Salmos 75 - Chuya Qellqa 1992

Diosqa mana pimanpas sayapakuq kasqanmanta

Asafpa takisqan

¹ Diosnillayku, qanmanmi graciasta qomuykiku, hichpallaykupi kasqaykiraykum qayakamuykiku, admirakuypaq ruwasqaykimantam willakuniku.

² Qamqa kaynatam ninki: Ñoqaqa mana pimanpas sayapakuspam allin arreglota ruwasaq.

³ Kay pachapas chaypi yachaqkunapas kuyuptinqa ñoqam cimientonkunata takyachisaq, nispayki.

⁴ Hatunchakuqkunatam nini: Ama alabakuychikchu, nispay. Mana allin ruwaqkunatam nini: Ama hatunchakuychikchu,

⁵ amayá kallpaykichikmantaqa hatunchakuychikchu, amataqyá qari tukuspaqa rimaychikchu, nispay.

⁶ Hatun tukuyqa manam hamun intipa qespimunanmantachu nitaq intipa seqaykunanmantachu, manataqmi chunniqmantachu nitaqmi moqokunamantachu.

⁷ Diosllam juezqa, payqa wakintam uchuychan wakintañataqmi hatunchan.

⁸ Tayta Diosqa piñakuynin vasotam hapichkan allin poqosqa vinoyuqta. Chay piñakuynin vinota talliykamuptinmi kay pachapi mana allin runakuna upyanqaku.

⁹ Ñoqam ichaqa Jacobpa Diosninmanta willakusaq, hatunchaspam takipusaq.

¹⁰ Diosqa mana allin ruwaq runakunapa atiynintam tuñichinqa, ichaqa allin ruwaq runapa atiynintam hatunchanqa.