Salmos 81 - Chuya Qellqa 1992

Diospa kuyapayakuyninmanta

Asafpa takisqan

¹ Kallpanchaqninchik Diosman kusikuymanta takiychik, Jacobpa Diosninman kusikuymanta qapariychik.

² Panderetawan takipuychik, arpawan salteriowan yupaychaychik.

³ Llullu killa fiestapi trompetata tocaychik, poqosqa killa hatun fiestapipas trompetata tocaychik.

⁴ Kay kamachikuytam Jacobpa Diosnin Israelpa mirayninkunaman qorqa.

⁵ Kay kamachikuytam Egipto nacionmanta lloqsimuptin Joseyman qorqa. Mana yachasqay rimariytam uyarirqani:

⁶ Llasaq qepimantam wasaykita samaykachirqayki, sinchi llamkaymantam samaykachirqayki.

⁷ Llakikuypi kaspa qayakamuptikim libraykurqayki, rayo ukunmantam rimapayamurqayki; Meriba sutiyuq yakupa patanpim pruebaman churarqayki.

⁸ Kuyasqay llaqtalláy, kay rimapayasqayta uyariy. ¡Israel, ima allinraq kanman kasuwaptikiqa!

⁹ Amam sapaq diosqa kapusunkichu, amam sapaq diostaqa yupaychankichu.

¹⁰ Ñoqa Tayta Diosllam Diosnikiqa kani, Egipto nacionmanta hurqomuqnikim kani; simikita kichariy saksanaykikama mikuchinaypaq.

¹¹ Llaqtaymi ichaqa mana uyariwarqachu, Israelpa mirayninkunaqa manam kasuwarqakuchu.

¹² Chayraykum munasqankupi kawsanankupaq saqerurqani, chaymi munasqankuman hina kawsakurqaku.

¹³ Sichum kay llaqtay nisqayta uyariwanman karqa, sichum Israelpa mirayninkuna nisqayman hina kawsanmanku karqa,

¹⁴ hinaptinqa enemigonkutam chaylla qarqoruyman karqa, ñakarichiqninku runakunatam castigayman karqa.

¹⁵ Tayta Diosta cheqniqkunapas manchakuymantam kumuykunmanku karqa, wiñaypaq castigasqam kanmanku karqa.

¹⁶ Diosmi allinnin trigota llaqtanman mikuchinman karqa, qaqakunapi abejapa miskinwanmi saksachinman karqa, nispa.