Salmos 83 - Chuya Qellqa 1992

Israelpa enemigonkuna tukusqa kananmanta

Asafpa takisqan

¹ ¡Diosnilláy, amayá upallakuychu! ¡Amayá mana rimarispaqa hawkallaqa kaychu!

² Enemigoykikuna contraykipi rimasqankuta qawariy, tukuy imata rimaspa contraykipi hoqarikusqanta qawariy.

³ Llaqtaykipa contranpim mana allinta tanteanakurunku, nanachikusqaykikunapa contranpim mana pipa yachasqallanta rimanakurunku.

⁴ Kaynatam ninakurunku: “Hamuychik, manaña llaqta kanankama, Israelpa sutintapas manaña pipas yuyarinankama, Israel nacionta purmarachimusunchik”, nispanku

⁵ Contraykipim huk sonqolla yacharachinakunku, contraykipim huk runa hinalla contratota ruwarunku.

⁶ Paykunam karqa: Edom, Ismael, Moab, Agar,

⁷ Gebal, Amón, Tiro, Amalec hinaspa Filistea tropakuna.

⁸ Asiria runakunapas paykunamanmi hukllawakurunku; Lotpa mirayninkunapa kallpanchaqninñam rikurirunku.

⁹ Madián runakunata hina, kamachikuq Sisarata hina, rey Jabinta Cisón mayupi ruwasqaykita hina, paykunata ruway.

¹⁰ Paykunaqa Endor lawpim chinkachisqa karqaku; chakrapaq wanu hinañam rikurirurqaku.

¹¹ Capitanninkunatapas Orebtawan Zeebta hina ruway, kamachiqninkunatapas Zebatawan Zalmunata hina ruway.

¹² Chay reykunam kaynata ninakurqaku: “Diospa allpankunatayá hapikuykusunchik”, nispanku.

¹³ Diosnilláy, kichkata hinayá muyuq wayrawan apachiy, qopata hinayá wayrawan apachiy.

¹⁴ Ninapa rupasqan monteta hinayá ruwaruy, lenwachkaq ninapa kañasqan monteta hinayá ruwaruy;

¹⁵ sinchi parayuq wayraykiwan qatikacharuy, sinchi wayraykiwan mancharichiy.

¹⁶ Dios Taytalláy, paykunata penqayman churay, chaynapi qanman kutirikamunankupaq.

¹⁷ Wiñaypaq penqayman churasqa kachunku, hatun penqaypi wañuchunku.

¹⁸ Qamlla Tayta Dios kasqaykita reqsichunku, kay pachapi qamlla tukuy imapa hawanpi munaychakuq kasqaykita yachachunku.