Salmos 74 - Chuya Qellqa 1992

Diospa yanapakuyninta mañakusqanmanta

Yachachinapaq Asafpa takisqan

¹ Diosnilláy, ¿imanasqataq wiñaypaq wischuruwankiku? ¿Imanasqataq ovejaykikunapa contranpi piñakurunki?

² Ñawpaq tiempomantaraq rantisqayki llaqtaykimanta yuyariy, herenciayki kananpaq rantisqayki runakunamanta yuyariy, yachanayki Sión moqomanta yuyariy.

³ Hamuspayá pasaypaq purmasqa raqaykunata qaway, santuariotapas enemigom pasaypaqta tuñirachin.

⁴ Enemigoykikunam chuya wasikipi kusikuymanta qaparkachanku, vencesqankumantam banderankutapas señalta hina sayarachinku.

⁵ Paykunaqa hacha apamuq runamanmi rikchakunku, montepi sacha kuchuqmanraqmi rikchakunku.

⁶ Paykunaqa hachawan martillowanmi suma-sumaq llaqllasqakunata pakiparunku.

⁷ Paykunaqa santuarioykitam kañarunku, yachanayki wasitam pasaypaqta tuñirachinku.

⁸ Sonqonkupim nirqaku: “Pasaypaqta tuñirachisun”, nispanku. Yupaychanaykupaq huñunakunayku wasikunatam kañarunku.

⁹ Manañam qanmanta willakuq señalkunatapas rikunikuñachu, profetakunapas manam kanñachu, haykapikamam kayna kanaykutapas manam yachanikuchu.

¹⁰ Diosnilláy, ¿Haykapikamataq enemigokuna insultasunki? ¿Haykapikamataq sutikimanta yanqakunata rimanqaku?

¹¹ ¿Imanasqataq atiyniyuq makikita pakarunki? ¿Imanasqataq mana imatapas ruwankichu?

¹² Diosnilláy, ñawpaq tiempomantaraqmi reyniyku kanki; qamllam llaqtaykuta salvaykuqqa kanki.

¹³ Atiynikiwanmi lamar qochata rakinarqanki, chaypi manchakuypaq animalkunapa umantam pakiparqanki.

¹⁴ Manchakuypaq Leviatanpa umantam ñutururqanki, aychantapas purunpi animalkunamanmi qoykurqanki.

¹⁵ Qanmi pukyutapas mayutapas toqyachirqanki, qanmi mana chakiq mayutapas chakirachirqanki.

¹⁶ Tutapas punchawpas qampam, intitapas killatapas qanmi churarqanki.

¹⁷ Kay pachapa linderonkunatam churarqanki, poqoytapas chirawtapas qanmi unancharqanki

¹⁸ Diosnilláy, enemigopa kamisusqaykita yuyariy, contraykipi rimaq mana yuyayniyuq runakunata yuyariy.

¹⁹ ¡Kay urpillaykikunataqa amayá manchapa animalkunamanqa qoykullawaykuchu! ¡Kay wakchallaykikunataqa amayá wiñaypaqqa qonqarullawaykuchu!

²⁰ Pacto ruwasqaykita yuyariy, kay naciontaqa millakuypaq ruwaykunallam huntaykuchkan.

²¹ Ñakariq runaqa amayá penqaypiqa kachunchu, wakchapas mana piniyuqpas qamllatam yupaychasunki.

²² Diosnilláy, hatarispayki rimarikuy, mana yachayniyuq runakunapa sapa punchaw kamisusqaykita yuyariy.

²³ Enemigoykikunapa qayaykachasusqaykita, contraykipi hatariqkunapa qaparisqanta, ama qonqaychu.