Salmos 85 - Chuya Qellqa 1992

Diospa kuyapayakuyninmanta

Coreypa mirayninkunapa takisqan

¹ Dios Taytalláy, ancha allinmi nacionnikipaq karqanki, Jacobtam preso kayninmanta kutichimurqanki.

² Llaqtaykipa huchantam pampachaykurqanki, huchankunatam mayllaykurqanki.

³ Piñakuynikitam anchurichirqanki, hatun rabiakuynikitam asurichirqanki.

⁴ Salvaqniyku Dios Taytallayku, musoqmantayá hatariykachiwayku, contraykupi piñakuynikita chinkarachiy.

⁵ ¿Haykapikamataq contraykupi piñakurunki? ¿Miraymanta miraykamachu piñakurunki?

⁶ ¿Manachu musoqmanta kallpanchaykuwankiku llaqtayki qanwan kusikunanpaq?

⁷ Dios Taytalláy, kuyakuynikita qawachiwayku, salvacionnikita qoykullawayku.

⁸ Tayta Diospa nisqantam uyarisaq; llaqtanmanmi, chuya sonqo runankunamanmi hawka kawsakuymanta rimarinqa, manaña loco hina ruwanankupaqmi rimarinqa.

⁹ Cheqaptapunim Diosqa hichpallapi kachkan, kasukuqninkunata salvaykunanpaq, allpanchikpi atiyninta takyachinanpaq.

¹⁰ Kuyakuywan cheqap kaqmi tupanakurun; allin ruwaywan hawkayaymi muchanakurun.

¹¹ Cheqap kaqmi allpamanta wiñamunqa, allin arreglo ruwaymi hanaq pachamanta qawamunqa.

¹² Tayta Diosmi allin kaqkunata qowasun, allpanchikpas sinchitam rurunqa.

¹³ Allin ruwaymi Diospa ñawpaqninta rinqa, chayninta purinanpaqmi ñanta allichanqa.