Salmos 8 - Chuya Qellqa 1992

Diospa ancha reqsisqa kayninmanta

Kay takiqa citarawan takinam

¹ Diosnillayku, Señorllayku, ¡mayna hatunmi tukuy kay pachapi sutikiqa! ¡Hatu-hatun kaynikipas cielokunapa hawanmanraqmi mastarikun!

² Llapa ñuñuq wawakunapa chaynataq warmakunapa takinwanmi, enemigoykikunapa contranpi atiyta hatarichinki, chaynatam enemigoykikunata upallachinki, chaynatam vengativo runakunata upallachinki.

³ Unanchasqayki cielokunata qawarispaymi, chaypi churasqayki killatawan chaskakunata qawarispaymi,

⁴ tapukuni: “¿Pitaq runaqa paymanta yuyarinaykipaqqa? ¿Pitaq runapa mirayninqa payta watukunaykipaqqa?”

⁵ Angelkunamanta tumpa menosllatam runataqa ruwarqanki, respetasqa kaywanmi coronaykachinki, hatunchasqa kaywanmi coronaykachinki.

⁶ Paytaqa unanchasqaykikunapi munaychakunanpaqmi churaykurqanki, paypa makinmanmi churaykurqanki:

⁷ Ovejakunata, vacakunata, purun animalkunata,

⁸ pawaq animalkunata, lamar qochapi challwakunata, chaynataq lamar qochapi tukuy rikchaq animalkunatapas.

⁹ Diosnillayku, Señorllayku, ¡mayna hatunmi tukuy kay pachapi sutikiqa!