Salmos 73 - Chuya Qellqa 1992

KIMSA KAQ LIBRO (73-89) Diospa kuyapayakuyninmanta

Diosman Asafpa takisqan

¹ ¡Diosqa mayna allinmi Israel runakunapaqqa! ¡Lliw chuya sonqoyuqkunapaqqa!

² Ñoqallayqa yaqallam wichiykullarqani, yaqallamantam urmaykullarqani;

³ hatun tukuqkunamanta envidiakuspay, mana allin ruwaqkunapa apuyasqanta qawaspay.

⁴ Paykunaqa manam wañuytapas manchakunkuchu, sanoy-sanoyraqmi kachkankupas.

⁵ Manam paykunapaqqa ima ñakariypas kanchu, manam ima sasachakuypas paykunapaqqa kanchu.

⁶ Chayraykum collarwan hina hatun tukuywan wallqakunku, millay ruwaywanmi pachakunku.

⁷ Poqorusqankuraykum ñawinkupas pawaruchkanña, mana allinkunallapim yuyaymanankupas.

⁸ Burlakuspam mana allinkunata rimakunku, ñakarichinankupaqmi manchakuypaqta hatun tukuspa rimanku.

⁹ Hanaq pachapa contranpim rimanku, mana allinta rimaspam kay pachapi muyurinku.

¹⁰ Paykunamanraqmi runakunapas anchuykun, imam nisqankumanraqmi hapipakunkupas.

¹¹ Paykunaqa ninkuraqmi: ¿Imaynataq Diosqa yachanman? ¿Yaqachu tukuy imapa hawanpi munaychakuq Dios reqsinman? nispanku.

¹² Kay millay runakunata qawaychik, mana pipa ima nisqanmi apuyakuchkanku.

¹³ Cheqaptapunipas yanqapaqmi sonqoytapas chuyanchani, yanqapaqmi mana allinmanta makiytapas mayllakuni.

¹⁴ Ñoqaqa tukuy punchawmi azotesqa karqani, sapa pacha achikyaqtam castigasqa karqani.

¹⁵ Sichum ñoqa paykuna hina tanteayman karqa, churikikunatapas traicionaruymanñam karqa.

¹⁶ Kaykunamanta yachaykuyta munaspaypas manam entiendeyta atirqanichu.

¹⁷ Diospa santuarionman yaykuruspayñam, imapim paykuna tukurunanta yachaykurqani.

¹⁸ Paykunataqa lluchka ñanmanmi churarunki, purmanankupaqmi tanqaykunki.

¹⁹ Qonqaymantam paykunaqa purmarunqaku, manchakuymi paykunataqa inturunqa.

²⁰ Señorlláy, imaynam huk puñuq rikcharispan mosqokusqanta qonqarun, chayna qonqasqatam paykunata ruwarunki.

²¹ Piñakuypa huntasqan kaptiymi sonqollaypas nanasqa karqa.

²² Ñoqaqa mana yuyayniyuq, mana yachayniyuqñam karqani, animal hinañam qayllaykipi rikurirurqani.

²³ Chaywanpas ñoqaqa qanwanmi kachkani, alleq makiymantam hapiwachkanki.

²⁴ Allin consejoykikunawanmi pusawachkanki, hatunchawaspaykim qamqa chaskiykuwanki.

²⁵ Qamllam hanaq pachapiqa kapuwachkanki, qanwan kaspayqa manam imatapas kay pachapiqa munanichu.

²⁶ Aychallaymi sonqollaywan wañunayachkan, ichaqa Diosmi takyachiwachkan, payllam wiñaypaq herenciayqa.

²⁷ Qanmanta karunchakuqkunaqa wañunqakum, qepanchasuqnikikunataqa chinkachinkim.

²⁸ Ñoqapaqqa Diosman asuykuymi llumpay allinqa, ñoqallayqa Diosllapim hapipakuni, ñoqallayqa tukuy ruwasqanmantam willakusaq.