Salmos 77 - Chuya Qellqa 1992

Diospa ruwasqankuna yuyarinamanta

Asafpa takisqanta Jedutunpa allichasqan

¹ Diostam qayakullani, uyariwananpaqmi qaparispay qayakullani.

² Llakikuyniy punchawmi Señorta maskallani, tutankunam makillayta hoqarispa mana tukuyta mañakullani. Almallaypas manam hawkayayta tarinñachu.

³ Diosmanta yuyarispaymi waqarqani, yuyaymanaspaymi hukmanyarqani.

⁴ Diosnilláy, manam puñuchiwarqankichu; muspaypi hina kaspaymi mana rimaytapas atirqanichu.

⁵ Pasaq punchawkunamantam yuyarini, ñawpaq watakunamantam yuyarini.

⁶ Tutankuna takisqaytam yuyarini, sonqoypi yuyaymanaspaymi tapukuni:

⁷ ¿Wiñaypaqchu Señorninchik piñakurun? ¿Manañachu llakipayaykuwasunchik?

⁸ ¿Wiñaypaqchu kuyapayakuynin tukurun? ¿Wiñaypaqchu prometekusqan tukurun?

⁹ ¿Qonqarunchu kuyapayakuq kayninta? ¿Llumpaytachu piñakurun manaña llakipayawananchikpaq? nispay.

¹⁰ Chaymi nirqani: Ñoqanchikwanqa Diosqa manam ñawpaqta hinañachu, nispay. Chayraykum sonqoy llakisqa tarikun.

¹¹ Tayta Diospa ruwasqankunamantam yuyarisaq, ñawpaqta admirakuypaq ruwasqankunamantam yuyarisaq.

¹² Ruwasqankunapim yuyaymanasaq, ruwasqankunamantam willakusaq.

¹³ Diosnilláy, ruwaynikikunaqa chuyam, manam pipas qam hina Diosqa kanchu.

¹⁴ Diosnilláy, qamllam admirakuypaq kaqkunata ruwanki, atiynikitam llaqtakunaman reqsichirqanki.

¹⁵ Atiynikiwanmi llaqtaykita reclamarqanki, atiynikiwanmi Jacobpa Joseypa mirayninkunata hurqomurqanki.

¹⁶ Diosnilláy, lamar qocham rikususpayki mancharikurqa, yakukunapas uku-ukumantam timpurimurqa.

¹⁷ Puyukunam loco parata chayachimurqa, cielomantam rayokuna toqyamurqa, llipyakunam tukuy hinastinman kancharirqa.

¹⁸ Muyuq wayrapim rayoykikuna toqyarqa, llipyaykikunam kay pachata kancharirqa, allpam kuyurispan katkatatarqa.

¹⁹ Lamar qochantam pasarqanki, achka yakuntam chimparqanki, yupikitapas manam pipas tarirqachu.

²⁰ Moiseswan chaynataq Aaronwanmi llaqtaykita ovejakunata hina pusachirqanki.