Salmos 87 - Chuya Qellqa 1992

Jerusalén llaqtata Dios kuyasqanmanta

Coreypa mirayninkuna takisqan

¹ Diospa llaqtanpa cimientonkunaqa chuya moqopa hawanpim kachkan.

² Señorqa Jacobpa wasinmantapas mastaqa Sionpa punkunkunatam kuyan.

³ Diospa llaqtan, allinllatañam qanmanta rimanku.

⁴ Reqsiwaqniy nacionkunam kaykuna: “Egipto, Babilonia, Filistea, Tiro hinaspa Etiopía. Llapallankum Sión llaqtamanta miramurqaku”, nispa.

⁵ Sión llaqtamantam ninqaku: “Kaymi wakmi Sión llaqtapi nacerqa, tukuy imapa hawanpi munaychakuq Diosmi allinta takyachirqa”, nispanku.

⁶ Tayta Diosmi llaqtakunapa sutinta qellqanqa: “Kaymi Sión llaqtapi nacerqa”, niqta.

⁷ Takiqkunawan tocaqkunam chaypi ninqaku: “Sión llaqtamanta miramuqmi kaniku”, nispanku.