.